‘ஹாய்’ படத்திற்கு கிடைத்த வரவேற்பு… பத்திரிகை, ஊடக நண்பர்களைச் சந்தித்து நன்றி தெரிவித்த படக்குழு!

நயன்தாரா மற்றும் கவின் முதன்முறையாக இணைந்து நடித்துள்ள ‘ஹாய்’ திரைப்படம் கடந்த ஆகஸ்ட் 28ஆம் தேதி திரையரங்குகளில் வெளியான நிலையில், ரசிகர்கள் மற்றும் விமர்சகர்கள் மத்தியில் வரவேற்பைப் பெற்று திரையரங்குகளில் வெற்றிகரமாக ஓடிக்கொண்டிருக்கிறது. படத்திற்கு கிடைத்து வரும் ஆதரவுக்கு நன்றி தெரிவிக்கும் வகையில், படக்குழுவினர் பத்திரிகை மற்றும் ஊடக நண்பர்களைச் சந்தித்து தங்களது நன்றியைத் தெரிவித்தனர்.

இந்தச் சந்திப்பில் தயாரிப்பாளர் எஸ். எஸ். லலித்குமார், இயக்குநர் விஷ்ணு எடவன், நடிகர்கள் கவின், பிரபு, குரேஷி, நடிகைகள் ராதிகா சரத்குமார், சுஹாசினி, அம்ருதா சீனிவாசன், காவ்யா உள்ளிட்ட படக்குழுவினர் கலந்து கொண்டு, ‘ஹாய்’ படத்திற்கு கிடைத்து வரும் வரவேற்பு குறித்த தங்களது மகிழ்ச்சியைப் பகிர்ந்து கொண்டனர்.

நிகழ்வில் பேசிய தயாரிப்பாளர் எஸ். எஸ். லலித்குமார், ஒரு திரைப்படத்தை மக்கள் மத்தியில் கொண்டு சேர்ப்பதில் பத்திரிகை மற்றும் ஊடகங்களின் பங்களிப்பு முக்கியமானது என்றும், ‘ஹாய்’ படத்திற்கு தொடர்ந்து ஆதரவு வழங்கி வரும் ஊடக நண்பர்களுக்கு நன்றி என்றும் தெரிவித்தார். பெரிய படங்களுக்குப் பிறகு ஏன் இதுபோன்ற திரைப்படத்தைத் தயாரிக்கிறீர்கள் என்ற கேள்விகள் எழுந்தபோதிலும், நல்ல கதையையும் தரமான திரைப்படத்தையும் ரசிகர்களுக்கு வழங்க வேண்டும் என்ற நோக்கத்திலேயே இப்படத்தைத் தயாரித்ததாகவும் அவர் கூறினார்.

மேலும், படத்தின் இயக்குநர் விஷ்ணு எடவன் கதை சொல்லும் விதம் தன்னை மிகவும் கவர்ந்ததாகவும், அவர் கதையை விவரிக்கும்போதே அதன் உணர்வுகளை உணர முடிந்ததாகவும் லலித்குமார் குறிப்பிட்டார். படத்திற்காக உழைத்த அனைத்து நடிகர்கள் மற்றும் தொழில்நுட்பக் கலைஞர்களின் பங்களிப்பும் இந்த வெற்றிக்கு முக்கிய காரணம் என்றும் அவர் தெரிவித்தார்.

ஒளிப்பதிவாளர் ராஜேஷ் சுக்லா, இயக்குநர் விஷ்ணு எடவனுடன் இணைந்து பணியாற்றியது மகிழ்ச்சியான அனுபவமாக இருந்ததாகக் கூறினார். அவர் முதன்முதலில் கதையைச் சொன்னபோதே, ஒரு சிறப்பான திரைப்படத்தை உருவாக்குவார் என்ற நம்பிக்கை ஏற்பட்டதாகவும், அந்த நம்பிக்கை தற்போது நிஜமாகியிருப்பது மகிழ்ச்சியளிப்பதாகவும் தெரிவித்தார்.

