போராட்டங்களுக்கு நடுவே பூக்கும் காதல் – கே. மணிகண்டனின் ‘மக்கள் காவலன்’ படத்தின் ‘இற இறகாக’ பாடல் வெளியீடு!
கே. மணிகண்டன் நடிப்பில் உருவாகி வரும் ‘மக்கள் காவலன்’ திரைப்படத்தின் இரண்டாவது பாடலான ‘இற இறகாக’ வெளியாகியுள்ளது. நிவாஸ் கே. பிரசன்னா இசையமைத்துப் பாடியுள்ள இந்த மென்மையான காதல் பாடலை பிர்லா ஸ்டுடியோஸ் மற்றும் பா. ரஞ்சித், அதிதி ஆனந்த் ஆகியோரின் நீலம் ஸ்டுடியோஸ் நிறுவனங்கள் இணைந்து வெளியிட்டுள்ளன.
இப்படத்தின் முதல் பாடலான ‘இக்னோர்’ வெளியாகி ரசிகர்களிடையே வரவேற்பைப் பெற்று வரும் நிலையில், தற்போது வெளியாகியுள்ள இரண்டாவது பாடல் காதலின் மென்மையான உணர்வுகளை வெளிப்படுத்தும் வகையில் அமைந்துள்ளது. ஜோதி கண்ணா எழுதியுள்ள வரிகளுக்கு நிவாஸ் கே. பிரசன்னா இசையமைத்துப் பாடியுள்ளார்.
கடினமான சூழல்களையும் போராட்டங்களையும் எதிர்கொண்டு வாழும் நாயகன், தனது காதலியின் அன்பின் வழியாக காதலின் மீதான நம்பிக்கையை மீண்டும் பெறுவதை இந்தப் பாடல் சித்தரிக்கிறது. நாயகனின் அன்றாட வாழ்க்கை, தொழில், போராட்டங்கள் என அனைத்தையும் கடந்து, காதலியின் அன்பில் கிடைக்கும் தூய்மையான தருணத்தை உணர்வுபூர்வமாகப் பதிவு செய்கிறது. இப்படத்தின் மூலம் கதாநாயகியாக அறிமுகமாகும் திவ்யா ஸ்ரீ பாதா, இந்தப் பாடலில் நாயகனின் காதலியாக நடித்துள்ளார்.
காதலில் விழும் தருணத்தின் அழகையும், அந்த உணர்வு ஒரு மனிதனின் வாழ்க்கையில் ஏற்படுத்தும் மாற்றத்தையும் வெளிப்படுத்தும் ‘இற இறகாக’ பாடல், ‘மக்கள் காவலன்’ படத்தின் உணர்வுப்பூர்வமான பக்கத்தை ரசிகர்களுக்கு அறிமுகப்படுத்துகிறது. நீதிக்காகக் குரல் கொடுக்கும் மக்களின் பாதுகாவலனாக நாயகன் உருவெடுக்கும் கதையில், அவரது தனிப்பட்ட உணர்வுகளையும் காதலையும் இந்தப் பாடல் வெளிப்படுத்துகிறது.
பிர்லா ஸ்டுடியோஸ் மற்றும் நீலம் ஸ்டுடியோஸ் இணைந்து தயாரிக்கும் இப்படத்தை சந்தோஷ்குமார் எழுதி இயக்குகிறார். காவல் துறையில் பணியாற்றும் ஒரு மனிதன் கண்ணியத்துடன் வாழ வேண்டும் என்ற எண்ணத்துடன் இருக்கிறான். ஆனால், ஊழல் நிறைந்த அமைப்பு அவனைச் சூழும்போது, அடிபணிவதா அல்லது எதிர்த்து நிற்பதா என்ற இக்கட்டான சூழலுக்குத் தள்ளப்படுகிறான். தனது உயிர் பிழைப்பதற்காகத் தொடங்கும் அவனது போராட்டம், நாளடைவில் மிகப்பெரிய போராட்டமாக உருவெடுக்கிறது. தான் ஒருபோதும் விரும்பாத தலைமைப் பொறுப்பை ஏற்க வேண்டிய கட்டாயத்திற்கும் அவன் ஆளாகிறான். எதிர்ப்பின் விலை அதிகரிக்க அதிகரிக்க, ஒரு சாதாரண மனிதனுக்கும் மக்களின் பாதுகாவலனுக்கும் இடையிலான எல்லை மெல்ல மறையத் தொடங்குகிறது.
அதிரடி மற்றும் உணர்வுப்பூர்வமான அம்சங்களுடன் உருவாகியுள்ள ‘மக்கள் காவலன்’ திரைப்படம் வரும் டிசம்பர் 4, 2026 அன்று உலகம் முழுவதும் திரையரங்குகளில் வெளியாகிறது.
