இயக்குநர் மீரா கதிரவன் இயக்கத்தில் உருவான ‘ஹபீபி’ திரைப்படத்தின் படக்குழுவினரைப் பாராட்டி, கில்ட் தமிழ் திரைப்படத் தயாரிப்பாளர்கள் சங்கம் சார்பில் சென்னையில் சிறப்பு நிகழ்ச்சி நடைபெற்றது. திரையுலகப் பிரபலங்கள் பங்கேற்ற இந்நிகழ்வில், படத்தின் சிறப்புத் திரையிடலும் நடைபெற்றது. தயாரிப்பாளர்கள், இயக்குநர்கள் மற்றும் கலைஞர்கள் கலந்துகொண்டு படத்தின் கதைக்களம், கலாசாரப் பதிவு மற்றும் படைப்புக் குழுவினரின் உழைப்பைப் பாராட்டினர்.
ரோமியோ பிக்சர்ஸ், நேசம் என்டர்டெயின்மென்ட் பிரைவேட் லிமிடெட் மற்றும் ஜிகேஎஸ் பிரதர்ஸ் புரொடக்ஷன் ஆகிய நிறுவனங்கள் இணைந்து தயாரித்துள்ள ‘ஹபீபி’ திரைப்படத்தில் கஸ்தூரி ராஜா, ஈசா, மாளவிகா மனோஜ், தனஸ்ரீ சுதாகரன், அனுஸ்ரேயா ராஜன், அருள்குமார் உள்ளிட்டோர் நடித்துள்ளனர். சாம் சி.எஸ் இசையமைத்துள்ள இப்படத்திற்கு மகேஷ் முத்துசாமி ஒளிப்பதிவு செய்துள்ளார்.
1980-களில் தொடங்கி நிகழ்காலம் வரையிலான ஒரு குடும்பத்தின் வாழ்க்கைப் பயணத்தைச் சொல்லும் இப்படம், தென் தமிழகத்தின் தமிழ் முஸ்லிம் மக்களின் கலாசாரம், நம்பிக்கைகள், குடும்ப உறவுகள், காதல், ஆசைகள் மற்றும் கைத்தறி நெசவுத் தொழிலின் பின்னணியில் ஏற்படும் வாழ்க்கை மாற்றங்களைப் பதிவு செய்துள்ளது. திரையரங்குகளில் வெளியான இப்படம் தற்போது சோனி லிவ் ஓடிடி தளத்திலும் வெளியாகியுள்ளது. படத்தின் 125-வது நாள் வரவேற்பைத் தொடர்ந்து படக்குழுவினரைப் பாராட்டும் நிகழ்ச்சி நடைபெற்றதாகத் தெரிவிக்கப்பட்டது.
கில்ட் தயாரிப்பாளர்கள் சங்கத்தின் சார்பில் சக்கரவர்த்தி பேசுகையில், ‘ஹபீபி’ ஒரு காவியத்தைப் போன்ற படைப்பு என்றும், இத்தகைய திரைப்படங்களை உருவாக்கிய இயக்குநர் மற்றும் படக்குழுவினரைப் பாராட்டுவது பெருமை அளிப்பதாகவும் தெரிவித்தார். மத வேறுபாடுகளைக் கடந்து மனிதநேயத்துடனும் அன்புடனும் அனைவரும் ஒன்றிணைந்து வாழ வேண்டும் என்ற கருத்தை இப்படம் உணர்வுபூர்வமாக எடுத்துரைப்பதாகக் குறிப்பிட்ட அவர், இதுபோன்ற படைப்புகளுக்கு அதிக அங்கீகாரம் கிடைக்க வேண்டும் என்றும் வாழ்த்தினார்.