இசையமைப்பாளர் ஜென் மார்ட்டின், ‘ஹாய்’ திரைப்படம் இயக்குநர் விஷ்ணு எடவன் மற்றும் நடிகர் கவினுடன் இணைந்து பணியாற்றும் தனது நான்காவது படம் என்று குறிப்பிட்டார். கவினும் தானும் பள்ளிக் கால நண்பர்கள் என்றும், அப்போது இருவரும் தாங்கள் எதிர்காலத்தில் நடிகர் மற்றும் இசையமைப்பாளராக வர வேண்டும் எனப் பேசிய நிலையில், இன்று அந்தக் கனவு நனவாகியிருப்பது மிகவும் மகிழ்ச்சியாக இருப்பதாகவும் அவர் கூறினார்.

நடிகை அம்ருதா சீனிவாசன், ‘ஹாய்’ ஒரு அழகான ஃபீல்-குட் திரைப்படம் என்று குறிப்பிட்டதுடன், இயக்குநர் விஷ்ணு ஒவ்வொரு காட்சியையும் மிகவும் கவனமாக உருவாக்கியிருப்பதாக பாராட்டினார். கதை, இசை, படத்தொகுப்பு, இயக்கம் என அனைத்து துறைகளின் ஒருங்கிணைந்த பங்களிப்பால் முழுமையான திரைப்படம் உருவாகியுள்ளதாகவும் அவர் தெரிவித்தார்.

நடிகர் குரேஷி, தொகுப்பாளராக இருந்து வந்த தான் தற்போது நடிகராக இந்த மேடையில் நிற்பது மகிழ்ச்சியளிப்பதாகக் கூறினார். தன்னிடம் நம்பிக்கை வைத்து நண்பன் கதாபாத்திரத்தில் நடிக்க வாய்ப்பு வழங்கிய படக்குழுவினருக்கும், குறிப்பாக கவினுக்கும் நன்றி தெரிவித்தார். மழை, புயல் உள்ளிட்ட பல்வேறு சவால்களுக்கு மத்தியில் படப்பிடிப்பை வெற்றிகரமாக நிறைவு செய்த இயக்குநர் விஷ்ணுவையும் அவர் பாராட்டினார்.

நடிகை காவ்யா, ‘ஹாய்’ படத்திற்கு ரசிகர்களிடம் இருந்து கிடைத்து வரும் அன்பும் வரவேற்பும் மகிழ்ச்சியளிப்பதாக தெரிவித்தார். கல்லூரி காலத்தில் நடிகை ராதிகா சரத்குமாரை பார்த்து அவரைப் போன்ற ஒரு நடிகையாக வேண்டும் என கனவு கண்டதாகவும், தற்போது அவருடனேயே இணைந்து நடித்திருப்பது தனது கனவு நனவான தருணம் என்றும் கூறினார்.

இயக்குநர் விஷ்ணு எடவன், ‘ஹாய்’ தனது முதல் திரைப்படம் என்பதால் இந்த வெற்றி தனக்கு மிகவும் முக்கியமானது என்று தெரிவித்தார். தனது மீது நம்பிக்கை வைத்து இப்படத்தை உருவாக்க உதவிய தயாரிப்பாளர்கள் விக்னேஷ் சிவன், நயன்தாரா, எஸ். எஸ். லலித்குமார் உள்ளிட்ட அனைவருக்கும் நன்றி தெரிவித்தார்.

மேலும், படத்தில் நடித்த மூத்த மற்றும் இளம் நடிகர்கள் அனைவரும் முழுமையான ஒத்துழைப்பை வழங்கியதாகவும், குறிப்பாக ராதிகா சரத்குமார், பிரபு, கே. பாக்யராஜ், சுஹாசினி உள்ளிட்ட நடிகர்களை அந்தந்த கதாபாத்திரங்களில் வேறு யாராலும் கற்பனை செய்ய முடியாத அளவுக்கு அவர்கள் சிறப்பாக பங்களித்ததாகவும் அவர் குறிப்பிட்டார்.

தனக்கும் இசையமைப்பாளர் ஜென் மார்ட்டினுக்கும் பள்ளிப் பருவத்திலிருந்தே நட்பு தொடர்வதாகவும், அப்போது இயக்குநராக தான் வர வேண்டும் என்றும், ஜென் மார்ட்டின் இசையமைப்பாளராக வேண்டும் என்றும் பேசிக்கொண்டதாகவும் விஷ்ணு எடவன் தெரிவித்தார். தனது முதல் படத்திற்கே ஜென் மார்ட்டின் இசையமைத்திருப்பது தனக்கு மிகவும் உணர்வுப்பூர்வமான மகிழ்ச்சி என்றும் கூறினார்.

