சின்னத்திரை தயாரிப்பாளர்கள் சங்கத்தின் ஆண்டு பொதுக்குழுக் கூட்டத்தில், தயாரிப்பாளர்கள் எதிர்கொள்ளும் நிதி நெருக்கடிகள், தொலைக்காட்சி நிறுவனங்கள் வழங்கும் தொகையை உயர்த்த வேண்டிய அவசியம், சங்கத்திற்கான இடவசதி மற்றும் நிதி திரட்டுவதற்கான முயற்சிகள் உள்ளிட்ட பல்வேறு அம்சங்கள் குறித்து விவாதிக்கப்பட்டன. இதுகுறித்து சங்கத்தின் தலைவர் குஷ்பு சுந்தர் செய்தியாளர்களிடம் பேசினார்.
சின்னத்திரை தயாரிப்பாளர்கள் சங்கத்தின் ஆண்டு பொதுக்குழுக் கூட்டம் இன்று நடைபெற்றது. இக்கூட்டம் மிகவும் முக்கியத்துவம் வாய்ந்தது என்று தெரிவித்த நடிகையும் தயாரிப்பாளருமான குஷ்பு சுந்தர், தயாரிப்பாளர்கள் எதிர்கொள்ளும் பல்வேறு பிரச்சினைகள் குறித்தும் அவற்றுக்கான தீர்வுகள் குறித்தும் விரிவாக விவாதிக்கப்படுவதாகக் கூறினார். மேலும், பல்வேறு தீர்மானங்கள் எடுக்கப்பட்டு, அவற்றைச் சங்க உறுப்பினர்களிடம் எடுத்துரைக்கத் திட்டமிட்டுள்ளதாகவும் தெரிவித்தார்.
இன்றைய சூழலில் தொலைக்காட்சி இல்லாத வீடுகளே இல்லை என்ற நிலை உள்ளது. இருப்பினும், திரைக்கு முன்னால் இருப்பவர்களையே மக்கள் அதிகம் அறிந்திருக்கிறார்கள். திரைக்குப் பின்னால் இருந்து நிகழ்ச்சிகளையும் தொடர்களையும் உருவாக்கும் தயாரிப்பாளர்கள் எதிர்கொள்ளும் சிரமங்கள் பலருக்கும் தெரிவதில்லை. அந்தப் பிரச்சினைகளை வெளிப்படுத்தி, அவற்றுக்கான தீர்வுகளைப் பெறுவதே இக்கூட்டத்தின் முக்கிய நோக்கம் என்று குஷ்பு குறிப்பிட்டார்.
தற்போது சங்கத்தில் உள்ள பல தயாரிப்பாளர்கள் தொடர்களைத் தயாரித்து வருவதாகவும், சிலர் புதிய தொடர்களைத் தயாரிப்பதற்கான முயற்சிகளில் ஈடுபட்டு வருவதாகவும் தெரிவித்தார். தயாரிப்பாளர்கள் நலமாக இருந்தால்தான் சங்கமும் சிறப்பாகச் செயல்பட முடியும் என்றும், பொதுக்குழுக் கூட்டத்தில் ஏராளமான தயாரிப்பாளர்கள் பங்கேற்றிருப்பது தங்களுக்குப் பெரும் பலமாக இருப்பதாகவும் கூறினார்.
தயாரிப்பாளர்களின் முக்கியப் பிரச்சினை நிதி நெருக்கடி!
சின்னத்திரை தயாரிப்பாளர்கள் பொதுவாக எதிர்கொள்ளும் முக்கியமான பிரச்சினை நிதி சார்ந்தது என்று குஷ்பு தெரிவித்தார். அனைத்துப் பொருட்களின் விலைகளும் தொடர்ந்து உயர்ந்து வரும் நிலையில், தொலைக்காட்சி நிறுவனங்கள் தயாரிப்பாளர்களுக்கு வழங்கும் தொகை மட்டும் உயர்வதில்லை என்று சுட்டிக்காட்டினார்.
தொழிலாளர்களுக்கு மூன்று ஆண்டுகளுக்கு ஒருமுறை ஊதிய உயர்வு வழங்கப்படும் சூழலில், தயாரிப்பாளர்களுக்கு உரிய வகையில் தொகை உயர்த்தி வழங்கப்படுவதில்லை என்றும், இன்று வழங்கப்படும் அதே தொகை பத்து ஆண்டுகளுக்குப் பிறகும் தொடரும் நிலை இருப்பதாகவும் அவர் தெரிவித்தார்.
காய்கறிகள் உள்ளிட்ட அத்தியாவசியப் பொருட்களின் விலைகள் உயர்ந்து வரும் நிலையில், தொழிலாளர்களுக்கு ஊதிய உயர்வு வழங்க வேண்டிய பொறுப்பும் தயாரிப்பாளர்களுக்கு உள்ளது. இத்தகைய சூழலில், தயாரிப்பாளர்களுக்கான வருவாய் உயர்த்தப்படாவிட்டால் கூடுதல் செலவுகளை எவ்வாறு சமாளிக்க முடியும் என்ற கேள்வியையும் அவர் எழுப்பினார். இந்தப் பிரச்சினைகள் குறித்து பொதுக்குழுக் கூட்டத்தில் விரிவாக விவாதிக்கப்படுவதாகக் கூறினார்.
