துபாயில் வெளியான ‘தி ரீல் ஃபைல்ஸ்’ சீசன் 4 டிரெய்லர் – இயக்குநர் ஜெனோபர் பாத்திமாவைப் பாராட்டிய சோஹைல் கான்!

துபாயை மையமாகக் கொண்டு உருவாகியுள்ள ஆந்தாலஜி தொடரான ‘தி ரீல் ஃபைல்ஸ்’ நான்காவது சீசனின் அதிகாரப்பூர்வ டிரெய்லர் வெளியிடப்பட்டுள்ளது. இதன் டிரெய்லர் வெளியீட்டு நிகழ்வில் சிறப்பு விருந்தினராகக் கலந்துகொண்ட பாலிவுட் நடிகர் சோஹைல் கான், இயக்குநர் ஜெனோபர் பாத்திமாவையும் படக்குழுவினரையும் பாராட்டியதுடன், எதிர்காலத்தில் ஜெனோபர் பாத்திமாவுடன் இணைந்து பணியாற்ற விருப்பம் தெரிவித்தார்.

தொடக்கத்தில் திகில் கதைகளை மையமாகக் கொண்ட குறும்பட முயற்சியாக உருவான ‘தி ரீல் ஃபைல்ஸ்’, தற்போது பலதரப்பட்ட பார்வையாளர்களைக் கவரும் சினிமா ஆந்தாலஜி தொடராக வளர்ந்துள்ளது. ஒவ்வொரு சீசனிலும் புதிய கதைக்களங்களையும் வித்தியாசமான முயற்சிகளையும் அறிமுகப்படுத்தி வரும் இந்தத் தொடரின் மூன்றாவது சீசனில், பாலிவுட் நடிகர் ராகுல் தேவ் இணைந்திருந்தார். அந்தச் சீசனில் உளவியல் சார்ந்த கதைக்களமும் இடம்பெற்றிருந்தது.

இதன் தொடர்ச்சியாக வெளியாகவுள்ள நான்காவது சீசனில் அப்துல் ரொசக், இப்ராஹிம் அல் சமாதி, ஜெனோபர் பாத்திமா மற்றும் ‘சாய் வித் அகமது’ நிகழ்ச்சியின் மூலம் பிரபலமான அகமது அல் மர்சூகி உள்ளிட்டோர் நடித்துள்ளனர். அப்ரா பர்ஹானா மற்றும் ஜெனோபர் பாத்திமா ஆகியோர் இணைந்து இந்தத் தொடரை இயக்கியுள்ளனர்.

ஊடகத்துறையினர் மற்றும் சமூக வலைதளப் பிரபலங்கள் பங்கேற்ற டிரெய்லர் வெளியீட்டு நிகழ்வில், சோஹைல் கான் சிறப்பு விருந்தினராகக் கலந்துகொண்டார். அப்போது தொடரின் டிரெய்லரையும் படக்குழுவினரின் முயற்சியையும் பாராட்டிய அவர், இயக்குநர் ஜெனோபர் பாத்திமாவுடன் எதிர்காலத்தில் இணைந்து பணியாற்றத் தயாராக இருப்பதாகவும் தெரிவித்தார்.

‘தி ரீல் ஃபைல்ஸ்’ தொடரின் பயணம் குறித்து இயக்குநர் ஜெனோபர் பாத்திமா பேசுகையில், “குறும்பட வடிவிலான கதைசொல்லலில் ஒரு எளிய முயற்சியாகத் தொடங்கிய இந்தப் பயணம், நான் ஆரம்பத்தில் கற்பனை செய்ததைவிடப் பெரிய ஒன்றாக வளர்ந்துள்ளது. ஒவ்வொரு சீசனும் புதிய முயற்சிகளை மேற்கொள்ளவும், பலருடன் இணைந்து பணியாற்றவும், எங்களது எல்லைகளை விரிவுபடுத்தவும் வாய்ப்பளித்துள்ளது” என்றார்.

நான்காவது சீசனில் புதிய கதைகளின் தொகுப்பு இடம்பெறவுள்ளது. இதில் முதல் கதையாக ‘தி கான்ஜர்’ வெளியாகவுள்ளது. தற்போது அதிகாரப்பூர்வ டிரெய்லர் வெளியிடப்பட்டுள்ள நிலையில், தொடரின் ஓடிடி தளம் மற்றும் வெளியீட்டுத் தேதி குறித்த அறிவிப்புகள் விரைவில் வெளியாகும் என எதிர்பார்க்கப்படுகிறது.