நடிகர் வைபவ் கதாநாயகனாக நடித்துள்ள ‘மாறுவேஷம்’ திரைப்படம் யூ/ஏ சான்றிதழ் பெற்றுள்ள நிலையில், வரும் அக்டோபர் 1ஆம் தேதி உலகம் முழுவதும் திரையரங்குகளில் வெளியாகிறது. இப்படத்தின் முதல் பார்வை மற்றும் முதல் பாடலுக்கு ரசிகர்கள் மத்தியில் நல்ல வரவேற்பு கிடைத்திருந்த நிலையில், தற்போது படத்தின் திரையரங்கு வெளியீட்டு தேதியை படக்குழு அதிகாரப்பூர்வமாக அறிவித்துள்ளது.
கிளாசிக்கல் மர்டர் மிஸ்ட்ரி திரில்லர் திரைப்படமாக உருவாகியுள்ள ‘மாறுவேஷம்’ படத்தை விஜய் ஆனந்த் மற்றும் வைபவ் இணைந்து ஓநைரோமன்சி பிக்சர்ஸ் சார்பில், மன்கி மேன் கம்பெனியுடன் இணைந்து தயாரித்துள்ளனர். இப்படத்தை ஸ்ரீனி எழுதி இயக்கியுள்ளார்.
படத்தில் வைபவ், திலக் என்ற காவல்துறை அதிகாரி கதாபாத்திரத்தில் நடித்துள்ளார். மர்மமான கொலை வழக்கு ஒன்றின் பின்னணியில் இருக்கும் உண்மையை அவர் கண்டறிய முயல்வதை மையமாகக் கொண்டு கதை நகர்கிறது. விசாரணையின் போது மறைக்கப்பட்ட அடையாளங்கள், எதிர்பாராத திருப்பங்கள் மற்றும் அதிர்ச்சியூட்டும் சம்பவங்கள் அடுத்தடுத்து இடம்பெறுவதால், பார்வையாளர்களை இறுதிவரை யூகிக்க வைக்கும் வகையில் இப்படம் உருவாகியுள்ளதாக படக்குழு தெரிவித்துள்ளது.
சஸ்பென்ஸ், உணர்வுப்பூர்வமான காட்சிகள் மற்றும் விறுவிறுப்பான விசாரணைக் காட்சிகளுடன் நகரும் ‘மாறுவேஷம்’, மிஸ்ட்ரி மற்றும் திரில்லர் திரைப்படங்களை விரும்பும் ரசிகர்களுக்கு வித்தியாசமான திரை அனுபவத்தை வழங்கும் என எதிர்பார்க்கப்படுகிறது.
இப்படத்தில் வைபவுக்கு ஜோடியாக வியானா நடித்துள்ளார். ராம்கி, முனீஷ்காந்த், விவேக் பிரசன்னா, லிவிங்ஸ்டன், ஜார்ஜ் மரியான், ஜார்ஜ் விஜய், இந்துமதி, மு. ராமசாமி, செல் முருகன் உள்ளிட்ட பலர் முக்கிய கதாபாத்திரங்களில் நடித்துள்ளனர்.
படப்பிடிப்பு மற்றும் போஸ்ட் புரொடக்ஷன் பணிகள் நிறைவடைந்துள்ள நிலையில், தற்போது திரைப்படத்திற்கு யூ/ஏ சான்றிதழும் கிடைத்துள்ளது. இதையடுத்து ‘மாறுவேஷம்’ திரைப்படம் அக்டோபர் 1ஆம் தேதி முதல் உலகம் முழுவதும் திரையரங்குகளில் வெளியாகத் தயாராகியுள்ளது.
இப்படத்திற்கு பாலாஜி கே. ராஜா ஒளிப்பதிவு செய்துள்ளார். ராஜ்குமார் அமல் இசையமைக்க, என்.பி. ஸ்ரீகாந்த் படத்தொகுப்பை மேற்கொண்டுள்ளார். கலை இயக்கத்தை மணிகண்டன் ஸ்ரீனிவாசன் கவனித்துள்ள நிலையில், கூடுதல் திரைக்கதையை எஸ். இசையமுதன் எழுதியுள்ளார்.
மர்மம், கொலை விசாரணை, சஸ்பென்ஸ் மற்றும் எதிர்பாராத திருப்பங்களை மையமாகக் கொண்டு உருவாகியுள்ள ‘மாறுவேஷம்’, வரும் அக்டோபர் 1ஆம் தேதி உலகம் முழுவதும் திரையரங்குகளில் வெளியாகிறது.