ஜி.வி. பிரகாஷ் குமார், கயாடு லோஹர் நடிப்பில் உருவாகியுள்ள காதல், மர்மம் மற்றும் அமானுஷ்யத் திகில் திரைப்படமான ‘இம்மார்டல்’ (Immortal), வரும் அக்டோபர் 30, 2026 அன்று Sony LIV ஓடிடி தளத்தில் வெளியாகிறது. அறிமுக இயக்குநர் மாரியப்பன் சின்னா எழுதி இயக்கியுள்ள இப்படம் தமிழ், தெலுங்கு, மலையாளம், கன்னடம், இந்தி என ஐந்து மொழிகளில் பிரீமியராகிறது.
எதிர்பாராத சந்திப்பு, மர்மமான பெண், மறைக்கப்பட்ட ரகசியங்கள் எனப் பல திருப்பங்களுடன் உருவாகியுள்ள ‘இம்மார்டல்’ திரைப்படம், சென்னையைப் பின்னணியாகக் கொண்டு அமைந்துள்ளது.
அச்சகத்தில் வேலை செய்யும் மாகி (ஜி.வி. பிரகாஷ் குமார்), குறைந்த வாடகையில் தங்குவதற்கு ஓர் இடத்தைத் தேடுகிறார். அப்போது சிந்து (கயாடு லோஹர்) என்ற மர்மமான பெண்ணைச் சந்திக்கிறார். தனது ஆடம்பரமான வீட்டில் ஓர் அறையை மிகவும் குறைந்த வாடகைக்கு வழங்குவதாகச் சிந்து கூறுகிறார். முதலில் நல்ல வாய்ப்பாகத் தோன்றும் இந்தச் சந்திப்பு, அடுத்தடுத்து நிகழும் மர்மமான சம்பவங்களால் அச்சத்தை ஏற்படுத்துகிறது.
சிந்துவின் வாழ்க்கையில் மறைந்திருக்கும் ரகசியங்களை மாகி கண்டறியத் தொடங்கும்போது, அவர் எதிர்பாராத பல உண்மைகள் வெளிப்படுகின்றன. ஆர்வம், பயம், குழப்பம் எனப் பல்வேறு உணர்வுகளுக்கு இடையே பயணிக்கும் மாகியின் கதை, பார்வையாளர்களுக்கும் மர்மம் நிறைந்த அனுபவத்தை வழங்கும் வகையில் அமைந்துள்ளது.
மாகி கதாபாத்திரம் குறித்து ஜி.வி. பிரகாஷ் குமார்!
இப்படத்தில் தனது கதாபாத்திரம் குறித்து ஜி.வி. பிரகாஷ் குமார் கூறுகையில், “மாகி நம்மைப் போன்ற ஒரு சாதாரண மனிதர். அவர் எதிர்பாராத ஒரு சூழ்நிலையில் சிக்கிக்கொள்கிறார். இந்தக் கதாபாத்திரத்தில் எனக்குப் பிடித்த விஷயம் என்னவென்றால், பார்வையாளர்களைப் போலவே மாகியும் ஒவ்வொரு விஷயத்தையும் புதிதாகக் கண்டுபிடிக்கிறார்.
அவரது பயணத்தில் ஆர்வம், பயம், குழப்பம் எனப் பல உணர்வுகள் இடம்பெறுகின்றன. அதனால் இந்தக் கதாபாத்திரம் எனக்கு மிகவும் சுவாரஸ்யமாக இருந்தது. இப்போது Sony LIV-ல் ரசிகர்கள் இப்படத்தைப் பார்த்து அதன் மர்மத்தைத் தெரிந்துகொள்ளப் போவது மிகவும் மகிழ்ச்சியாக இருக்கிறது” என்றார்.
ஜி.வி. பிரகாஷ் குமார், கயாடு லோஹர் ஆகியோருடன் டி.எம். கார்த்திக், குமார் நடராஜன், லொள்ளு சபா மாறன், ஆதித்யா கதிர், அர்ஷு மகாராஜன், பெமா சாம்சோ, சுனிதா ஸ்ரேஸ்தைன் உள்ளிட்டோர் முக்கிய கதாபாத்திரங்களில் நடித்துள்ளனர்.
காதல், மர்மம், அமானுஷ்யத் திகில் ஆகிய அம்சங்களை ஒன்றிணைத்துள்ள ‘இம்மார்டல்’ திரைப்படம், அக்டோபர் 30-ம் தேதி Sony LIV ஓடிடி தளத்தில் வெளியாகிறது. ஐந்து மொழிகளில் வெளியாகவுள்ள இப்படம் ரசிகர்களிடையே எதிர்பார்ப்பை ஏற்படுத்தியுள்ளது.