காதல் கதைகள் எத்தனை விதமாக சொல்லப்பட்டாலும், அதை இயல்பான மனிதர்களின் வாழ்க்கையோடும், குடும்ப உறவுகளோடும் இணைத்து சுவாரஸ்யமாகக் கொடுப்பதில் ஒரு தனி அழகு இருக்கிறது. அந்த வகையில், காதல், நகைச்சுவை, குடும்ப உணர்வுகள் மற்றும் உறவுகளின் சிக்கல்களை மையமாகக் கொண்டு உருவாகியுள்ள ‘ஹாய்’, பெரிய திருப்பங்களைக் காட்டிலும் கதாபாத்திரங்களின் இயல்பான தருணங்களையும் அவர்களுக்கிடையேயான உறவுகளையும் நம்பி பயணிக்கும் ஒரு எளிமையான ரொமான்டிக் என்டர்டெய்னர்.
பாடலாசிரியராகவும், இசை மற்றும் சினிமா உலகில் தனது பணியின் மூலம் கவனம் பெற்றவருமான விஷ்ணு எடவன், ‘ஹாய்’ திரைப்படத்தின் மூலம் இயக்குநராக அறிமுகமாகியுள்ளார். விஷ்ணு எடவனே எழுதி இயக்கியுள்ள இப்படத்திற்கு சி.யு. முத்துசெல்வன் கூடுதல் திரைக்கதை மற்றும் வசனப் பங்களிப்பை வழங்கியுள்ளார். காதலைப் பற்றிய முற்றிலும் மாறுபட்ட பார்வைகளைக் கொண்ட இரண்டு கதாபாத்திரங்கள், எதிர்பாராத சூழ்நிலையில் சிக்கிக்கொள்ளும்போது அவர்களின் வாழ்க்கையில் ஏற்படும் மாற்றங்களே படத்தின் மையமாக அமைந்துள்ளன.
மயில்சாமி கதாபாத்திரத்தில் கவின், காதலுக்காக ஏங்கும், ஆனால் வாழ்க்கையில் பல்வேறு ஏமாற்றங்களையும் நிராகரிப்புகளையும் சந்தித்த இளைஞராக நடித்துள்ளார். மறுபுறம் தேவயானி கதாபாத்திரத்தில் நயன்தாரா, தனது வாழ்க்கை குறித்த தனிப்பட்ட முடிவுகளுடன் பயணிக்கும் பெண்ணாக வருகிறார். இருவரின் வாழ்க்கையும் ஒரு எதிர்பாராத சந்திப்பின் மூலம் இணைகிறது. அந்த சந்திப்பு நட்பாக மாறி, பின்னர் காதலாக உருவெடுக்கும் விதமும், அதைச் சுற்றி உருவாகும் குடும்ப சூழ்நிலைகளும்தான் படத்தின் பிரதான பயணம்.
படத்தின் மிகப்பெரிய பலமாக அமைவது கவின் – நயன்தாரா கூட்டணி. கவினின் இயல்பான உடல்மொழி, முகபாவனைகள் மற்றும் நகைச்சுவை டைமிங் ஆகியவை மயில்சாமி கதாபாத்திரத்திற்கு நல்ல பொருத்தமாக அமைந்துள்ளன. குறிப்பாக முதல் பாதியில் அவரது காமெடி மற்றும் இயல்பான நடிப்பு படத்தை இலகுவாக நகர்த்துகிறது. காதலில் தடுமாறும் இளைஞனாகவும், சூழ்நிலைகளுக்கு ஏற்ப தன்னை மாற்றிக்கொள்ளும் மனிதனாகவும் கவின் சிறப்பாக நடித்துள்ளார்.
