சென்னையிலிருந்து திருச்சிக்கு… 50 பேரின் முதல் விமானப் பயணக் கனவை நனவாக்கும் ரெயின்டிராப்ஸ்!

குழந்தைகள் தினத்தை முன்னிட்டு வசதி வாய்ப்புகள் குறைந்த குழந்தைகள், முதியவர்கள் மற்றும் சிறப்புத் தேவையுடையோருக்கு வாழ்நாளில் மறக்க முடியாத விமானப் பயண அனுபவத்தை வழங்கும் ‘ரெயின்டிராப்ஸ் வானமே எல்லை’ முன்னெடுப்பு!

வசதி வாய்ப்புகள் குறைந்த குழந்தைகள், ஆதரவற்ற முதியவர்கள் மற்றும் சமூகத்தின் பல்வேறு தரப்பினரின் கனவுகளுக்கு சிறகளிக்கும் வகையில், ரெயின்டிராப்ஸ் சாரிட்டி ஃபவுண்டேஷன் சார்பில், குழந்தைகள் தினத்தை முன்னிட்டு ‘ரெயின்டிராப்ஸ் வானமே எல்லை’ என்ற சிறப்பான சமூக முன்னெடுப்பு நடைபெற உள்ளது.

இதன் ஒரு பகுதியாக, வரும் நவம்பர் 14, 2026 அன்று சென்னையிலிருந்து திருச்சிக்கு 50 பயனாளிகள் விமானம் மூலம் பயணம் மேற்கொள்ள உள்ளனர். இவர்களில் பலருக்கு இதுவே முதல் விமானப் பயணமாக அமையவுள்ளது. பொருளாதாரச் சூழல் காரணமாக இதுவரை எட்ட முடியாத கனவாக இருந்த விமானப் பயணத்தை நனவாக்கும் இந்த முயற்சி, அவர்களின் வாழ்நாளில் மறக்க முடியாத அனுபவமாக அமைய உள்ளது.

இந்தப் பயணத்தில் ஆனந்தம் கல்வி மையம், ஆனந்தம் சிறப்புப் பள்ளி, சேவாலயா, மாற்றம் ஃபவுண்டேஷன் மற்றும் ரெயின்டிராப்ஸ் கல்வி உதவித்திட்டத்தின் மூலம் கல்வி உதவி பெறும் மாணவர்கள் பங்கேற்கின்றனர். மேலும், ரெயின்டிராப்ஸ் அன்பகம் இல்லத்தைச் சேர்ந்த முதியவர்கள், பார்வைத்திறன் குறைபாடுடைய ஒரு மாணவர் மற்றும் ஒரு திருநம்பி ஆகியோரும் இந்தப் பயணத்தில் இணைய உள்ளனர்.

குழந்தைகள், முதியவர்கள், மாற்றுத்திறனாளிகள் மற்றும் சமூகத்தின் பல்வேறு பின்னணிகளைக் கொண்டவர்களை ஒரே பயணத்தில் ஒன்றிணைப்பதன் மூலம், வயது, உடல்திறன், பொருளாதார நிலை ஆகியவற்றைக் கடந்து அனைவருக்கும் சமமான மகிழ்ச்சியும் மரியாதையும் கிடைக்க வேண்டும் என்ற உயரிய நோக்கத்தை இந்த முன்னெடுப்பு வெளிப்படுத்துகிறது.

ரெயின்டிராப்ஸ் வானமே எல்லை முன்னெடுப்பின் மற்றுமொரு குறிப்பிடத்தக்க மைல்கல்லாக, இந்த ஆண்டு நடைபெறும் சென்னை – திருச்சி விமானப் பயணத்தின் மூலம், கடந்த பல ஆண்டுகளாகத் தொடர்ந்து மேற்கொள்ளப்பட்டு வரும் இந்த முயற்சியில் தமிழகத்தின் அனைத்து விமான நிலையங்களையும் ரெயின்டிராப்ஸ் உள்ளடக்கியுள்ளது.

வசதி வாய்ப்புகள் குறைந்த குழந்தைகள் மற்றும் சமூகத்தின் விளிம்புநிலை மக்களுக்கு முதல் விமானப் பயண அனுபவத்தை வழங்க வேண்டும் என்ற நோக்கத்துடன் தொடங்கப்பட்ட இந்த முன்னெடுப்பு, பல ஆண்டுகளாகப் பலரது கனவுகளை நனவாக்கி வருகிறது. இந்த ஆண்டின் பயணம், அந்த முயற்சியின் மற்றுமொரு மகிழ்ச்சியான மைல்கல்லாக அமைவதுடன், இன்னும் பலரது கனவுகளுக்குச் சிறகளிக்கும் ஊக்கமாகவும் அமையவுள்ளது.

திருச்சியைச் சென்றடைந்ததும், பயணக் குழுவினர் வரலாற்றுச் சிறப்புமிக்க கல்லணையைப் பார்வையிட உள்ளனர். கரிகால சோழனால் கட்டப்பட்ட உலகின் பழமையான பயன்பாட்டில் உள்ள நீர்ப்பாசனக் கட்டமைப்புகளில் ஒன்றான கல்லணை, தமிழர்களின் பொறியியல் திறமைக்கும் பாரம்பரியத்திற்கும் சிறந்த எடுத்துக்காட்டாக விளங்குகிறது.