பத்திரிகையாளரும் இயக்குநருமான கோடங்கி பேசுகையில், ஒரு நல்ல திரைப்படத்தை உருவாக்குவதற்குப் பின்னால் இருக்கும் தயாரிப்பாளர், இயக்குநர் மற்றும் நடிகர்களின் போராட்டங்களைப் புரிந்துகொண்டு அவர்களை உரிய நேரத்தில் பாராட்டுவது அவசியம் என்றார். ‘ஹபீபி’ படத்தில் கஸ்தூரி ராஜா தனது கதாபாத்திரத்தை உள்வாங்கி இயல்பாக நடித்திருப்பதைப் பாராட்டிய அவர், சிறிய முதலீட்டில் உருவாகும் தரமான திரைப்படங்களுக்கும் போதிய அங்கீகாரமும் திரையரங்கு வாய்ப்புகளும் கிடைக்க வேண்டும் என வலியுறுத்தினார். மத அடையாளங்களைத் தாண்டி அன்பையும் மனித உறவுகளையும் பேசும் படைப்புகளைத் திரையுலகினர் கொண்டாட வேண்டும் என்றும் தெரிவித்தார்.
தயாரிப்பாளர் கோவை இப்ராஹிம் பேசுகையில், தங்களது திரைப்படத்தைப் பாராட்டி அங்கீகாரம் வழங்கிய கில்ட் சங்கத்தினருக்கு நன்றி தெரிவித்தார். இதுபோன்ற பாராட்டு விழாக்கள் தயாரிப்பாளர்கள் தொடர்ந்து திரைப்படங்களை உருவாக்குவதற்கு ஊக்கமளிப்பதாகக் குறிப்பிட்ட அவர், விரைவில் தங்களது அடுத்த திரைப்படம் குறித்த அறிவிப்புடன் சந்திப்பதாகவும் தெரிவித்தார்.
தயாரிப்பாளர் சாகுல் ஹமீத் பேசுகையில், தரமான திரைப்படங்களை மக்களிடம் கொண்டு சேர்ப்பதே இத்தகைய நிகழ்ச்சிகளின் முக்கிய நோக்கம் என்றார். ‘ஹபீபி’ திரைப்படம் இயக்குநர் மீரா கதிரவனின் நீண்டகாலக் கனவு என்றும், அந்தக் கனவை நனவாக்க அவர் சுமார் ஐந்து ஆண்டுகளாகக் கடுமையாக உழைத்ததாகவும் குறிப்பிட்டார். படத்தை உருவாக்குவதில் தயாரிப்பு நிறுவனங்கள் வழங்கிய பங்களிப்பையும் அவர் பாராட்டினார்.
மேலும், குறைந்த முதலீட்டில் உருவாகும் திரைப்படங்களுக்குத் திரையரங்குகள் கிடைப்பதில் நிலவும் சவால்களைச் சுட்டிக்காட்டிய அவர், ‘ஹபீபி’ திரைப்படம் நான்கு வாரங்கள் திரையரங்குகளில் ஓடியபோதிலும், பல பகுதிகளில் படத்தை வெளியிடுவதற்கான வாய்ப்புகள் குறைந்ததாகக் கூறினார். பெரிய பட்ஜெட் படங்களின் தொடர் வெளியீடுகளால் சிறிய படங்களுக்குக் கிடைக்கும் திரையரங்கு வாய்ப்புகள் பாதிக்கப்படுவதாகவும், இதற்குத் தீர்வு காணத் திரைப்படத் துறை சங்கங்கள் முன்வர வேண்டும் என்றும் வலியுறுத்தினார்.
நடிகர் கஸ்தூரி ராஜா பேசுகையில், ‘ஹபீபி’ திரைப்படத்திற்காகப் பல்வேறு இடங்களில் நடைபெற்ற நிகழ்ச்சிகளில் பங்கேற்ற அனுபவத்தையும், தொடர்ந்து கிடைத்து வரும் பாராட்டுகளையும் பகிர்ந்துகொண்டார். படத்தில் தனது நடிப்புக்குக் கிடைக்கும் பாராட்டுகளுக்குக் காரணம் இயக்குநர் மீரா கதிரவனின் வழிகாட்டுதல்தான் என்று குறிப்பிட்டார்.
