புராணம், மாயாஜாலம், சாகசம்… பிரம்மாண்டமாகத் தொடங்கிய சந்தீப் கிஷனின் ‘கரிகாலா’!

நடிகர் சந்தீப் கிஷன் நடிப்பில், இயக்குநர் உகந்தர் முனி இயக்கத்தில் உருவாகும் பான்-இந்தியா திரைப்படமான ‘கரிகாலா’, திரையுலகப் பிரபலங்கள் முன்னிலையில் நடைபெற்ற பாரம்பரிய பூஜையுடன் பிரம்மாண்டமாகத் தொடங்கியது. ஷைனிங் பிக்சர்ஸ் சார்பில் மஹிதர் ரெட்டி மற்றும் ராஜசேகர் அன்னபிமோஜு தயாரிக்கும் இப்படம், புராணம், கற்பனை, சாகசம் மற்றும் சமூகக் கூறுகளை உள்ளடக்கிய பிரம்மாண்டமான படைப்பாக உருவாகிறது. கேத்ரின் தெரசா, சாக்ஷி மடோல்கர் மற்றும் காயத்ரி பரத்வாஜ் ஆகியோர் கதாநாயகிகளாக நடிக்கின்றனர்.

படத்தின் தொடக்க விழாவில் தயாரிப்பாளர் ராஜசேகரின் தாயார் சத்யவதி கேமராவை இயக்கிப் படப்பிடிப்பைத் தொடங்கி வைத்தார். தயாரிப்பாளர் மஹிதர் ரெட்டியின் தாயார் பத்மா ரெட்டி கிளாப் அடித்தார். நடிகர் ஆதி சாய்குமார் முதல் காட்சியை இயக்கினார். தயாரிப்பாளர் ராஜசேகர் அன்னபிமோஜுவின் தந்தை வீர பிரம்ம சாரி, படத்தின் திரைக்கதையைப் படக்குழுவினரிடம் வழங்கினார்.

விழாவில் பேசிய நடிகர் சந்தீப் கிஷன், இயக்குநர் உகந்தர் முனி மற்றும் தயாரிப்பாளர்களின் மீது நம்பிக்கை தெரிவித்ததுடன், இப்படத்தில் பணியாற்றுவது மகிழ்ச்சியளிப்பதாகக் கூறினார். “இரண்டு பாகங்களாக உருவாகும் இந்தப் பிரம்மாண்டமான கதையை அவர்கள் விவரித்தபோதே எனக்கு மிகவும் பிடித்துவிட்டது. பட்ஜெட்டில் எந்தவித சமரசமும் செய்யாமல், பிரம்மாண்டமான காலகட்டப் பின்னணியில் ஒரு சிறந்த திரையரங்க அனுபவத்தை வழங்க வேண்டும் என்ற தயாரிப்பாளர்களின் ஆர்வம் என்னை ஊக்கப்படுத்துகிறது. இசையமைப்பாளர் ஸ்ரீசரண் பகாலா இந்தப் படத்திற்காகச் சிறப்பான இசை ஆல்பத்தை உருவாக்கியிருக்கிறார். ‘கரிகாலா’ மற்றும் ‘பவர் பெட்’ ஆகிய படங்கள் எனது திரைப்பயணத்தின் முக்கியமான படைப்புகளாக இருக்கும் என்று நம்புகிறேன்” என்றார்.

இயக்குநர் உகந்தர் முனி பேசுகையில், ‘ஷம்பாலா’ படத்தைவிடப் பல மடங்கு பிரம்மாண்டமான முயற்சியாக ‘கரிகாலா’ உருவாகி வருவதாகத் தெரிவித்தார். “என் மீது நம்பிக்கை வைத்த தயாரிப்பாளர்களுக்கும் சந்தீப் கிஷனுக்கும், கதாநாயகிகளான சாக்ஷி, காயத்ரி மற்றும் கேத்ரின் ஆகியோருக்கும் நன்றி. இந்தப் படத்தின் மூலம் முற்றிலும் புதுமையான கற்பனை உலகத்தை உருவாக்கவுள்ளோம். அரசர்கள், சிங்கங்கள், மாயாஜாலங்கள், ஓநாய்கள், நாகலோகம் எனப் பல சுவாரஸ்யமான அம்சங்கள் இதில் இடம்பெறும். சந்தமாமா கதைகளை நினைவூட்டும் வகையில் அழகான தேவதைக் கதையாக இப்படம் இருக்கும். இது மிகப்பெரிய கதை என்பதால் இரண்டு பாகங்களாக உருவாகிறது. இரு பாகங்களுக்குமான படப்பிடிப்பையும் ஒரே நேரத்தில் நடத்தத் திட்டமிட்டுள்ளோம்” என்றார்.