நயன்தாரா, தேவயானி கதாபாத்திரத்திற்கு தேவையான முதிர்ச்சியையும் உணர்வையும் கொண்டு வந்துள்ளார். கதாபாத்திரத்தின் உணர்வுப்பூர்வமான காட்சிகளில் அவரது அனுபவம் வெளிப்படுகிறது. கவினுடன் இணையும் காட்சிகளில் இருவருக்கும் இடையேயான கெமிஸ்ட்ரி இயல்பாக இருப்பது படத்தின் ரசனைக்கு கூடுதல் பலம் சேர்க்கிறது. குறிப்பாக, நட்பு காதலாக மாறும் அந்தப் பயணத்தை இருவரும் தங்களது நடிப்பால் நம்ப வைக்கிறார்கள்.
படத்தின் மற்றொரு முக்கிய பலம் அதன் நட்சத்திரக் கூட்டணி. நயன்தாராவின் தந்தையாக நடித்துள்ள பிரபு, கதையின் உணர்வுப்பூர்வமான பகுதிகளில் கவனம் ஈர்க்கிறார். குறிப்பாக அவரது கதாபாத்திரம் படத்தின் போக்கில் பெறும் மாற்றம் அழகாக கையாளப்பட்டுள்ளது. கே.பாக்யராஜ் தனது வழக்கமான நகைச்சுவை பாணியுடன் வரும் காட்சிகளில் நல்ல சிரிப்பை ஏற்படுத்துகிறார். அவரது ஒன்-லைனர்கள் படத்தின் நகைச்சுவை பகுதிகளுக்கு கூடுதல் சுவை சேர்க்கின்றன.
ராதிகா சரத்குமார் பரிமளா கதாபாத்திரத்திலும், VTV கணேஷ் மருத்துவர் சண்முகியாகவும், அம்ருதா சீனிவாசன், ஃபெப்சி விஜயன், ரெஞ்சி பணிக்கர், சத்யன், ஆதித்ய கதிர், குரேஷி, காவியா அறிவுமணி, மிர்ச்சி கெமிஉள்ளிட்டோர் துணைக் கதாபாத்திரங்களிலும் நடித்துள்ளனர். இவர்களுடன் உருவாகும் குடும்ப மற்றும் நகைச்சுவை காட்சிகள் படத்தின் உலகத்தை உயிர்ப்புடன் வைத்திருக்கின்றன.
திரைக்கதையைப் பொறுத்தவரை, ‘ஹாய்’ மிகவும் எளிமையான காதல் கதையை எடுத்துக்கொண்டு, அதை குடும்ப பின்னணியில் நகர்த்த முயற்சிக்கிறது. காதல் எப்படி உருவாகிறது என்பதைக் காட்டுவதுடன், காதல் தொடர்பான தனிப்பட்ட நம்பிக்கைகள், குடும்ப எதிர்பார்ப்புகள் மற்றும் வாழ்க்கையில் எடுக்க வேண்டிய முடிவுகள் ஆகியவற்றையும் கதை தொட்டுச் செல்கிறது. குறிப்பாக, படத்தின் மையக் கதாபாத்திரங்களைச் சுற்றி உருவாகும் உறவுகள் கதையை வெறும் காதல் படமாக இல்லாமல் குடும்ப பொழுதுபோக்கு படமாக மாற்றுகின்றன.
அதே நேரத்தில், படத்தின் சில பகுதிகளில் கதையிடம் இருந்து எதிர்பார்ப்பு அதிகமாக உருவாகும் நிலையில், அதற்கான அழுத்தமான பதில்களை திரைக்கதை முழுமையாக வழங்காமல் பாதுகாப்பான பாதையில் செல்வது சற்று குறையாகத் தெரிகிறது. சில துணைக் கதைகள் மேலும் ஆழமாக ஆராயப்பட்டிருந்தால், கதையின் உணர்வுப்பூர்வமான தாக்கம் இன்னும் அதிகமாக இருந்திருக்கும். அதேபோல், நகைச்சுவையும் எல்லா இடங்களிலும் ஒரே அளவில் வேலை செய்யவில்லை. இருப்பினும் படம் தன்னை மிகவும் சீரியஸான காதல் நாடகமாக மாற்றிக்கொள்ளாமல், இலகுவான மனநிலையில் பயணிப்பது அதன் தனித்தன்மையாகவும் அமைகிறது.
