ஓரம் போ… ஓரம் போ… ‘டோரதி’ வண்டி வருது! – தமிழ்நாடு முழுவதும் பயணிக்கும் ‘டோரதி’ கேரவன்!

கார்த்திக் சுப்புராஜ் இயக்கத்தில் பெரும் எதிர்பார்ப்பை ஏற்படுத்தியுள்ள ‘டோரதி’ திரைப்படத்தின் விளம்பரப் பணிகள் வித்தியாசமான முறையில் தொடங்கியுள்ளன. செப்டம்பர் 25-ம் தேதி உலகம் முழுவதும் திரையரங்குகளில் வெளியாகவுள்ள இப்படத்தை ரசிகர்களிடம் நேரடியாகக் கொண்டு சேர்க்கும் வகையில், ‘டோரதி’ திரைப்படத்தின் பிரத்யேக கேரவன் தமிழ்நாடு முழுவதும் பயணிக்கத் தொடங்கியுள்ளது.

மதுரையில் இருந்து தொடங்கியுள்ள இந்த ஸ்பெஷல் லாரி ரோடு ட்ரிப், ‘டோரதி’ திரைப்படத்தின் உலகத்தையும், இசைஞானி இளையராஜாவின் இசையையும் ரசிகர்களிடம் நேரடியாகக் கொண்டு செல்லும் வகையில் வடிவமைக்கப்பட்டுள்ளது. திரைப்படத்தின் கதையுலகில் முக்கியமான இடம் பெறும் ஒரு அம்சத்தால் ஈர்க்கப்பட்டு இந்த கேரவன் பிரத்யேகமாக உருவாக்கப்பட்டுள்ளது.

கடந்த பல தசாப்தங்களாக தலைமுறைகளையும், மொழிகளையும், புவியியல் எல்லைகளையும் கடந்து ரசிகர்களிடம் பயணித்து வரும் இளையராஜாவின் இசை, தற்போது ‘டோரதி’ திரைப்படத்துடனும் இணைந்துள்ளது. இப்படத்திற்கு இளையராஜா இசையமைத்துள்ள நிலையில், அவரது ஒரிஜினல் ஸ்கோர் திரைப்படத்தின் முக்கியமான அம்சமாக அமைந்துள்ளது.

‘டோரதி’ கேரவன் வெறும் விளம்பர வாகனமாக மட்டுமின்றி, திரைப்படத்தின் Original Score இசையையும் தன்னுடன் எடுத்துச் செல்கிறது. தமிழ்நாட்டின் பல்வேறு நகரங்கள் மற்றும் ஊர்களைக் கடந்து செல்லும் இந்த கேரவன் மூலம், திரையரங்கு வெளியீட்டுக்கு முன்பாகவே ரசிகர்களுக்கு ‘டோரதி’ படத்தின் உலகத்தை அறிமுகப்படுத்தும் முயற்சி மேற்கொள்ளப்பட்டுள்ளது.

மதுரையில் தொடங்கிய இந்த ரோடு ட்ரிப் நிகழ்வில், படத்தின் முக்கிய கதாபாத்திரங்களில் ஒருவரான ரிஷிகாந்த், கேரவனை ஓட்டியபடி பயணத்தைத் தொடங்கி வைத்தார். மதுரை, தேனி மற்றும் திண்டுக்கல் வழியாகப் பயணிக்கும் கேரவன், தொடர்ந்து பொள்ளாச்சி மற்றும் கோயம்புத்தூர் பகுதிகளுக்கும் செல்ல உள்ளது.

இந்தப் பயணத்தில் தேனி முக்கியத்துவம் பெறுகிறது. இசைஞானி இளையராஜா பிறந்த ஊரான தேனி வழியாக கேரவன் பயணிப்பதுடன், ‘டோரதி’ படத்தின் சில காட்சிகள் படமாக்கப்பட்ட திண்டுக்கல் பகுதிகளையும் கடந்து செல்கிறது. இதனால் திரைப்படத்தின் கதையுலகம், படப்பிடிப்பு நடைபெற்ற இடங்கள் மற்றும் இளையராஜாவின் இசை ஆகிய மூன்றையும் ஒன்றாக இணைக்கும் வகையில் இந்தப் பிரமோஷன் பயணம் அமைந்துள்ளது.