அதனைத் தொடர்ந்து, தஞ்சாவூர் சென்று உலகப் புகழ்பெற்ற பிரகதீஸ்வரர் திருக்கோயிலான தஞ்சைப் பெரிய கோயிலையும் பார்வையிட உள்ளனர். யுனெஸ்கோ உலகப் பாரம்பரியச் சின்னமாக அங்கீகரிக்கப்பட்டுள்ள இக்கோயில், சோழர் காலக் கட்டிடக்கலையின் மகத்துவத்தைப் பறைசாற்றுகிறது.

இந்தச் சுற்றுலா மற்றும் பாரம்பரியப் பயணத்தைத் தொடர்ந்து, அனைவரும் ரயில் மூலம் சென்னைக்குத் திரும்ப உள்ளனர். முதல் விமானப் பயணம், வரலாற்றுச் சிறப்புமிக்க இடங்களைப் பார்வையிடுதல், புதிய அனுபவங்கள் என இந்தப் பயணம் பங்கேற்பாளர்களுக்கு வாழ்நாள் முழுவதும் நினைவில் நிற்கும் மகிழ்ச்சியான தருணங்களைப் பரிசளிக்க உள்ளது.

இந்த ஆண்டின் ரெயின்டிராப்ஸ் வானமே எல்லை முன்னெடுப்பு, ஆனந்தம் டிரஸ்ட் மற்றும் VGP உலகத் தமிழ்ச் சங்கம் ஆகியோரின் ஆதரவுடன் நடைபெறுகிறது. இந்தச் சிறப்புப் பயணத்தில் ரெயின்டிராப்ஸ் சாரிட்டி ஃபவுண்டேஷனின் நல்லெண்ணத் தூதரும் இசையமைப்பாளருமான ஏ.ஆர். ரைஹானா மற்றும் VGP குழுமத்தின் டாக்டர் வி.ஜி. சந்தோசம் ஆகியோர் சிறப்பு விருந்தினர்களாகப் பங்கேற்கின்றனர்.

ரெயின்டிராப்ஸ் சாரிட்டி ஃபவுண்டேஷனின் நிறுவனர் மற்றும் நிர்வாக அறங்காவலர் அரவிந்த் ஜெயபால் மற்றும் ரெயின்டிராப்ஸ் குழுவினரும் இந்தப் பயணத்தில் இணைந்து பங்கேற்க உள்ளனர்.

இந்த முன்னெடுப்பு குறித்து ரெயின்டிராப்ஸ் சாரிட்டி ஃபவுண்டேஷனின் நிறுவனர் மற்றும் நிர்வாக அறங்காவலர் அரவிந்த் ஜெயபால் கூறுகையில்:

“நம்மில் பலருக்கு விமானப் பயணம் என்பது ஒரு சாதாரண அனுபவமாக இருக்கலாம். ஆனால், இந்தக் குழந்தைகளுக்கும் முதியவர்களுக்கும் அது வாழ்நாள் கனவாக இருக்கிறது. அவர்களுக்கு விமானப் பயணத்தை மட்டும் வழங்குவது எங்கள் நோக்கமல்ல; அவர்கள் மதிக்கப்படுகிறார்கள், நேசிக்கப்படுகிறார்கள், அவர்களுடைய கனவுகளும் முக்கியமானவை என்ற உணர்வை ஏற்படுத்துவதே எங்கள் நோக்கம்.

இந்த ஆண்டு பயணத்தின் மூலம், கடந்த பல ஆண்டுகளாக எங்களது வானமே எல்லை முன்னெடுப்பில் தமிழகத்தின் அனைத்து விமான நிலையங்களையும் உள்ளடக்கியிருப்பது எங்களுக்கு மிகுந்த மகிழ்ச்சியையும் பெருமையையும் அளிக்கிறது.

ரெயின்டிராப்ஸ் வானமே எல்லை என்பது வெறும் விமானப் பயணம் மட்டுமல்ல; வசதி வாய்ப்புகள் குறைந்தவர்களின் கனவுகளுக்குச் சிறகளிக்கும் ஒரு தொடர் சமூக முன்னெடுப்பாகும். கனவுகளுக்கு வயது கிடையாது; திறன்களின் அடிப்படையில் கனவுகள் கட்டுப்படுத்தப்படக் கூடாது. ஒவ்வொருவருக்கும் வாழ்க்கையின் அழகான அனுபவங்களைப் பெறுவதற்கான வாய்ப்பு கிடைக்க வேண்டும் என்பதே எங்கள் விருப்பம்” என்றார்.

ஒரு விமானப் பயணத்தின் மூலம் 50 பேரின் கனவுகளை நனவாக்குவதோடு, அவர்களுக்கு மகிழ்ச்சி, தன்னம்பிக்கை மற்றும் புதிய அனுபவங்களை வழங்கும் ரெயின்டிராப்ஸின் இந்த முன்னெடுப்பு, சமூக அக்கறைக்கும் மனிதநேயத்திற்கும் சிறந்த எடுத்துக்காட்டாக அமைந்துள்ளது.