‘பனி’ படத்தின் வெற்றியைத் தொடர்ந்து, நடிகர் ஜோஜு ஜார்ஜ் எழுதி இயக்கும் புதிய திரைப்படமான ‘பரிபாடி’ படத்தின் ஃபர்ஸ்ட் லுக் போஸ்டர் அதிகாரப்பூர்வமாக வெளியாகியுள்ளது. காவ்யா ஃபிலிம் கம்பெனி சார்பில் வேணு குன்னப்பள்ளி தயாரிக்கும் இப்படம், பிரம்மாண்டமான பொருட்செலவில் உருவாகியுள்ளது. மலையாளம், தமிழ், தெலுங்கு, இந்தி, கன்னடம் என ஐந்து மொழிகளில் இப்படம் வெளியாகவுள்ளது.
இப்படத்தில் ஜோஜு ஜார்ஜ் கதாநாயகனாக நடிக்கிறார். அவருடன் சுமார் 100 புதிய முகங்கள் முக்கியமான வசனக் கதாபாத்திரங்களில் அறிமுகமாகின்றனர். கேமராவுக்கு முன்பு நடிப்பதற்கு முன்பாக, இந்தப் புதிய நடிகர்கள் சுமார் நான்கு மாதங்கள் சிறப்புப் பயிற்சி பெற்றுள்ளனர் என்பது படத்தின் மீதான எதிர்பார்ப்பை அதிகரித்துள்ளது.
திரிசூர் பகுதியைப் பின்னணியாகக் கொண்டு உருவாகும் இப்படத்தின் பெரும்பாலான காட்சிகள் சாலக்குடியில் படமாக்கப்பட்டுள்ளன. ரசிகர்களுக்கு முற்றிலும் மாறுபட்ட திரையரங்கு அனுபவத்தை வழங்கும் நோக்கில் பிரம்மாண்டமாக உருவாக்கப்பட்டுள்ள இப்படத்தின் போஸ்ட் புரொடக்ஷன் பணிகள் தற்போது தீவிரமாக நடைபெற்று வருகின்றன. வரும் டிசம்பர் மாதம் இப்படம் உலகம் முழுவதும் திரையரங்குகளில் வெளியாகும் என அறிவிக்கப்பட்டுள்ளது.
‘பரிபாடி’ படத்தின் தொழில்நுட்பக் குழுவிலும் இந்திய சினிமாவின் முன்னணி கலைஞர்கள் இணைந்துள்ளனர். புகழ்பெற்ற ஒளிப்பதிவாளர் ராஜீவ் ரவி ஒளிப்பதிவு செய்ய, தமிழ் சினிமாவின் முன்னணி இசையமைப்பாளரான யுவன் ஷங்கர் ராஜா இசையமைக்கிறார். இதன் மூலம் யுவன் ஷங்கர் ராஜா மலையாளத் திரையுலகில் இசையமைப்பாளராக அறிமுகமாகிறார். மேலும், தென்னிந்தியாவின் பிரபல சண்டைப் பயிற்சி இயக்குநர்களான அன்பறிவ் மாஸ்டர்ஸ் சண்டைக் காட்சிகளை வடிவமைத்துள்ளனர். மனு ஆண்டனி படத்தொகுப்புப் பணிகளையும், அஜயன் அதத் ஒலி வடிவமைப்புப் பணிகளையும் மேற்கொள்கின்றனர்.
2024-ஆம் ஆண்டு வெளியாகி பாக்ஸ் ஆஃபீஸில் வெற்றி பெற்றதுடன் ரசிகர்களின் பாராட்டுகளையும் பெற்ற ‘பனி’ திரைப்படத்திற்குப் பிறகு, ஜோஜு ஜார்ஜ் இயக்கும் இரண்டாவது படம் ‘பரிபாடி’. ‘மாலிகாபுறம்’, ‘2018’, ‘ரேகாசித்திரம்’, ‘ஆடு 3’ உள்ளிட்ட படங்களைத் தயாரித்த காவ்யா ஃபிலிம் கம்பெனி இப்படத்தைத் தயாரித்துள்ளது.
ஜோஜு ஜார்ஜின் இயக்கம், யுவன் ஷங்கர் ராஜாவின் இசை, ராஜீவ் ரவியின் ஒளிப்பதிவு மற்றும் சுமார் 100 புதிய நடிகர்களின் பங்களிப்பு எனப் பல அம்சங்களுடன் உருவாகியுள்ள ‘பரிபாடி’, ஃபர்ஸ்ட் லுக் வெளியீட்டைத் தொடர்ந்து ரசிகர்களிடையே எதிர்பார்ப்பை ஏற்படுத்தியுள்ளது.