சமூக ஊடக வதந்திக்கு வேடன் மறுப்பு; சட்ட நடவடிக்கை எடுக்கப்படும் என எச்சரிக்கை!

சமூக ஊடகங்களில் தன்னைப் பற்றி பரவி வரும் தவறான தகவல்களுக்கு இசைக் கலைஞர் வேடன் விளக்கம் அளித்துள்ளார். சவூதி அரேபியாவில் பன்றி இறைச்சி உணவுகள் வழங்கும் உணவகத் தொடர் ஒன்றை தொடங்க இருப்பதாகவும், அது தொடர்பாக வேடன் அறிக்கை வெளியிட்டதாகவும் சமூக ஊடகங்களில் தகவல்கள் பரவி வந்த நிலையில், அந்த தகவல்கள் முற்றிலும் உண்மைக்கு புறம்பானவை என அவர் திட்டவட்டமாக மறுத்துள்ளார்.

இதுகுறித்து வேடன் வெளியிட்டுள்ள விளக்கத்தில், பொதுவாக தனிப்பட்ட முறையில் பரவும் இதுபோன்ற தகவல்களுக்கு பதிலளிப்பதில்லை என்றும், ஆனால் தற்போது தன்னைப் பற்றிய தவறான தகவல் திட்டமிட்டு பரப்பப்பட்டு வருவதால் விளக்கம் அளிக்க வேண்டிய நிலை ஏற்பட்டுள்ளதாகவும் தெரிவித்துள்ளார்.

சவூதி அரேபியாவிலோ அல்லது வேறு எந்த வளைகுடா நாட்டிலோ ஹோட்டல், உணவகம் அல்லது உணவு சார்ந்த தொழில் தொடங்கும் திட்டம் எதுவும் தனக்கு இல்லை என்றும் அவர் தெளிவுபடுத்தியுள்ளார். இதுதொடர்பாக எந்த நிறுவனத்துடனும் கூட்டாண்மை ஏற்படுத்தவோ, விண்ணப்பிக்கவோ அல்லது வேறு எந்த தொழில் நடவடிக்கையிலும் ஈடுபடவோ இல்லை என்றும் கூறியுள்ளார்.

சவூதி அரேபியாவிற்கு தான் செல்வது ஒரு நிகழ்ச்சிக் கலைஞராக, அங்குள்ள நிகழ்ச்சி ஏற்பாட்டாளர்களின் அழைப்பின் பேரிலேயே என்றும் வேடன் தெரிவித்துள்ளார். மேலும், தன்னை அழைக்கும் ஒவ்வொரு நாட்டின் சட்டங்கள், நம்பிக்கைகள், கலாச்சாரம் மற்றும் பழக்கவழக்கங்களை எப்போதும் மதித்து வருவதாகவும், அதற்கு எதிராக தவறான புரிதலை ஏற்படுத்தும் வகையில் எந்த கருத்தையோ செயலையோ மேற்கொண்டதில்லை என்றும் குறிப்பிட்டுள்ளார்.

தனது நிகழ்ச்சிகளுக்கான வரவேற்பும் எண்ணிக்கையும் ஆண்டுதோறும் அதிகரித்து வரும் சூழலில், இதுபோன்ற தவறான தகவல்கள் தொடர்ந்து பரப்பப்படுவது தற்செயலானது அல்ல எனவும் வேடன் தெரிவித்துள்ளார். தனது கலைப் பயணம், ரசிகர்களுடனான உறவு மற்றும் சர்வதேச நிகழ்ச்சி ஏற்பாட்டாளர்களுடனான தொழில்முறை தொடர்புகளை பாதிக்கும் நோக்கில் திட்டமிட்ட பிரச்சாரம் மேற்கொள்ளப்படுவதாக அவர் குற்றம்சாட்டியுள்ளார்.

எந்தவிதமான பின்னணியும் இல்லாமல், வாய்ப்புகள் குறைந்த சூழலிலிருந்து தன்னை நம்பியவர்களின் ஆதரவால் இன்று இந்த இடத்தை அடைந்துள்ளதாக குறிப்பிட்டுள்ள வேடன், இதுபோன்ற தவறான பிரச்சாரங்களால் தனது கலைப் பயணத்தை யாராலும் தடுக்க முடியாது என்றும் உறுதியாக தெரிவித்துள்ளார்.

இதற்கிடையில், தவறான தகவல்களை பரப்பிய சமூக ஊடகக் கணக்குகள் மற்றும் அதனுடன் தொடர்புடைய விவரங்களை தனது குழுவினர் சேகரித்து வருவதாகவும், இந்த விவகாரம் தொடர்பாக உரிய சட்ட நடவடிக்கைகளை எடுக்க நடவடிக்கைகள் மேற்கொள்ளப்பட்டு வருவதாகவும் அவர் தெரிவித்துள்ளார்.

மேலும், சமூக ஊடகங்களில் எந்த தகவலையும் பகிர்வதற்கு முன்பு அதன் உண்மைத்தன்மையை உறுதிப்படுத்திக் கொள்ள வேண்டும் என ரசிகர்கள் மற்றும் பொதுமக்களிடம் வேடன் வேண்டுகோள் விடுத்துள்ளார். இந்த விவகாரம் தொடர்பாக நேரடியாகத் தொடர்புகொண்டு உண்மையை அறிந்தவர்களுக்கும், தனக்கு ஆதரவாக நின்றவர்களுக்கும் அவர் நன்றி தெரிவித்துள்ளார்.

“இதுபோன்ற தவறான பிரச்சாரங்கள் எனது இசையையோ, எனது கலைப் பயணத்தையோ ஒருபோதும் தடுக்காது. எனது நிகழ்ச்சிகளில் சந்திப்போம்” என வேடன் தனது விளக்கத்தை நிறைவு செய்துள்ளார்.