யுவன் இசையில் பிரபு – விஜய் வர்மா கூட்டணி! புதிய படம் கோலாகல தொடக்கம்

Romeo Pictures சார்பில் ராகுல் மற்றும் Aviate Pictures சார்பில் கோகுல் ஸ்ரீனிவாசன் இணைந்து தயாரிக்கும் புதிய திரைப்படம், சென்னையில் நடைபெற்ற பூஜை நிகழ்ச்சியுடன் கோலாகலமாக தொடங்கியுள்ளது. ‘ரைட்டர்’ படத்தின் இயக்குநரும், ‘DC’ படத்தின் எழுத்தாளருமான ஃபிராங்க்ளின் ஜேக்கப் இயக்கும் இந்தப் படத்தில், இளைய திலகம் பிரபு மற்றும் பிக்பாஸ் சீசன் 7 மூலம் கவனம் பெற்ற விஜய் வர்மா முதன்மை கதாபாத்திரங்களில் நடிக்கின்றனர்.

இந்தப் பூஜை நிகழ்ச்சியில் இயக்குநர்கள் பா. ரஞ்சித், அருண் மாதேஸ்வரன் உள்ளிட்ட திரையுலகப் பிரபலங்கள் பலர் கலந்துகொண்டு படக்குழுவினருக்கு வாழ்த்து தெரிவித்தனர். டார்க் ஹியூமர் ஜானரில், வித்தியாசமான கதைக்களத்துடன் திரில்லர் மற்றும் காமெடி அம்சங்கள் கலந்த படமாக இது உருவாகவுள்ளது.

இந்தப் படத்தில் விஜய் வர்மாவுக்கு ஜோடியாக பிரபல நடிகை ஒருவர் நடிக்கவுள்ளதாகத் தெரிவிக்கப்பட்டுள்ளது. தயாரிப்பாளர்களில் ஒருவரான Romeo Pictures ராகுலும் முக்கிய கதாபாத்திரத்தில் நடிக்கிறார். இவர்களுடன் முத்துக்குமார், ரமேஷ் திலக், திலீப் சுப்பராயன், தீனா, அருண் மாதேஸ்வரன், கவிதா பாரதி மற்றும் அவினாஷ் ரகுதேவன் உள்ளிட்டோர் முக்கிய வேடங்களில் நடிக்கின்றனர்.

படத்தின் தொழில்நுட்பக் குழுவிலும் அனுபவம் வாய்ந்த கலைஞர்கள் இணைந்துள்ளனர். யுவன் சங்கர் ராஜா இசையமைக்க, பிரதீப் காளிராஜா ஒளிப்பதிவு செய்கிறார். பிரசன்னா G.K. படத்தொகுப்புப் பணிகளை மேற்கொள்கிறார். P.C. Stunts சண்டைக் காட்சிகளை வடிவமைக்க, யுகபாரதி பாடல்களை எழுதுகிறார். நவ்ஷாத் அகமது ஆடை வடிவமைப்பையும், சக்தி வெங்கட்ராஜ் M கலை இயக்கத்தையும் கவனிக்கின்றனர். வான்கோ படத்தின் போஸ்டர் வடிவமைப்புப் பணிகளை மேற்கொள்கிறார்.

பூஜை விழாவில் பேசிய நடிகர் பிரபு, இயக்குநர் ஃபிராங்க்ளின் ஜேக்கப் தன்னிடம் மிகவும் வித்தியாசமான கதையை கூறியதாகவும், இப்படிப்பட்ட புதிய முயற்சியின் ஒரு பகுதியாக இருப்பதில் மகிழ்ச்சி அடைவதாகவும் தெரிவித்தார். மேலும், புதிய தலைமுறை கலைஞர்களை ஊக்குவிக்கும் வகையில் பா. ரஞ்சித் மற்றும் அருண் மாதேஸ்வரன் உள்ளிட்டோர் நிகழ்ச்சியில் கலந்துகொண்டது மகிழ்ச்சியளிப்பதாகவும் கூறினார்.