கார்த்திக் சுப்புராஜின் பத்தாவது திரைப்படமாக உருவாகியுள்ள ‘டோரதி’, அறிவிக்கப்பட்டது முதலே ரசிகர்கள் மத்தியில் கவனம் பெற்றது. இப்படம் 2026 Toronto International Film Festival-ல் உலகத் திரையிடலைக் கொண்டிருந்ததுடன், செப்டம்பர் 25-ம் தேதி உலகளவில் திரையரங்குகளில் வெளியாகிறது.

சமீபத்தில் வெளியான இப்படத்தின் டிரெய்லரும் படத்தின் மீதான எதிர்பார்ப்பை அதிகரித்துள்ளது. கிராமப்புற தமிழ்நாட்டின் பின்னணியில் நட்பு, காதல், வன்முறை, சாதியப் பிளவுகள் மற்றும் மனித உணர்வுகளை மையமாகக் கொண்ட உலகத்தை டிரெய்லர் அறிமுகப்படுத்துகிறது.

‘டோரதி’ படத்தின் மற்றொரு முக்கியமான சிறப்பம்சமாக இளையராஜாவின் இசை அமைந்துள்ளது. கார்த்திக் சுப்புராஜ் – இளையராஜா கூட்டணியில் உருவாகும் முதல் திரைப்படமான இப்படத்திற்காக உருவாக்கப்பட்டுள்ள ஒரிஜினல் சவுண்ட் டிராக் ரசிகர்களிடையே தனி கவனத்தைப் பெற்றுள்ளது.

இப்படத்தில் கீர்த்தி சுரேஷ், சனந்த், ரிஷிகாந்த், முத்துக்குமார் உள்ளிட்ட பலர் நடித்துள்ளனர். கார்த்திக் சுப்புராஜ் எழுதி இயக்கியுள்ள ‘டோரதி’ திரைப்படத்தை ஜோதி தேஷ்பாண்டே, குணீத் மோங்கா கபூர் மற்றும் அச்சின் ஜெயின் ஆகியோர் தயாரித்துள்ளனர். ஜியோ ஸ்டூடியோஸ் மற்றும் சிக்யா என்டர்டெயின்மென்ட் இப்படத்தை வழங்குகின்றன. சிக்யா என்டர்டெயின்மென்ட் மற்றும் தம்மம் ஃபிலிம்ஸ் இணைந்து இப்படத்தைத் தயாரித்துள்ளன.

எஸ். திருநாவுக்கரசு ஒளிப்பதிவை மேற்கொண்டுள்ள நிலையில், கணேஷ் சிவா படத்தொகுப்புப் பணிகளை கவனித்துள்ளார். பவன் நரேந்திரா நிர்வாக தயாரிப்பாளராகவும், சரவணன் சந்திரன் கூடுதல் திரைக்கதை எழுத்தாளராகவும் பணியாற்றியுள்ளனர். ஆக்ஷன் இயக்குநர் தினேஷ் சுப்பராயன், நடன இயக்குநர் ஷெரிஃப் எம்., ஆடை வடிவமைப்பாளர் பிரவீன் ராஜா, சிங்க் சவுண்ட் டிசைனர் தாமஸ் குரியன் மற்றும் தயாரிப்பு வடிவமைப்பாளர் குமார் கங்கப்பன் ஆகியோர் தொழில்நுட்பக் குழுவில் இடம்பெற்றுள்ளனர்.

இசைஞானி இளையராஜாவின் இசையுடன் தமிழ்நாடு முழுவதும் பயணிக்கும் ‘டோரதி’ கேரவன், திரைப்படத்தின் வெளியீட்டுக்கு முன்பாகவே ரசிகர்களை நேரடியாகச் சந்திக்கும் வித்தியாசமான விளம்பர முயற்சியாக அமைந்துள்ளது. செப்டம்பர் 25-ம் தேதி திரையரங்குகளில் வெளியாகும் ‘டோரதி’ திரைப்படத்திற்கான எதிர்பார்ப்பை இந்தப் பயணம் மேலும் அதிகரித்துள்ளது.