நடிகை ராதிகா சரத்குமார், ‘ஹாய்’ படக்குழுவினருக்கு வாழ்த்து தெரிவித்ததுடன், இன்றைய சூழலில் ஒரு திரைப்படம் வெற்றிகரமாக திரையரங்குகளில் ஓடுவது சவாலான விஷயம் என்றும், பல்வேறு சவால்களை கடந்து படத்தை வெற்றிகரமாக கொண்டு வந்த இயக்குநர் மற்றும் படக்குழுவினரை பாராட்டுவதாகவும் தெரிவித்தார்.

நடிகர் பிரபு, ‘ஹாய்’ படத்தில் பணியாற்றிய அனுபவம் மிகவும் மகிழ்ச்சியானதாக இருந்ததாகக் கூறினார். இயக்குநர் விஷ்ணு தனக்கு நல்ல கதாபாத்திரம் வழங்கியதற்கும், தயாரிப்பாளர் லலித்குமார் மற்றும் நயன்தாராவுக்கும் நன்றி தெரிவித்தார். நடிகர் கவின் சிறப்பாக நடித்திருப்பதாக பாராட்டிய அவர், கவினிடம் திறமையும் நல்ல எதிர்காலத்திற்கான வாய்ப்புகளும் இருப்பதாகவும் தெரிவித்தார். ஜென் மார்ட்டினின் இசையும் படத்திற்கு முக்கிய பலமாக அமைந்துள்ளதாக அவர் குறிப்பிட்டார்.

நடிகர் கவின், ‘ஹாய்’ படத்திற்கு ரசிகர்கள் அளித்து வரும் ஆதரவு தங்களுக்கு மிகுந்த மகிழ்ச்சியையும் ஆச்சரியத்தையும் அளித்துள்ளதாக தெரிவித்தார். குடும்பத்துடன் திரையரங்குகளுக்கு வரும் ரசிகர்கள் படத்தை சிரித்து, மகிழ்ந்து, சில இடங்களில் உணர்ச்சிவசப்பட்டு ரசிப்பதைப் பார்க்கும்போது, படத்தை உருவாக்கிய நோக்கம் நிறைவேறிய திருப்தி கிடைப்பதாகக் கூறினார்.

குடும்பங்கள் ஒன்றாக அமர்ந்து கவலைகளை மறந்து ரசிக்கக்கூடிய எளிமையான பொழுதுபோக்கு திரைப்படமாக ‘ஹாய்’ உருவாக்கப்பட்டுள்ளதாகவும், இந்த வார இறுதியிலும் ரசிகர்கள் தொடர்ந்து படத்திற்கு ஆதரவு அளிக்க வேண்டும் என்றும் கவின் கேட்டுக்கொண்டார்.

அறிமுக இயக்குநர் விஷ்ணு எடவன் இயக்கத்தில் உருவாகியுள்ள ‘ஹாய்’ திரைப்படத்தில் நயன்தாரா, கவின், கே. பாக்யராஜ், பிரபு, ராதிகா சரத்குமார், விடிவி கணேஷ், சத்யன், ‘ஆதித்யா’ கதிர், குரேஷி உள்ளிட்ட பலர் முக்கிய கதாபாத்திரங்களில் நடித்துள்ளனர்.

ராஜேஷ் சுக்லா ஒளிப்பதிவு செய்துள்ள இப்படத்திற்கு ஜென் மார்ட்டின் இசையமைத்துள்ளார். படத்தொகுப்பை பிலோமின் ராஜ் மேற்கொண்டுள்ள நிலையில், கலை இயக்கத்தை எஸ். கண்ணன் கவனித்துள்ளார்.

ஜீ ஸ்டுடியோஸ், தி ரவுடி பிக்சர்ஸ் மற்றும் செவன் ஸ்கிரீன் ஸ்டுடியோ நிறுவனங்கள் சார்பில் நயன்தாரா, விக்னேஷ் சிவன் மற்றும் எஸ். எஸ். லலித்குமார் ஆகியோர் இணைந்து தயாரித்துள்ள இப்படம், தற்போது ரசிகர்களின் வரவேற்புடன் திரையரங்குகளில் தொடர்ந்து வெற்றிகரமாக ஓடிக்கொண்டிருக்கிறது.