தயாரிப்பாளர்கள் எதிர்கொள்ளும் பிரச்சினைகளின்போது பெப்சி அமைப்பின் தலைவர் ஆர்.கே. செல்வமணி தொடர்ந்து ஆதரவளித்து வருவதாகவும், பிற சங்கங்களைச் சேர்ந்தவர்களும் தங்களுக்குப் பெரும் ஒத்துழைப்பு வழங்கி வருவதாகவும் குஷ்பு நன்றி தெரிவித்தார்.
சங்கத்திற்குத் தனி இடம் – முதலமைச்சருக்கு நன்றி!
சங்கத்தின் செயல்பாடுகளுக்கு நிதி தேவைப்படுவதாகக் குறிப்பிட்ட குஷ்பு, சங்கத்திற்கெனத் தனி இடம் ஒதுக்கித் தருமாறு தமிழக முதலமைச்சர் சி. ஜோசப் விஜயிடம் கோரிக்கை வைத்ததாகத் தெரிவித்தார். அதற்கான ஏற்பாடுகளைச் செய்து தருவதாக முதலமைச்சர் உறுதியளித்துள்ளதாகவும், இதற்காக அவருக்கு நன்றி தெரிவிப்பதாகவும் கூறினார்.
மேலும், தயாரிப்பாளர்கள் படப்பிடிப்பு நடத்துவதற்கான இட அனுமதியைப் பெறுவதில் பல்வேறு சிரமங்களை எதிர்கொள்வதாகத் தெரிவித்தார். இதற்குத் தீர்வாக, இணையவழியில் விண்ணப்பித்த மூன்று நாட்களுக்குள் படப்பிடிப்புக்கான அனுமதி கிடைக்கும் வகையில் நடைமுறையை ஏற்படுத்த வேண்டும் என்று கோரிக்கை விடுத்ததாகவும், அதற்கு ஒப்புதல் கிடைத்துள்ளதாகவும் கூறினார்.
தயாரிப்பாளர்கள் அமர்ந்து பணிகளை மேற்கொள்வதற்கான உரிய இடவசதி வேண்டும் என்ற கோரிக்கைக்கும் ஒப்புதல் அளிக்கப்பட்டுள்ளதாகத் தெரிவித்தார். தயாரிப்பாளர்களுக்கு மேலும் பல சலுகைகள் கிடைக்கும் என்று எதிர்பார்ப்பதாகவும் குறிப்பிட்டார்.
மலேசியாவில் கலை நிகழ்ச்சி – சிறப்பு விருந்தினராக சிம்பு!
சங்கத்திற்கான நிதியைத் திரட்டும் நோக்கில், அடுத்த ஆண்டு ஏப்ரல் மாதம் மலேசியாவில் கலை நிகழ்ச்சி ஒன்றை நடத்தத் திட்டமிட்டுள்ளதாகக் குஷ்பு தெரிவித்தார். இந்த நிகழ்ச்சியில் சிறப்பு விருந்தினராகப் பங்கேற்க நடிகர் சிலம்பரசன் டி.ஆர். (STR) ஒப்புக்கொண்டுள்ளதாகவும், தயாரிப்பாளர்களுக்கு ஆதரவாக இருப்பதாக அவர் உறுதியளித்துள்ளதாகவும் கூறினார்.
சங்கத்தில் உறுப்பினர்களின் எண்ணிக்கையை அதிகரிப்பதற்காகத் தொலைக்காட்சி நிறுவனங்களுடன் பேச்சுவார்த்தை நடத்த வேண்டியுள்ளதாகவும் தெரிவித்தார். தயாரிப்பாளர்களின் பிரச்சினைகளுக்குத் தீர்வு காணும் வகையில், பிற துறைகளைச் சேர்ந்தவர்களும் ஆதரவளிக்க வேண்டும் என்றும், அவர்களுக்குத் தேவையான சலுகைகள் வழங்கப்பட வேண்டும் என்றும் வலியுறுத்தினார்.
ஓ.டி.டி. தளங்கள் தொடர்பான கேள்விக்குப் பதிலளித்த அவர், சின்னத்திரை தயாரிப்பாளர்கள் சங்கத்தைப் பொறுத்தவரையில், ஓ.டி.டி. தளங்கள் ஏற்கெனவே தங்களுடன் இணைந்து செயல்பட்டு வருவதாகவும், அந்தத் தளங்களைச் சேர்ந்த உறுப்பினர்களும் சங்கத்தில் இருப்பதாகவும் தெரிவித்தார்.
சின்னத்திரையில் இருந்து வெள்ளித்திரைக்கு வளரும் கலைஞர்கள்!
