இந்தியாவைத் தொடர்ந்து சர்வதேச பயணம்… செப்டம்பர் 11 முதல் வெளியாகும் ‘ஹனுமான் அன்ஷ்’!

இந்தியாவில் ரசிகர்களின் வரவேற்புடன் திரையரங்குகளில் வெற்றிகரமாக ஓடிக்கொண்டிருக்கும் இந்தி பக்தித் திரைப்படமான ‘ஹனுமான் அன்ஷ்’, தற்போது சர்வதேச ரசிகர்களையும் சந்திக்கத் தயாராகியுள்ளது. நீம் கரோலி பாபா என பக்தர்களால் அழைக்கப்படும் மகாராஜ்-ஜியின் வாழ்க்கை மற்றும் ஆன்மிகப் பயணத்தை மையமாகக் கொண்டு உருவாகியுள்ள இப்படம், வரும் செப்டம்பர் 11, 2026 முதல் வெளிநாடுகளிலும் திரையரங்குகளில் வெளியாகிறது.

விஷால் சதுர்வேதி எழுதி இயக்கியுள்ள ‘ஹனுமான் அன்ஷ்’ திரைப்படத்தை வெளிநாடுகளில் வெளியிடும் பணியை முன்னணி தயாரிப்பு நிறுவனமான ஹோம்பலே ஃபிலிம்ஸ் மேற்கொள்கிறது. இதன் மூலம் இந்தியாவில் கவனம் பெற்றுள்ள மகாராஜ்-ஜியின் வாழ்க்கைக் கதை, தற்போது சர்வதேச அளவில் ரசிகர்களை சென்றடைய உள்ளது.

அன்பு, பக்தி மற்றும் சேவை ஆகியவற்றை தனது போதனைகளின் முக்கிய அம்சங்களாகக் கொண்ட ஆன்மிகத் தலைவராக நீம் கரோலி பாபா போற்றப்படுகிறார். இந்தியாவைத் தாண்டியும் அவரது ஆன்மிக சிந்தனைகள் பலரிடம் தாக்கத்தை ஏற்படுத்தியுள்ளன. குறிப்பாக, 1960 மற்றும் 1970-களில் ஆன்மிகத் தேடலுடன் இந்தியாவுக்கு வந்த மேற்கத்திய நாடுகளைச் சேர்ந்த பலரும் அவரது போதனைகளால் ஈர்க்கப்பட்டதாக கூறப்படுகிறது.

இந்தியாவில் ஏற்கனவே வெளியாகியுள்ள ‘ஹனுமான் அன்ஷ்’ திரைப்படம் தொடர்ந்து திரையரங்குகளில் வரவேற்பைப் பெற்று வருகிறது. தொடக்கத்தில் சுமார் ரூ.10 லட்சம் வசூலித்த இப்படம், வெளியான 26-வது நாளில் ரூ.63.82 கோடிவசூலை எட்டியுள்ளதாக படக்குழு தரப்பில் தெரிவிக்கப்பட்டுள்ளது. தொடர்ந்து கிடைத்து வரும் வரவேற்பு மற்றும் வாய் வழிப் பாராட்டு காரணமாக படத்தின் மீதான கவனமும் அதிகரித்துள்ளது.

நீம் கரோலி பாபாவின் ஆன்மிக தாக்கம் உலக அளவில் பிரபலமான பலருடன் தொடர்புடையதாகவும் கூறப்படுகிறது. குறிப்பாக, தொழிலதிபர்களான ஸ்டீவ் ஜாப்ஸ், மார்க் ஸக்கர்பெர்க் மற்றும் நடிகை ஜூலியா ராபர்ட்ஸ் ஆகியோரின் ஆன்மிகப் பயணத்தில் மகாராஜ்-ஜியின் தாக்கம் இருந்ததாக குறிப்பிடப்படுகிறது.

1974-ம் ஆண்டு ஸ்டீவ் ஜாப்ஸ், மகாராஜ்-ஜியை சந்திக்கும் நோக்கத்தில் இந்தியாவுக்கு வந்ததாகவும், பின்னர் ஜாப்ஸின் ஆலோசனையின் பேரில் மார்க் ஸக்கர்பெர்க் தனது வாழ்க்கையில் சவாலான காலகட்டத்தை எதிர்கொண்டபோது கைஞ்சி தாம் பகுதிக்குச் சென்றதாகவும் தெரிவிக்கப்பட்டுள்ளது. அதேபோல், ஜூலியா ராபர்ட்ஸும் தனது ஆன்மிகப் பயணத்தில் நீம் கரோலி பாபா ஏற்படுத்திய தாக்கம் குறித்து பேசியுள்ளார்.

இந்திய பிரபலங்களான விராட் கோலி மற்றும் அனுஷ்கா சர்மா ஆகியோரும் நீம் கரோலி பாபாவுடன் நெருங்கிய தொடர்புடையதாகக் கருதப்படும் கைஞ்சி தாம் பகுதிக்கு சென்றுள்ளனர்.

இந்நிலையில், இந்தியாவில் ரசிகர்களிடம் வரவேற்பைப் பெற்றுள்ள ‘ஹனுமான் அன்ஷ்’, தற்போது சர்வதேச திரையரங்குகளிலும் வெளியாக உள்ளது. கைஞ்சி தாமில் இருந்து உலக ரசிகர்கள் வரை மகாராஜ்-ஜியின் வாழ்க்கை மற்றும் ஆன்மிகப் பயணத்தை கொண்டு செல்லும் இந்தப் படம், இந்தியாவைக் கடந்து புதிய பார்வையாளர்களைச் சந்திக்கிறது.

‘ஹனுமான் அன்ஷ்’ திரைப்படம் செப்டம்பர் 11, 2026 முதல் சர்வதேச திரையரங்குகளில் வெளியாகிறது.