தொழில்நுட்ப ரீதியாக ராஜேஷ் சுக்லாவின் ஒளிப்பதிவு படத்தின் இலகுவான காதல் மனநிலைக்கு ஏற்ற வகையில் காட்சிகளை அழகாகப் பதிவு செய்துள்ளது. இயல்பான சூழல்களையும் கதாபாத்திரங்களின் உணர்வுகளையும் அதிகப்படியான அலங்காரம் இல்லாமல் காட்சிப்படுத்தியிருப்பது சிறப்பு.
ஜென் மார்ட்டினின் இசை படத்தின் மற்றொரு முக்கிய பலம். குறிப்பாக ‘ரசகுல்லா’ பாடல் உற்சாகமான மனநிலையை உருவாக்குவதோடு, பின்னணி இசையும் காதல் மற்றும் உணர்வுப்பூர்வமான காட்சிகளுக்கு தேவையான வலுவை வழங்குகிறது. படத்தின் ஒட்டுமொத்த breezy mood-க்கு இசை நன்றாக துணை நிற்கிறது.
பிலோமின் ராஜின் படத்தொகுப்பு படத்தை சுமார் இரண்டரை மணி நேரத்திற்குள் கொண்டு செல்கிறது. படத்தின் பெரும்பாலான பகுதிகள் எளிதாக நகர்ந்தாலும், சில இடங்களில் வேகத்தில் சிறிய தொய்வு உணரப்படுகிறது. இருப்பினும், காதல் மற்றும் குடும்பக் காட்சிகளுக்கு இடையேயான மாற்றங்கள் பெரும்பாலும் சீராக அமைந்துள்ளன.
கண்ணன்.எஸ்-ன் கலை இயக்கம், தினேஷ் காசியின் ஸ்டண்ட் அமைப்பு மற்றும் பிருந்தா, தினேஷ், காவ்யா.ஜி ஆகியோரின் நடன அமைப்புகள் படத்தின் தேவைக்கேற்ற வகையில் பணியாற்றியுள்ளன. தயாரிப்பு தரத்திலும் படம் ஒரு நேர்த்தியான தோற்றத்தைத் தக்க வைத்திருக்கிறது.
மொத்தத்தில், ‘ஹாய்’ பெரிய அளவிலான திருப்பங்களையோ, மிகவும் சிக்கலான காதல் கதையையோ எதிர்பார்க்காமல் சென்றால் ரசிக்கக்கூடிய ஒரு இலகுவான ரொமான்டிக் என்டர்டெய்னர். கவின் – நயன்தாரா கூட்டணியின் கெமிஸ்ட்ரி, அனுபவம் வாய்ந்த துணை நடிகர்களின் பங்களிப்பு, ஜென் மார்ட்டினின் இசை மற்றும் படத்தின் குடும்பப் பின்னணி ஆகியவை படத்தின் முக்கிய பலங்கள்.
காதல், நகைச்சுவை மற்றும் குடும்ப உணர்வுகளை கலந்து, அதிக சீரியஸான அணுகுமுறை இல்லாமல் ஒரு ஜாலியான திரை அனுபவத்தை வழங்க முயற்சிக்கும் ‘ஹாய்’, சில இடங்களில் இன்னும் ஆழமாகச் சென்றிருக்க வேண்டியிருந்தாலும், தனது எளிமையால் ரசிக்க வைக்கும் படமாக அமைந்துள்ளது.
தீர்ப்பு: காதல், காமெடி, குடும்ப உணர்வுகளுடன் ஒரு இலகுவான திரை அனுபவம்.
மதிப்பீடு : 3.5/5