புதிய தயாரிப்பு நிறுவனத்தைத் தொடங்கிய சிபிராஜ் – ‘ஜீப்ரா’ இயக்குநர் ஈஷ்வர் கார்த்திக் இயக்கத்தில் நடிக்கும் புதிய படம்!

நடிகர் சிபிராஜ் தனது பிறந்தநாளை முன்னிட்டு, ‘அண்டர்டாக் ஃபிலிம்ஸ்’ (UnderDog Films) என்ற புதிய திரைப்படத் தயாரிப்பு நிறுவனத்தைத் தொடங்கியுள்ளார். இந்நிறுவனத்தின் முதல் தயாரிப்பாக உருவாகும் திரைப்படத்தில் சிபிராஜ் கதாநாயகனாக நடிக்கிறார். இப்படத்தை ‘ஜீப்ரா’ படத்தின் இயக்குநர் ஈஷ்வர் கார்த்திக் இயக்குகிறார்.

வித்தியாசமான கதைக்களங்களையும் தனித்துவமான கதாபாத்திரங்களையும் தேர்ந்தெடுத்து நடித்து வரும் சிபிராஜ், தனது திரைப்பயணத்தில் அடுத்த கட்டமாகத் திரைப்படத் தயாரிப்பிலும் களமிறங்கியுள்ளார். ‘எண்ணிக்கையை விடத் தரமே முக்கியம்’ என்ற அணுகுமுறையுடன், ரசிகர்களுக்குப் புதிய அனுபவங்களை வழங்கும் திரைப்படங்களை உருவாக்கும் நோக்கில் ‘அண்டர்டாக் ஃபிலிம்ஸ்’ நிறுவனத்தைத் தொடங்கியுள்ளார்.

இந்நிறுவனத்தின் முதல் தயாரிப்பான ‘புரொடக்ஷன் நம்பர் 1’ திரைப்படத்தின் படப்பிடிப்பு ஏற்கெனவே தொடங்கி விறுவிறுப்பாக நடைபெற்று வருகிறது. சமீபத்தில் வெளியாகி வெற்றி பெற்ற ‘ஜீப்ரா’ திரைப்படத்தின் மூலம் கவனம் பெற்ற இயக்குநர் ஈஷ்வர் கார்த்திக் இப்படத்தை இயக்குகிறார்.

இப்படத்தில் கதாநாயகனாக நடிப்பதுடன், தயாரிப்புப் பொறுப்பையும் சிபிராஜ் ஏற்றுள்ளார். நடிகராகத் தனது பயணத்தைத் தொடர்ந்து வரும் அவர், தற்போது தயாரிப்பாளராகவும் புதிய முயற்சியில் இறங்கியிருப்பது அவரது திரைப்பயணத்தில் முக்கியமான முன்னேற்றமாக அமைந்துள்ளது.

சிபிராஜ் – ஈஷ்வர் கார்த்திக் கூட்டணியில் உருவாகும் இப்படத்தின் கதை, வகை மற்றும் பிற நடிகர்கள், தொழில்நுட்பக் கலைஞர்கள் குறித்த விவரங்கள் தற்போது ரகசியமாக வைக்கப்பட்டுள்ளன. இப்படம் தொடர்பான கூடுதல் தகவல்களைப் படக்குழுவினர் விரைவில் அதிகாரப்பூர்வமாக அறிவிக்க உள்ளனர்.

‘அண்டர்டாக் ஃபிலிம்ஸ்’ நிறுவனத்தின் முதல் தயாரிப்பாக உருவாகும் இப்படம் குறித்த அறிவிப்பு, சிபிராஜ் ரசிகர்கள் மத்தியில் எதிர்பார்ப்பை ஏற்படுத்தியுள்ளது.