“அவள் என் தீராகணமே…” – மித்துன் மாணிக்கத்தின் வரிகளில் ‘ஃபேமிலி பாய்’ முதல் பாடல் வெளியீடு!

தமிழ் சினிமாவில் நம்பிக்கை அளிக்கும் வகையில் வளர்ந்து வரும் திறமையான நடிகரான மித்துன் மாணிக்கம், கதையின் நாயகனாக நடித்திருப்பதுடன், இயக்குநராகவும் பணியாற்றியுள்ள திரைப்படம் ‘ஃபேமிலி பாய்’ (Family Boy). உண்மைச் சம்பவத்தைத் தழுவி, ஃபேமிலி டிராமா, ஆக்ஷன், திரில்லர் எனப் பல அம்சங்களுடன் உருவாகியுள்ள இப்படம், எதிர்வரும் டிசம்பர் 11-ம் தேதி உலகம் முழுவதும் திரையரங்குகளில் வெளியாகிறது.

காதல் மெலோடியாக வெளியான ‘தீராகணம்’

இந்நிலையில், இப்படத்தில் இடம்பெற்றுள்ள முதல் பாடலான ‘தீராகணம்’ பாடலும், அதற்கான லிரிக்கல் வீடியோவும் தற்போது வெளியாகியுள்ளன. “சரியா.. சதியா.. நீ என் சகி.. மதியா.. விதியா.. நீ கண்மணி.. இறையா.. இரையா.. இதயம் நீயா..” எனத் தொடங்கும் இந்தப் பாடலைப் படத்தின் இயக்குநர் மித்துன் மாணிக்கம் எழுதியுள்ளார். பின்னணிப் பாடகர் ஆதித்யா RK, பின்னணிப் பாடகிகள் மால்வி சுந்தரேசன் மற்றும் அபர்ணா நாராயணன் ஆகியோர் இணைந்து பாடியுள்ளனர்.

காதல் உணர்வுகளை மென்மையான மெலோடி இசையில் வெளிப்படுத்தும் வகையில் உருவாகியுள்ள இப்பாடல், இசை ரசிகர்களைக் கடந்து இளைய தலைமுறையினரிடையேயும் கவனம் ஈர்த்து வருகிறது.

கவனம் ஈர்க்கும் கவிதை வரிகள்

பாடலுக்கான லிரிக்கல் வீடியோவின் தொடக்கத்தில் இடம்பெறும், “அணுவும் அண்டமும்… அவளும் யானும்… அனைத்தும் காதலே… அவள் என் தீராகணமே…” என்ற கவிதை வரிகள் ரசிகர்களின் கவனத்தை ஈர்க்கின்றன. பாடலாசிரியராகவும் இயக்குநராகவும் மித்துன் மாணிக்கம் வெளிப்படுத்தியுள்ள கவித்துவமான எழுத்து, பாடலை முழுமையாகக் கேட்கும் ஆவலைத் தூண்டுகிறது.

நடிகர் சூர்யாவால் அடையாளம் காணப்பட்ட திரைப் பொக்கிஷம் என மித்துன் மாணிக்கத்தைப் படக்குழு குறிப்பிடும் நிலையில், அவரது எழுத்தாற்றலும் படைப்பாற்றலும் இந்தப் பாடலின் மூலம் மீண்டும் கவனம் பெற்றுள்ளன.

நட்சத்திரக் கூட்டணியுடன் உருவாகும் ‘ஃபேமிலி பாய்’

‘ஃபேமிலி பாய்’ திரைப்படத்தில் மித்துன் மாணிக்கம், எம். சுகுமார், சரண் சுதாகரன், அனுகிரஹா எஸ். நம்பியார், நிகிலா சங்கர், அனிதா சம்பத், ‘பசங்க’ சிவகுமார், சிவம், அருள் தாஸ், பி. எல். தேனப்பன் உள்ளிட்ட பலர் நடித்துள்ளனர்.

கார்த்திக் கே. கதிரவன் ஒளிப்பதிவு செய்துள்ள இப்படத்திற்கு நிர்மல் JP இசையமைத்துள்ளார். படத்தொகுப்புப் பணிகளை ஜிஜேந்திரன் V கவனிக்க, கலை இயக்கத்தை C. K. முஜிபுர் ரஹ்மான் மேற்கொண்டுள்ளார்.

மெக்கானிக் பிக்சர்ஸ் (Mechanic Pictures) நிறுவனம் சார்பில் மித்துன் மாணிக்கம் தயாரித்துள்ள இப்படத்தை, மில்லினியல்ஸ் மூவி புரொடக்ஷன் LLP (Milliennials Movie Production LLP) நிறுவனம் சார்பில் முஹம்மத் கனி ஃபைசல் மற்றும் டாக்டர் கே. அருண் ஆறுமுகம் ஆகியோர் இணைந்து தயாரித்துள்ளனர். பலூன் பிக்சர்ஸ் நிறுவனம் இப்படத்தைத் தமிழகம் முழுவதும் வழங்குகிறது.

முதல் பாடலான ‘தீராகணம்’ மூலம் எதிர்பார்ப்பை ஏற்படுத்தியுள்ள ‘ஃபேமிலி பாய்’, டிசம்பர் 11-ம் தேதி உலகம் முழுவதும் திரையரங்குகளில் வெளியாகிறது.