தந்தையின் அன்பும், மகனின் புரிதலும்… ‘ஃபாதர்’ டீசர் வெளியானது!

பிரபல இயக்குநர் R. சந்துரு தயாரிப்பில் உருவாகியுள்ள பெரும் எதிர்பார்ப்புக்குரிய திரைப்படம் ‘ஃபாதர்’. டார்லிங் கிருஷ்ணா மற்றும் பன்முகத் திறமை கொண்ட நடிகர் பிரகாஷ் ராஜ் முக்கிய கதாபாத்திரங்களில் நடித்துள்ள இப்படத்தை ராஜ்மோகன் இயக்கியுள்ளார். படத்தின் டீசர் வெளியாகி ரசிகர்கள் மத்தியில் நல்ல வரவேற்பைப் பெற்று வருகிறது.

தந்தை – மகன் இடையேயான அன்பு, புரிதலின்மை, எதிர்பார்ப்புகள், கருத்து வேறுபாடுகள் மற்றும் சொல்லப்படாமல் போகும் உணர்வுகளை மையமாகக் கொண்டு இப்படம் உருவாகியுள்ளது. டீசர் படத்தின் முழுக் கதையையும் வெளிப்படுத்தாமல், அதன் உணர்வுப்பூர்வமான உலகத்தையும் கதாபாத்திரங்களின் உறவையும் ரசிகர்களுக்கு அறிமுகப்படுத்துகிறது.

ஒரு தந்தை தனது அன்பை வார்த்தைகளால் வெளிப்படுத்தாமல், பொறுப்பு, கண்டிப்பு, தியாகம் மற்றும் பாதுகாப்பு போன்ற செயல்களின் மூலம் வெளிப்படுத்துவது, அதனை ஒரு மகன் வாழ்க்கையின் வெவ்வேறு கட்டங்களில் வெவ்வேறு விதமாகப் புரிந்துகொள்வது என, குடும்பங்களில் இயல்பாக நிகழும் உணர்வுகளை இப்படம் மையமாகக் கொண்டுள்ளது.

டீசரில் பிரகாஷ் ராஜின் இயல்பான நடிப்பும், நுணுக்கமான முகபாவனைகளும் கவனம் ஈர்க்கின்றன. அதேபோல், டார்லிங் கிருஷ்ணாவின் கதாபாத்திரமும் படத்தின் உணர்வுப்பூர்வமான மையத்திற்கு முக்கியத்துவம் சேர்க்கும் வகையில் அமைந்துள்ளது. இருவருக்கும் இடையேயான திரை உறவு படத்தின் மீதான எதிர்பார்ப்பை அதிகரித்துள்ளது.

இப்படம் குறித்து தயாரிப்பாளர் R. சந்துரு கூறுகையில், தந்தை – மகன் உறவில் இருக்கும் அன்பு, எதிர்பார்ப்பு, புரிதலின்மை மற்றும் கருத்து வேறுபாடுகளை நேர்மையான அணுகுமுறையுடன் பதிவு செய்துள்ளதாக தெரிவித்துள்ளார். குடும்பம், அன்பு, பொறுப்பு மற்றும் தியாகம் போன்ற அனைவராலும் உணரக்கூடிய விஷயங்களை இப்படம் பேசுவதால், மொழிகளைக் கடந்து அனைத்து தரப்பு ரசிகர்களையும் சென்றடையும் என நம்பிக்கை தெரிவித்துள்ளார்.

இயக்குநர் ராஜ்மோகன் கூறுகையில், ‘ஃபாதர்’ ஒரு உணர்வுப்பூர்வமான பயணம் என்றும், பல குடும்பங்களில் தந்தைகள் தங்களது அன்பை வெளிப்படையாகக் காட்டாமல், தங்களது பொறுப்பு மற்றும் தியாகங்கள் மூலம் வெளிப்படுத்துவதை இந்தக் கதை பதிவு செய்வதாகவும் தெரிவித்துள்ளார். பார்வையாளர்கள் தங்களது வாழ்க்கையில் பார்த்த அல்லது அனுபவித்த ஏதோ ஒரு உணர்வை இப்படத்தில் உணர வேண்டும் என்பதே தனது நோக்கம் என்றும் கூறியுள்ளார்.

‘குங்குமப்பூவும் கொஞ்சும் புறாவும்’, ‘வானவராயன் வல்லவராயன்’, ‘அட்ரஸ்’ உள்ளிட்ட படங்களை இயக்கிய ராஜ்மோகன், இந்தப் படத்தின் மூலம் தந்தை – மகன் உறவை மையமாகக் கொண்ட கதையை திரையில் பதிவு செய்துள்ளார்.

டீசருக்கு கிடைத்துள்ள வரவேற்பைத் தொடர்ந்து, படத்தின் மீதான எதிர்பார்ப்பு மேலும் அதிகரித்துள்ளது. இந்நிலையில், படத்தைப் பார்த்து கவரப்பட்ட Macis Productions, ‘ஃபாதர்’ திரைப்படத்தின் விநியோக உரிமையை கைப்பற்றியுள்ளது. படத்தின் உள்ளடக்கம் மற்றும் அது ரசிகர்களிடம் ஏற்படுத்தக்கூடிய தாக்கத்தின் மீது விநியோக நிறுவனத்திற்கு இருக்கும் நம்பிக்கையை இது வெளிப்படுத்துவதாக படக்குழு தெரிவித்துள்ளது.

R. சந்துருவின் தயாரிப்பு, ராஜ்மோகனின் இயக்கம், டார்லிங் கிருஷ்ணாவின் நடிப்பு மற்றும் பிரகாஷ் ராஜின் வலுவான திரை இருப்பு ஆகியவை இணைந்துள்ள ‘ஃபாதர்’, குடும்ப உறவுகளையும் மனித உணர்வுகளையும் மையமாகக் கொண்ட அர்த்தமுள்ள திரைப்படமாக உருவாகி வருகிறது. இப்படம் விரைவில் திரையரங்குகளில் வெளியாக உள்ளது.