உலக மீனவர் தினத்தை முன்னிட்டு ‘தமிழினி’ திரைப்படத்தின் ஃபர்ஸ்ட் லுக் வெளியீடு – மீனவக் குடும்பங்களின் வாழ்க்கையைப் பேசும் புதிய திரைப்படம்!

7

மீனவ சமூக மக்களின் வாழ்க்கை, அவர்களின் உணர்வுகள், குடும்பப் பிணைப்புகள் மற்றும் வாழ்வியல் சவால்களை மையமாகக் கொண்டு உருவாகியுள்ள புதிய தமிழ்த் திரைப்படம் ‘தமிழினி’. உலக மீனவர் தினத்தை முன்னிட்டு, மீனவ சமூக மக்களுக்கு மரியாதை செலுத்தும் விதமாக இப்படத்தின் ஃபர்ஸ்ட் லுக் வெளியிடப்பட்டுள்ளது.

டி.பி. சரவணன் மற்றும் விஜிலா சரவணன் தயாரிப்பில், கணேஷ் மூர்த்தி எழுதி இயக்கியுள்ள இப்படம், கடலோர மீனவக் குடும்பங்களின் பின்னணியில் காதல், குடும்பம், இழப்பு மற்றும் பொறுப்பு ஆகிய உணர்வுகளைப் பேசுகிறது. தனிப்பட்ட மகிழ்ச்சிக்கும், தங்களைச் சார்ந்திருப்பவர்களின் எதிர்காலத்திற்கும் இடையே மனிதர்கள் எதிர்கொள்ளும் தேர்வுகளையும், அந்த முடிவுகள் ஏற்படுத்தும் உணர்வுப்பூர்வமான தாக்கங்களையும் கதைக்களமாகக் கொண்டுள்ளது.

படம் குறித்து இயக்குநர் கணேஷ் மூர்த்தி கூறுகையில், “அன்பு, உறவுகள் மற்றும் நம் கட்டுப்பாட்டை மீறிய சூழல்களால் வாழ்க்கை எவ்வாறு மாறுகிறது என்பதைப் பேசும் கதைதான் ‘தமிழினி’. சில நேரங்களில் நம்முடைய மகிழ்ச்சியைத் தாண்டி, நம்மைச் சார்ந்திருப்பவர்களையும் அவர்களின் எதிர்காலத்தையும் பற்றிச் சிந்திக்க வேண்டிய சூழல் வாழ்க்கையில் ஏற்படும். அத்தகைய முடிவுகள் ஏற்படுத்தும் உணர்வுப்பூர்வமான தாக்கத்தையும், மீனவக் குடும்பங்களிடம் காணப்படும் மன உறுதியையும் வலிமையையும் இப்படத்தில் பேச விரும்பினேன். குறிப்பிட்ட ஒரு வாழ்க்கை முறையின் பின்னணியில் கதை அமைந்திருந்தாலும், இதில் பேசப்படும் உணர்வுகள் அனைவருக்கும் பொதுவானவை” என்றார்.

சன் மியூசிக் நிகழ்ச்சித் தொகுப்பாளரும் யூடியூபருமான விஜே ஆஷிக் மற்றும் பிரதீப் ராஜ் ஆகியோர் கதாநாயகர்களாக நடித்துள்ளனர். ‘என்ன விலை’ திரைப்படத்தில் சமீபத்தில் நடித்த ஷாஷா சிவகுமார் மற்றும் புஷ்பலதா கதாநாயகிகளாக நடித்துள்ளனர். இவர்களுடன் ‘தலைவன் தலைவி’ படப்புகழ் தீபா சங்கர், ‘திருப்பாச்சி’ படத்தில் நடித்த பெஞ்சமின், ‘சத்ரியன்’ படத்தில் நடித்த வின்சென்ட் ராய் மற்றும் தயாரிப்பாளர் டி.பி. சரவணன் உள்ளிட்டோர் முக்கிய கதாபாத்திரங்களில் நடித்துள்ளனர்.

விஜய் டிவியின் ‘சூப்பர் சிங்கர்’ நிகழ்ச்சி மூலம் புகழ்பெற்ற சந்தோஷ் பாலாஜி இப்படத்திற்கு இசையமைத்துள்ளார். படத்தின் பாடல்களை ஜி.வி. பிரகாஷ் குமார், சைந்தவி, சிவாங்கி கிருஷ்ணகுமார், சாம் விஷால் மற்றும் சந்தோஷ் பாலாஜி ஆகியோர் பாடியுள்ளனர். ஹசிம், வைரபாரதி மற்றும் மாதேஷ் சூர்யகுமார் ஆகியோர் பாடல்களை எழுதியுள்ளனர்.

ஒளிப்பதிவு பணிகளை விஜய் வெங்கட் மற்றும் சரண்யா கணேஷ் கவனித்துள்ளனர். திரைக்கதை மற்றும் படத்தொகுப்புப் பணிகளை இயக்குநர் கணேஷ் மூர்த்தியே மேற்கொண்டுள்ளார். கதை மற்றும் வசனங்களை தேவா, கணேஷ் மூர்த்தி இணைந்து எழுதியுள்ளனர்.

தமிழகத்தின் தென்கடலோரப் பகுதிகளான முட்டம், உவரி, கடியப்பட்டினம், குளச்சல், திசையன்விளை, கூட்டப்பனை, பெரியதாழை மற்றும் மணப்பாடு என மொத்தம் எட்டு இடங்களில் இப்படத்தின் படப்பிடிப்பு நடைபெற்றுள்ளது. வெறும் 24 நாட்களில் படப்பிடிப்பு முழுமையாக நிறைவடைந்துள்ளது. தற்போது இறுதிக்கட்டப் பின்னணி பணிகள் விறுவிறுப்பாக நடைபெற்று வருகின்றன.

உலக மீனவர் தினத்தை முன்னிட்டு வெளியிடப்பட்டுள்ள ‘தமிழினி’ திரைப்படத்தின் ஃபர்ஸ்ட் லுக், மீனவ சமூக மக்களின் வாழ்க்கையையும் அவர்களின் உணர்வுகளையும் திரையில் பதிவு செய்யும் படைப்பாக இப்படம் உருவாகியிருப்பதை வெளிப்படுத்துகிறது. விரைவில் இப்படம் திரையரங்குகளில் வெளியாகத் தயாராகி வருகிறது.