தயாரிப்பாளர் ராஜசேகர் அன்னபிமோஜு பேசும்போது, தங்களது முதல் படமான ‘ஷம்பாலா’வுக்கு ரசிகர்கள் அளித்த ஆதரவு ‘கரிகாலா’வுக்கும் கிடைக்கும் என நம்பிக்கை தெரிவித்தார். வித்தியாசமான கதைக்களத்துடன் இப்படத்தை உருவாக்கும் இயக்குநர் உகந்தருக்கும், உடனடியாகக் கதையை ஏற்றுக்கொண்டு நடிக்கச் சம்மதித்த சந்தீப் கிஷனுக்கும், படத்தில் இணைந்துள்ள கதாநாயகிகளுக்கும் நன்றி தெரிவித்தார். அடுத்த வாரம் படப்பிடிப்பைத் தொடங்கத் திட்டமிட்டுள்ளதாகவும் கூறினார்.

இசையமைப்பாளர் ஸ்ரீசரண் பகாலா, இப்படத்தின் தனித்துவமான கதைக்களமும் இசை மூலம் ரசிகர்களைப் புதிய உலகத்திற்கு அழைத்துச் செல்லும் வாய்ப்பும் தன்னை உற்சாகப்படுத்துவதாகத் தெரிவித்தார். நடிகை சாக்ஷி மடோல்கர், படத்தின் கற்பனை உலகமும் இசையும் தன்னைக் கவர்ந்துள்ளதாகக் கூறினார். மேலும், நடிகை காயத்ரி பரத்வாஜ், மாயாஜாலமும் மர்மங்களும் நிறைந்த உலகத்தில் நடைபெறும் கதையில் இளவரசியாக நடிப்பது மகிழ்ச்சியளிப்பதாகத் தெரிவித்தார். நடிகை கேத்ரின் தெரசாவும் இயக்குநர் உகந்தர் உருவாக்கிவரும் புதிய உலகத்தைப் பாராட்டியதுடன், ரசிகர்கள் படத்தை விரும்பி ரசிப்பார்கள் என நம்பிக்கை தெரிவித்தார்.

ஏற்கெனவே வெளியான ‘கரிகாலா’ படத்தின் தலைப்பு அறிவிப்பும் ஃபர்ஸ்ட் லுக் போஸ்டரும் ரசிகர்கள் மத்தியில் எதிர்பார்ப்பை ஏற்படுத்தியுள்ளன. இதில் சந்தீப் கிஷன் இதுவரை பார்த்திராத வித்தியாசமான தோற்றத்தில் வலிமைமிக்க வீரராகக் காட்சியளித்திருந்தார்.

தெலுங்கு, தமிழ் மற்றும் இந்தி ஆகிய மொழிகளில் உருவாகும் இப்படம், காலத்தால் அழியாத சந்தமாமா கற்பனைக் கதைகளிலிருந்து உத்வேகம் பெற்றுள்ளது. பண்டைய அரசாட்சிகள், வனவிலங்குகள், மாய சக்திகள் மற்றும் மறக்கப்பட்ட புராணக் கதைகள் நிறைந்த ஓர் அற்புதமான பிரபஞ்சத்தை மையமாகக் கொண்டு திரைக்கதை அமைக்கப்பட்டுள்ளது. பாரம்பரியக் கற்பனைக் கதைகளின் ஆச்சரியத்தையும் சிறுவயது நினைவுகளையும் நவீனத் திரைப்படத் தொழில்நுட்பத்துடன் இணைத்து, ரசிகர்களுக்கு வித்தியாசமான திரையரங்க அனுபவத்தை வழங்கப் படக்குழு திட்டமிட்டுள்ளது. வழக்கமான கற்பனைச் சாகசப் படங்களிலிருந்து மாறுபடும் வகையில் சமூகக் கூறுகளும் இதில் இடம்பெறவுள்ளன.

‘ஷம்பாலா’ படத்தைத் தொடர்ந்து இயக்குநர் உகந்தர் முனி மற்றும் ஷைனிங் பிக்சர்ஸ் இணையும் இந்தப் படத்தில், பிரம்மாண்டமான கலை வடிவமைப்பு, விரிவான கற்பனை உலக உருவாக்கம் மற்றும் மேம்பட்ட காட்சித் தொழில்நுட்பங்களுக்கு முக்கியத்துவம் அளிக்கப்படவுள்ளது. இசையமைப்பாளர் ஸ்ரீசரண் பகாலா இப்படத்திற்கு இசையமைக்கிறார்.

இரண்டு பாகங்களாக உருவாகும் ‘கரிகாலா’வின் முதல் பாகம் 2027 ஜூலை 2ஆம் தேதியும், இரண்டாம் பாகம் 2027 அக்டோபர் 28ஆம் தேதியும் உலகம் முழுவதும் திரையரங்குகளில் வெளியாகத் திட்டமிடப்பட்டுள்ளது. படத்தின் மற்ற நடிகர்கள் மற்றும் தொழில்நுட்பக் கலைஞர்கள் குறித்த கூடுதல் விவரங்கள் பின்னர் அறிவிக்கப்படும் எனப் படக்குழு தெரிவித்துள்ளது.