“வித்யுத் ஜாம்வால் தல்சிம் கதாபாத்திரத்திற்கு நியாயம் சேர்த்துள்ளார்” – ‘ஸ்ட்ரீட் ஃபைட்டர்’ இயக்குநர் கிட்டாவ் சக்குராய் பாராட்டு!

பாரமவுண்ட் பிக்சர்ஸ் மற்றும் லெஜண்டரி என்டர்டெயின்மென்ட் இணைந்து தயாரித்துள்ள ‘ஸ்ட்ரீட் ஃபைட்டர்’ திரைப்படத்தில், நடிகர் வித்யுத் ஜாம்வால் தல்சிம் கதாபாத்திரத்தில் நடித்துள்ளார். கேப்காம் (CAPCOM) நிறுவனத்தின் புகழ்பெற்ற வீடியோ கேம் தொடரை அடிப்படையாகக் கொண்டு உருவாகியுள்ள இப்படத்தின் மூலம் வித்யுத் ஜாம்வால் ஹாலிவுட்டில் அறிமுகமாகிறார். இந்நிலையில், இப்படத்தின் இயக்குநர் கிட்டாவ் சக்குராய், வித்யுத் ஜாம்வாலின் நடிப்பு மற்றும் தல்சிம் கதாபாத்திரத்திற்கான அவரது அர்ப்பணிப்பைப் பாராட்டியுள்ளார்.

உலகம் முழுவதும் பிரபலமான ‘ஸ்ட்ரீட் ஃபைட்டர்’ வீடியோ கேம் தொடரில் முக்கியமான கதாபாத்திரங்களில் ஒன்றாகத் தல்சிம் விளங்குகிறார். இந்தக் கதாபாத்திரத்தைத் திரைப்படத்தில் இடம்பெறச் செய்வது குறித்து படக்குழுவினருக்கு ஆரம்பத்தில் சில தயக்கங்கள் இருந்ததாக இயக்குநர் தெரிவித்துள்ளார். இருப்பினும், தல்சிம் இல்லாமல் ‘ஸ்ட்ரீட் ஃபைட்டர்’ திரைப்படம் முழுமையடையாது என்பதில் தான் உறுதியாக இருந்ததாகவும், ரசிகர்கள் கொண்டாடும் வகையில் அந்தக் கதாபாத்திரத்தைத் திரையில் கொண்டுவர விரும்பியதாகவும் அவர் குறிப்பிட்டுள்ளார்.

தல்சிம் கதாபாத்திரத்தில் வித்யுத் ஜாம்வால் ஒப்பந்தமானது படத்திற்கு ஒரு புதிய பரிமாணத்தைச் சேர்த்ததாக இயக்குநர் தெரிவித்துள்ளார். தற்காப்புக் கலைகளில் வித்யுத் கொண்டுள்ள நிபுணத்துவம், அவரது உடல் திறன் மற்றும் கதாபாத்திரத்தின் மீதான புரிதல் ஆகியவை தல்சிமைத் திரையில் உயிர்ப்புடன் வெளிப்படுத்த உதவியதாகவும் அவர் கூறியுள்ளார்.

மேலும், தல்சிமின் பூர்வீகப் பின்னணி, தோற்றம் மற்றும் கதையின் அடிப்படையை உலகெங்கிலும் உள்ள ரசிகர்களிடம் கொண்டு சேர்க்கும் வாய்ப்பாக இந்தப் படத்தைப் பயன்படுத்த விரும்பியதாக வித்யுத் ஜாம்வால் தெரிவித்ததை இயக்குநர் சுட்டிக்காட்டியுள்ளார்.

வித்யுத் ஜாம்வாலின் பங்களிப்பைப் பாராட்டிய இயக்குநர் கிட்டாவ் சக்குராய், “தல்சிம் கதாபாத்திரத்தை வித்யுத் முழுமையாகத் தன்வசப்படுத்திக் கொண்டுள்ளார். அந்தக் கதாபாத்திரத்திற்கு அவர் நியாயம் சேர்த்துள்ளார் என்பதை ரசிகர்கள் திரையில் பார்ப்பார்கள்” என்று தெரிவித்துள்ளார்.

வித்யுத் ஜாம்வாலின் தற்காப்புக் கலைத் திறமையும், தல்சிம் கதாபாத்திரத்துடனான அவரது தனிப்பட்ட தொடர்பும் இணைந்து, ‘ஸ்ட்ரீட் ஃபைட்டர்’ திரைப்படத்தில் ரசிகர்களுக்குப் புதிய அனுபவத்தை வழங்கும் எனப் படக்குழுவினர் எதிர்பார்க்கின்றனர்.

பாரமவுண்ட் பிக்சர்ஸ் வெளியிட்டுள்ள ‘ஸ்ட்ரீட் ஃபைட்டர்’ திரைப்படம் இந்தியா முழுவதும் ஆங்கிலம், இந்தி, தமிழ் மற்றும் தெலுங்கு மொழிகளில் திரையரங்குகளில் வெளியாகியுள்ளது. அதிரடி சண்டைக் காட்சிகளும், விறுவிறுப்பான ஆக்‌ஷன் அம்சங்களும் நிறைந்த இப்படம், வீடியோ கேம் ரசிகர்கள் மற்றும் ஆக்‌ஷன் திரைப்பட ரசிகர்களிடையே எதிர்பார்ப்பை ஏற்படுத்தியுள்ளது.