நட்சத்திரங்கள் குவிந்த ‘லவ் ஓ லவ்’ இசை மற்றும் டிரெய்லர் வெளியீட்டு விழா; ஜூலை 10-ல் உலகம் முழுவதும் வெளியாகிறது!

சென்னை வடபழனியில் உள்ள கமலா திரையரங்கில் அண்மையில் நடைபெற்ற ‘லவ் ஓ லவ்’ திரைப்படத்தின் இசை மற்றும் டிரெய்லர் வெளியீட்டு விழா, திரையுலக பிரபலங்களின் பங்கேற்பால் உற்சாகமாக நடைபெற்றது. திரைப்படம் வரும் ஜூலை 10 அன்று உலகம் முழுவதும் திரையரங்குகளில் வெளியாகவுள்ளது.

இயக்குநர் மகேஷ் ராஜேந்திரன் எழுதி இயக்கியுள்ள இப்படத்தை தினேஷ் ராஜ் மற்றும் ஜி. தனஞ்செயன் ஆகியோர் Zinema Media & Entertainment Ltd. மற்றும் Creative Entertainers & Distribution நிறுவனங்கள் சார்பில் தயாரித்துள்ளனர். படத்தில் பவிஷ் நாராயண், நாக துர்கா, செல்வராகவன், கே.எஸ். ரவிக்குமார், வனிதா விஜயகுமார், ரம்யா உள்ளிட்டோர் முக்கிய கதாபாத்திரங்களில் நடித்துள்ளனர். இசையை Foxn அமைத்திருக்க, ஒளிப்பதிவை பி.ஜி. முத்தையா மேற்கொண்டுள்ளார்.

விழாவில் இயக்குநர்கள் கஸ்தூரி ராஜா, ஆர்.வி. உதயகுமார், சுப்ரமணியம் சிவா, தயாரிப்பாளர் கதிரேசன், தயாரிப்பாளர் சங்கத் தலைவர் கமலக்கண்ணன் உள்ளிட்ட பலர் கலந்து கொண்டு படக்குழுவினருக்கு வாழ்த்து தெரிவித்தனர். டிரெய்லரும் பாடல்களும் திரையிடப்பட்ட நிலையில், அரங்கில் இருந்தவர்களிடமிருந்து நல்ல வரவேற்பைப் பெற்றன.

நாயகன் பவிஷ் நாராயண், தன்னுடைய திரைப்பயணத்தில் தொடர்ந்து ஊக்கமளித்து வரும் அனைவருக்கும் நன்றி தெரிவித்து, குறிப்பாக கே.எஸ். ரவிக்குமார் மற்றும் செல்வராகவன் போன்ற அனுபவமிக்க கலைஞர்களுடன் நடித்தது மறக்க முடியாத அனுபவம் எனக் கூறினார். இசையமைப்பாளர் Foxn, தயாரிப்பாளர்கள் மற்றும் இயக்குநர் தன் மீது வைத்த நம்பிக்கைக்கு நன்றி தெரிவித்து, படத்தின் பாடல்கள் ரசிகர்களின் மனதை கவரும் என நம்பிக்கை தெரிவித்தார்.

நாயகி நாக துர்கா, இப்படம் தன் வாழ்க்கையில் முக்கியமான படைப்பாக இருக்கும் என்றும், ரசிகர்கள் திரையரங்குகளில் படத்தைப் பார்த்து ஆதரிக்க வேண்டும் என்றும் கேட்டுக்கொண்டார். திரைப்படத்தின் பாடல்கள், டிரெய்லர் மற்றும் இளமையான காதல் கதைக்களம் ரசிகர்களை கவரும் என்ற நம்பிக்கையையும் விழாவில் பேசிய பிரபலங்கள் வெளிப்படுத்தினர்.

இசை மற்றும் டிரெய்லர் வெளியீட்டு விழாவிற்கு கிடைத்த வரவேற்பால் உற்சாகமடைந்துள்ள படக்குழு, ‘லவ் ஓ லவ்’திரைப்படம் ஜூலை 10-ஆம் தேதி ரசிகர்களுக்கு ஒரு வித்தியாசமான காதல் மற்றும் பொழுதுபோக்கு அனுபவத்தை வழங்கும் என்ற நம்பிக்கையை வெளிப்படுத்தியுள்ளது.