ஜெயராம் – அஷ்வின் இணையும் ‘குட் நியூஸ்’… முதல் கட்ட படப்பிடிப்பு வெற்றிகரமாக நிறைவு!

சாய் வினோத் ஜெயக்குமார் வழங்கும் Movietron Production தயாரிப்பில், நடிகர்கள் ஜெயராம் மற்றும் அஷ்வின்முதன்மை கதாபாத்திரங்களில் நடிக்கும் ‘குட் நியூஸ்’ திரைப்படத்தின் முதல் கட்ட படப்பிடிப்பு வெற்றிகரமாக நிறைவடைந்துள்ளது. திட்டமிட்டபடி நடைபெற்ற இந்த படப்பிடிப்பு, படக்குழுவின் ஒற்றுமை, அர்ப்பணிப்பு மற்றும் ஒருங்கிணைப்புடன் உற்சாகமான சூழலில் நிறைவு பெற்றுள்ளதாக தயாரிப்புக் குழு தெரிவித்துள்ளது.

முதல் கட்ட படப்பிடிப்பின் போது நடிகர்கள், தொழில்நுட்பக் கலைஞர்கள், இயக்குநர் குழு, தயாரிப்பு நிர்வாகம், ஒளிப்பதிவு, கலை இயக்கம், ஆடை வடிவமைப்பு, நடன அமைப்பு உள்ளிட்ட அனைத்து துறையினரும் முழு ஈடுபாட்டுடன் பணியாற்றியதால் எந்தவித சிக்கலும் இன்றி படப்பிடிப்பு வெற்றிகரமாக நிறைவடைந்தது. படப்பிடிப்பு தளத்தில் நிலவிய நேர்மறையான சூழலும், அனைவரின் ஒற்றுமையும் இந்த வெற்றிக்கான முக்கிய காரணமாக அமைந்ததாக படக்குழுவினர் தெரிவித்துள்ளனர்.

தயாரிப்பாளர் சாய் வினோத் ஜெயக்குமார் மற்றும் இணைத் தயாரிப்பாளர் சாய்பிரபு ஜெயக்குமார் தலைமையிலான தயாரிப்புக் குழுவின் திட்டமிடல் மற்றும் சிறப்பான நிர்வாகம், அனைத்து துறையினரும் தங்களது பணிகளை முழு கவனத்துடனும் அர்ப்பணிப்புடனும் மேற்கொள்ள வழிவகுத்ததாக கூறப்படுகிறது.

முதல் கட்ட படப்பிடிப்பு நிறைவடைந்ததைத் தொடர்ந்து இயக்குநராக அறிமுகமாகும் நாகேந்திரமுருகன், தயாரிப்பாளர்கள், நடிகர்கள், தொழில்நுட்பக் கலைஞர்கள் மற்றும் முழு படக்குழுவினருக்கும் தனது நன்றியைத் தெரிவித்தார். அனைவரின் ஒற்றுமை மற்றும் உற்சாகமான பங்களிப்பால் தரமான குடும்ப பொழுதுபோக்கு திரைப்படம் உருவாகும் என்ற நம்பிக்கை மேலும் அதிகரித்துள்ளதாக அவர் கூறினார்.

இந்தப் படத்தின் மற்றொரு முக்கிய அம்சமாக, இயக்குநர் பாண்டிராஜ் வசனம் எழுதியுள்ளார். குடும்ப உறவுகளையும், இயல்பான நகைச்சுவையையும் உணர்வுபூர்வமாக வெளிப்படுத்தும் அவரது வசனங்கள், படத்திற்கு கூடுதல் பலமாக அமையும் என படக்குழு நம்பிக்கை தெரிவித்துள்ளது.

Movietron Production தயாரிக்கும் இந்தப் படத்தில், ஜெயராம் மற்றும் அஷ்வின் கதாநாயகர்களாக நடிக்க, கதாநாயகியாக கல்யாணி அனில் தமிழ் திரையுலகில் அறிமுகமாகிறார். மேலும் ஆஷா சரத், முத்துக்குமார், ஜாபர், குரேஷி, தீபா, வினோதினி, திவ்யா, மணிமேகலை, ஜென்சன் திவாகர் உள்ளிட்ட பலர் முக்கிய கதாபாத்திரங்களில் நடித்துள்ளனர்.

படத்தின் தொழில்நுட்பக் குழுவில் பிரவீன்குமார் ஒளிப்பதிவாளராகவும், சித்துகுமார் இசையமைப்பாளராகவும், ஷெரீப் மாஸ்டர் நடன இயக்குநராகவும், கார்த்திக்வாசன் கலை இயக்குநராகவும், அர்ஜுன் பாபு படத்தொகுப்பாளராகவும் பணியாற்றுகின்றனர். எல்.எம். தனசேகர் நிர்வாகத் தயாரிப்பாளராகவும், அரவிந்தன் இரண்டாம் நிர்வாகத் தயாரிப்பாளராகவும் உள்ளனர். மக்கள் தொடர்பு பணிகளை பி.ஆர்.ஓ. ரேகா கவனித்து வருகிறார்.

முதல் கட்ட படப்பிடிப்பு வெற்றிகரமாக நிறைவடைந்துள்ள நிலையில், அடுத்த கட்ட படப்பிடிப்புக்கான பணிகளில் படக்குழு தீவிரமாக ஈடுபட்டுள்ளது. குடும்ப உறவுகள், நகைச்சுவை மற்றும் உணர்வுகளை மையமாகக் கொண்ட முழுமையான குடும்ப பொழுதுபோக்கு திரைப்படமாக ‘குட் நியூஸ்’ ரசிகர்களை கவரும் என்ற நம்பிக்கையில் படக்குழு உள்ளது.