கலைஞர்களின் வளர்ச்சி குறித்துப் பேசிய குஷ்பு, ஒரு குறிப்பிட்ட தொடரில் மட்டுமே நடிக்க வேண்டும் என்று கலைஞர்களைக் கட்டாயப்படுத்த முடியாது என்றார். விஜய் சேதுபதி, சிவகார்த்திகேயன் உள்ளிட்ட கலைஞர்கள் பல்வேறு பின்னணிகளில் இருந்து வளர்ந்து வந்து இன்று திரைத்துறையில் முக்கிய இடத்தைப் பிடித்திருப்பதைச் சுட்டிக்காட்டினார்.
சின்னத்திரையும் கலைஞர்களின் வளர்ச்சியில் முக்கியப் பங்கு வகிப்பதாகக் குறிப்பிட்ட அவர், சின்னத்திரையில் இருந்து தொடங்கி பெரிய நட்சத்திரங்களாக உயர்ந்தவர்கள் மீண்டும் சின்னத்திரைக்குத் தங்களது ஆதரவை வழங்குவது மகிழ்ச்சியளிப்பதாகவும், இது சின்னத்திரைக்குக் கிடைத்த பெருமை என்றும் தெரிவித்தார்.
செயற்கை நுண்ணறிவைத் தவறாகப் பயன்படுத்துவது கண்டிக்கத்தக்கது!
செயற்கை நுண்ணறிவுத் தொழில்நுட்பத்தின் பயன்பாடு குறித்துப் பேசிய குஷ்பு, ஒவ்வொரு தொழில்நுட்பத்திலும் சாதகமான மற்றும் பாதகமான அம்சங்கள் இருப்பதாகக் கூறினார். தொழில்நுட்பத்தை எவ்வாறு பயன்படுத்துகிறோம் என்பதே முக்கியம் என்றும் தெரிவித்தார்.
குறிப்பாக, பெண்களைப் பாதிக்கும் வகையில் செயற்கை நுண்ணறிவைப் பயன்படுத்திப் போலியான காணொளிகளை உருவாக்குவது கடுமையாகக் கண்டிக்கத்தக்கது என்று அவர் கூறினார். ஒரு பெண்ணாகவோ, நடிகையாகவோ அல்லது வேறு எந்தத் துறையைச் சேர்ந்தவராகவோ இருந்தாலும், மற்றவர்களைப் பாதிக்கும் வகையில் இத்தகைய தொழில்நுட்பத்தைப் பயன்படுத்துவதற்கு முன்பு அதன் விளைவுகளைச் சிந்தித்துப் பார்க்க வேண்டும் என்று வலியுறுத்தினார்.
தங்களது குடும்பத்தில் உள்ள பெண்களைப் பாதிக்கும் வகையில் இதுபோன்ற காணொளிகள் உருவாக்கப்பட்டால் ஏற்படும் மனவேதனையை உணர்ந்தால்தான், இத்தகைய செயல்களின் தீவிரத்தைப் புரிந்துகொள்ள முடியும் என்றும் செய்தியாளர்களிடம் தெரிவித்தார்.
சின்னத்திரை தயாரிப்பாளர்கள் சங்கத்தின் ஆண்டு பொதுக்குழுக் கூட்டத்தில் பெப்சி தலைவர் ஆர்.கே. செல்வமணி, பெப்சி செயலாளர் சுவாமிநாதன், சின்னத்திரை இயக்குநர்கள் சங்கத் தலைவர் மங்கை ஹரிராஜன், இயக்குநர் தளபதி, சின்னத்திரை நடிகர் சங்கத் தலைவர் பாரத், சின்னத்திரை எழுத்தாளர் சங்கத் தலைவர் பத்ரி உள்ளிட்டோர் சிறப்பு விருந்தினர்களாகக் கலந்துகொண்டனர்.
மேலும், STEPS சங்கத்தின் தலைவர் குஷ்பு சுந்தர், செயலாளர் குட்டி பத்மினி, பொருளாளர் ஆர்.டி. பாலேஷ்வர், நிறுவன உறுப்பினர் அழகன் தமிழ்மணி, ஆலோசனைக் குழு உறுப்பினர்கள் ஒய்.ஜி. மகேந்திரா, சுஜாதா விஜயகுமார், முரளிராமன், துணைத் தலைவர்கள் அபு பாக்கர் சித்திக், டி.வி. சங்கர், துணைச் செயலாளர்கள் மதிஒளி குமார், மாலினி ஜெயச்சந்திரன், ஏ.எச். ஷெரீஃப் மற்றும் புஷ்பா கந்தசாமி உள்ளிட்ட பல தயாரிப்பாளர்கள் கலந்துகொண்டனர்.
தயாரிப்பாளர்களின் நிதிச் சிக்கல்களுக்குத் தீர்வு காண்பது, சங்கத்திற்கான நிதி மற்றும் இடவசதியைப் பெறுவது, படப்பிடிப்பு அனுமதிகளை எளிமைப்படுத்துவது உள்ளிட்ட கோரிக்கைகள் இக்கூட்டத்தில் முக்கியத்துவம் பெற்றன.