‘ரெபெல் ஸ்டார்’ பிரபாஸ் நடிப்பில், படைப்பாற்றல் மிக்க இயக்குநர் ஹனு ராகவபுடி இயக்கத்தில் உருவாகியுள்ள மிகப்பெரிய பான் இந்திய திரைப்படமான ‘ஃபௌசி’ (Fauzi) திரைப்படம் வரும் டிசம்பர் 3, 2026 அன்று உலகம் முழுவதும் பிரம்மாண்டமாக வெளியாகவுள்ளதாக படக்குழு அதிகாரப்பூர்வமாக அறிவித்துள்ளது. மைத்ரி மூவி மேக்கர்ஸ் தயாரிப்பில், டி-சீரிஸ் நிறுவனம் வழங்கும் இப்படத்தின் வெளியீட்டு தேதியுடன் புதிய போஸ்டரும் வெளியாகி ரசிகர்களிடையே பெரும் வரவேற்பைப் பெற்றுள்ளது.
வெளியிடப்பட்டுள்ள புதிய போஸ்டரில், இதுவரை காணாத வித்தியாசமான தோற்றத்தில் பிரபாஸ் காட்சியளிக்கிறார். கடுமையான போருக்குப் பிறகு ரத்தக்கறை படிந்த உடல், காயங்களுடன் சோர்வாக அமர்ந்திருக்கும் அவரது தோற்றம், போரின் வலி, தியாகம், உறுதி மற்றும் மனவலிமையை வெளிப்படுத்தும் வகையில் அமைந்துள்ளது. நீண்ட தலைமுடி, அடர்த்தியான தாடி, ரத்தம் தோய்ந்த வெள்ளை வேட்டி என அவரது முழுமையான மாற்றம் ரசிகர்களிடையே அதிக எதிர்பார்ப்பை உருவாக்கியுள்ளது.
புகை சூழ்ந்த போர்க்களம், வீரர்களின் உயிரற்ற உடல்கள் மற்றும் அமைதியாக அமர்ந்திருக்கும் பிரபாஸின் தோற்றம் ஆகியவை, படம் வெறும் போர் கதையாக இல்லாமல், உணர்ச்சிபூர்வமான கதைக்களத்துடன் கூடிய பிரம்மாண்டமான திரையரங்கு அனுபவமாக இருக்கும் என்பதை உணர்த்துகின்றன. குறிப்பாக, இந்த போஸ்டர் படத்தின் முக்கியமான ஆக்ஷன் காட்சிகளில் ஒன்றிலிருந்து எடுக்கப்பட்டதாக படக்குழு தெரிவித்துள்ளது.
பிரம்மாண்டமான ஆக்ஷன் காட்சிகள், ஆழமான உணர்ச்சிகள், உலகத் தரம் வாய்ந்த தொழில்நுட்பம் மற்றும் வரலாற்று பின்னணியைக் கொண்ட கதைக்களம் ஆகியவற்றுடன் உருவாகியுள்ள ‘ஃபௌசி’, 2026-ஆம் ஆண்டின் மிகப்பெரிய பான் இந்திய திரைப்படங்களில் ஒன்றாக உருவெடுத்து வருகிறது.
இப்படத்தில் பிரபாஸுக்கு ஜோடியாக இமான்வி நடித்துள்ளார். மேலும் அனுபம் கெர், மிதுன் சக்கரவர்த்தி, ஜெயப்பிரதா, பானு சந்தர் உள்ளிட்ட பலர் முக்கிய கதாபாத்திரங்களில் நடித்துள்ளனர்.
இத்திரைப்படத்திற்கு சுதீப் சட்டர்ஜி ஒளிப்பதிவு செய்துள்ளார். விஷால் சந்திரசேகர் இசையமைத்துள்ள இப்படத்தின் தயாரிப்பு வடிவமைப்பை அனில் விலாஸ் ஜாதவ் மேற்கொண்டுள்ளார். படத்தொகுப்பை கோத்தகிரி வெங்கடேஸ்வர ராவ் கவனித்துள்ளார்.
வெளியீட்டு தேதி அறிவிப்பும், பிரபாஸின் மாறுபட்ட தோற்றமும் ரசிகர்களின் எதிர்பார்ப்பை மேலும் அதிகரித்துள்ள நிலையில், ‘ஃபௌசி’ திரைப்படம் வசூல் சாதனை படைக்கும் பிரம்மாண்டமான திரையரங்கு அனுபவமாக அமையும் என்ற நம்பிக்கை திரையுலகில் நிலவுகிறது.