சுமார் 48 ஆண்டுகளாகத் திரைத்துறையில் இருக்கும் தமக்கு, இந்தப் படத்தின் கதையும் திரைக்கதையும் தனித்துவமான அனுபவத்தை அளித்ததாகக் கூறிய அவர், ஆரம்பத்தில் நடிப்பதில் தயக்கம் இருந்தபோதிலும், திரைக்கதையைப் படித்த பிறகு அதன் சிறப்பை உணர்ந்து நடிக்க ஒப்புக்கொண்டதாகத் தெரிவித்தார். படப்பிடிப்பில் அனைவரும் சமமாக நடத்தப்பட்டதையும் பாராட்டினார். ‘ஹபீபி’ திரைப்படம் தனக்கு மீண்டும் புதிய அடையாளத்தையும் மகிழ்ச்சியையும் அளித்துள்ளதாகக் குறிப்பிட்ட அவர், இயக்குநர் உள்ளிட்ட படக்குழுவினர் அனைவருக்கும் நன்றி தெரிவித்தார்.
இயக்குநர் மீரா கதிரவன் பேசுகையில், ‘ஹபீபி’ திரைப்படத்திற்குத் தொடர்ந்து கிடைத்து வரும் பாராட்டுகள் படக்குழுவினருக்கு மிகுந்த மகிழ்ச்சியையும் ஊக்கத்தையும் அளிப்பதாகத் தெரிவித்தார். எழுத்தாளர்கள், மகளிர் அமைப்புகள், இஸ்லாமிய அமைப்புகள் மற்றும் பல்வேறு சமூக அமைப்புகள் படத்தைப் பாராட்டியுள்ள நிலையில், தயாரிப்பாளர்கள் ஒன்றிணைந்து பாராட்டுவது தனக்கு முக்கியமான தருணம் என்றார். தயாரிப்பாளர்களின் ஆதரவு இல்லையென்றால் தனது கதை திரைக்கதையாக மட்டுமே இருந்திருக்கும் என்றும் குறிப்பிட்டார்.
தமிழ் சினிமாவின் நீண்ட வரலாற்றில் தமிழ்நாட்டின் பல்வேறு பகுதிகளைச் சேர்ந்த மக்களின் வாழ்வியலும் திரையில் பதிவாகியுள்ளதாகக் கூறிய அவர், அதேபோல் தமிழைத் தாய்மொழியாகக் கொண்டு வாழும் தமிழ் முஸ்லிம் மக்களின் கலாசாரம் மற்றும் வாழ்க்கை முறையைப் பேசும் படைப்பாக ‘ஹபீபி’ உருவாகியுள்ளதாகத் தெரிவித்தார்.
இந்தப் படத்தின் உருவாக்கத்தில் வி.எஸ். முஹம்மத் அமீனின் பங்களிப்பு மிக முக்கியமானது என்று குறிப்பிட்ட மீரா கதிரவன், இஸ்லாமிய வாழ்வியலை மையமாகக் கொண்ட திரைப்படத்தை உருவாக்க வேண்டும் என்ற எண்ணம் தனக்கு சுமார் 20 ஆண்டுகளாக இருந்ததாகவும், அந்தக் கனவை நனவாக்க அமீன் பெரிதும் உதவியதாகவும் கூறினார். படத்தில் நடித்த கஸ்தூரி ராஜா உள்ளிட்ட நடிகர்கள், தொழில்நுட்பக் கலைஞர்கள், உதவி இயக்குநர்கள் மற்றும் தயாரிப்பு நிறுவனங்கள் அனைவருக்கும் தனது நன்றியைத் தெரிவித்தார்.
தமிழ் முஸ்லிம் மக்களின் அன்றாட வாழ்வியல், கலாசாரம், குடும்ப உறவுகள் மற்றும் மனிதநேயத்தை மையமாகக் கொண்டு உருவான ‘ஹபீபி’ திரைப்படத்தைப் பாராட்டும் விதமாக நடைபெற்ற இந்த நிகழ்ச்சி, தரமான திரைப்படங்களுக்கும் அவற்றை உருவாக்கும் கலைஞர்களுக்கும் உரிய அங்கீகாரம் வழங்கப்பட வேண்டும் என்ற கருத்தை வலியுறுத்தும் நிகழ்வாக அமைந்தது.