புதுமையான புரமோஷனில் ‘துரோகம் பழகு’… மாத்தூர் தொட்டிப்பாலத்தில் பறந்த போஸ்டர்!

மாறுபட்ட விளம்பர உத்திகளைக் கையாண்டு வரும் ‘துரோகம் பழகு’ திரைப்படக் குழு, தற்போது கன்னியாகுமரி மாவட்டத்தின் புகழ்பெற்ற சுற்றுலாத் தலமான மாத்தூர் தொட்டிப்பாலத்தில் படத்தின் போஸ்டரைப் பறக்கவிட்டு வித்தியாசமான முறையில் புரமோஷன் செய்துள்ளது.

மகிழ் புரொடக்ஷன்ஸ் (Magizh Productions) சார்பில் சி. பியூலா மகிழ் தயாரிப்பில், தக்க்ஷன் விஜய் நடிப்பில், இயக்குநர் சீயோன் ராஜா இயக்கியுள்ள திரைப்படம் ‘துரோகம் பழகு’. சமூக அக்கறை கொண்ட கருத்தை மையமாகக் கொண்டு உருவாகியுள்ள இப்படம், தொடக்கத்திலிருந்தே தனது புதுமையான விளம்பர முயற்சிகள் மூலம் கவனம் ஈர்த்து வருகிறது.

ஏற்கெனவே இப்படத்தின் ஃபர்ஸ்ட் லுக் போஸ்டர் வெளியிடப்பட்ட நிலையில், புதுச்சேரி முதலமைச்சர் உள்ளிட்ட முக்கியப் பிரமுகர்களும் படத்தின் போஸ்டர்களை வெளியிட்டுள்ளனர். மேலும், கல்லூரிகளில் பல்வேறு புரமோஷன் நிகழ்ச்சிகளை நடத்தி இளைஞர்களிடையே படத்தைப் பிரபலப்படுத்தும் முயற்சியிலும் படக்குழுவினர் ஈடுபட்டு வருகின்றனர்.

இதன் தொடர்ச்சியாக, ஆசியாவின் புகழ்பெற்ற பாலங்களில் ஒன்றாகக் கருதப்படும் மாத்தூர் தொட்டிப்பாலத்தில் ‘துரோகம் பழகு’ படத்தின் போஸ்டரைப் பறக்கவிட்டு புதிய விளம்பர முயற்சியை மேற்கொண்டுள்ளனர். இயற்கை எழில் சூழ்ந்த இந்தச் சுற்றுலாத் தலத்தில் மேற்கொள்ளப்பட்ட இந்த முயற்சி, அப்பகுதி மக்கள் மற்றும் சுற்றுலாப் பயணிகளின் கவனத்தை ஈர்க்கும் வகையில் அமைந்துள்ளது.

இப்படத்தில் ஜி. எம். குமார், வனிதா விஜயகுமார், லொள்ளு சபா ஜீவா, வாழை ஜானகி, அமுதவாணன், அப்புக்குட்டி, கஞ்சா கருப்பு, திவாகர் உள்ளிட்ட பலர் முக்கியக் கதாபாத்திரங்களில் நடித்துள்ளனர். ராஜா மற்றும் பாலா இணைந்து இசையமைத்துள்ளனர். படத்தைச் சீயோன் ராஜா இயக்கியுள்ளார்.

வழக்கமான விளம்பர முறைகளைக் கடந்து, ஒவ்வொரு கட்டத்திலும் புதுமையான முயற்சிகளைக் கையாண்டு வரும் ‘துரோகம் பழகு’ படக்குழு, அடுத்ததாகப் படத்தின் டிரெய்லரை வெளியிடத் தயாராகி வருகிறது. டிரெய்லர் வெளியீட்டுக்குப் பிறகு படத்தின் மீதான எதிர்பார்ப்பு மேலும் அதிகரிக்கும் எனப் படக்குழுவினர் நம்புகின்றனர். மேலும், திரைப்படத்தின் வெளியீட்டுத் தேதி குறித்த அதிகாரப்பூர்வ அறிவிப்பும் விரைவில் வெளியாகும் எனத் தெரிவிக்கப்பட்டுள்ளது.

திரையரங்கு வெளியீட்டுக்கு முன்பே வித்தியாசமான புரமோஷன் முயற்சிகளால் கவனம் ஈர்த்து வரும் ‘துரோகம் பழகு’ திரைப்படம், அடுத்தடுத்த அறிவிப்புகள் மூலம் ரசிகர்களின் எதிர்பார்ப்பை அதிகரித்து வருகிறது.