நடிகர் விஜய் வர்மா பேசுகையில், நீண்ட காலமாக திட்டமிடப்பட்டு வந்த இந்தப் படம் தற்போது உருவாகும் நிலைக்கு வந்திருப்பது மகிழ்ச்சியளிப்பதாகத் தெரிவித்தார். கடந்த சில ஆண்டுகளாக இந்தப் படத்தின் பயணத்தில் தான் ஒரு பகுதியாக இருந்ததாகவும், தற்போது படக்குழுவுடன் இணைந்து பணியாற்றுவதில் மிகுந்த உற்சாகம் இருப்பதாகவும் கூறினார்.

இயக்குநர் பா. ரஞ்சித் பேசுகையில், ஃபிராங்க்ளின் ஜேக்கப் தனது முன்னாள் இணை இயக்குநர் என்றும், இது வழக்கமான திரைப்படமாக இருக்காது என்றும் தெரிவித்தார். புதிய தலைமுறை படைப்பாளிகள் தனித்துவமான கதைகளையும் புதிய களங்களையும் உருவாக்க வேண்டும் என்றும், அந்த வகையில் இந்தப் படம் முக்கியமான முயற்சியாக இருக்கும் என்றும் கூறினார். இளைய திலகம் பிரபு போன்ற அனுபவம் வாய்ந்த நடிகருடன் புதிய தலைமுறை படைப்பாளிகள் இணைந்து பணியாற்றுவது படத்திற்கு கூடுதல் பலம் என்றும் அவர் குறிப்பிட்டார்.

அருண் மாதேஸ்வரன் பேசுகையில், ஃபிராங்க்ளின் ஜேக்கப்பின் திறமையையும், இந்தப் படத்தின் வித்தியாசமான கதையையும் பாராட்டினார். பிரபு இந்தக் கதையில் நடிப்பது ஒரு சுவாரஸ்யமான மற்றும் எதிர்பாராத தேர்வு என்றும், யுவன் சங்கர் ராஜாவின் இசை படத்திற்கு மிகப்பெரிய பலமாக அமையும் என்றும் தெரிவித்தார்.

இயக்குநர் ஃபிராங்க்ளின் ஜேக்கப் கூறுகையில், தயாரிப்பாளர் ராகுலிடம் இந்தக் கதையின் ஐடியாவை பகிர்ந்தபோது அவர் மிகவும் விரும்பியதாகவும், அதன் பின்னர் இணைந்து இந்தப் படத்தை உருவாக்க முடிவு செய்ததாகவும் தெரிவித்தார். பிரபுவை இந்தக் கதாபாத்திரத்தில் நடிக்க வைக்கும் யோசனையை ராகுல்தான் முதலில் கூறியதாகவும், தமிழ் சினிமாவில் பிரபுவுக்கென்று இருக்கும் தனித்துவமான நடிப்பு பாணியை இதுவரை பார்க்காத ஒரு கோணத்தில் பயன்படுத்த விரும்புவதாகவும் கூறினார்.

ரமேஷ் திலக் பேசுகையில், இளைய திலகம் பிரபுவுடன் இணைந்து பணியாற்ற வேண்டும் என்பது தனது நீண்ட நாள் ஆசை என்றும், அது இந்தப் படத்தின் மூலம் நிறைவேறியிருப்பது மகிழ்ச்சியளிப்பதாகவும் தெரிவித்தார்.

வித்தியாசமான டார்க் ஹியூமர் கதைக்களம், அனுபவம் வாய்ந்த நடிகர் பிரபு மற்றும் புதிய தலைமுறை நடிகர்கள் இணையும் கூட்டணி, ஃபிராங்க்ளின் ஜேக்கப்பின் இயக்கம், யுவன் சங்கர் ராஜாவின் இசை என பல அம்சங்கள் இந்தப் படத்தின் மீதான எதிர்பார்ப்பை அதிகரித்துள்ளன.

இப்படத்தின் முதற்கட்ட படப்பிடிப்பு இம்மாத இறுதியில் சென்னையில் தொடங்கவுள்ளது. படத்தின் தலைப்பு மற்றும் இதர முக்கிய அறிவிப்புகளை படக்குழு விரைவில் அதிகாரப்பூர்வமாக வெளியிடும் என தெரிவிக்கப்பட்டுள்ளது.

இளைய திலகம் பிரபு – விஜய் வர்மா கூட்டணியில் உருவாகும் இந்த புதிய டார்க் ஹியூமர் திரில்லர், தமிழ் சினிமாவில் வித்தியாசமான முயற்சியாக அமையும் என எதிர்பார்க்கப்படுகிறது.