இந்தியாவின் முதல் ஏ.ஐ. ஒருங்கிணைந்த செங்குத்து பல்கலைக்கழக வளாகத்தை திறந்து வைத்தார் பத்மஸ்ரீ ஸ்ரீதர் வேம்பு!

வேல்ஸ் பல்கலைக்கழகம், திருவான்மியூரில் இந்தியாவின் முதல் செயற்கை நுண்ணறிவு (AI) ஒருங்கிணைந்த செங்குத்து பல்கலைக்கழக வளாகத்தை திறந்து வைத்து, உயர்கல்வித் துறையில் புதிய மைல்கல்லை எட்டியுள்ளது. இந்த புதிய வளாகத்தை Zoho நிறுவனத்தின் இணை நிறுவுநரும் தலைமை விஞ்ஞானியுமான பத்மஸ்ரீ ஸ்ரீதர் வேம்பு திறந்து வைத்தார்.

இந்நிகழ்வில் ஐக்கிய அரபு அமீரகத்தின் கூட்டாட்சி தேசிய கவுன்சில் உறுப்பினரும், எமிரேட்ஸ் ஏர்லைன் ஃபவுண்டேஷன் இயக்குநர் குழு உறுப்பினருமான மேதகு அஹ்மத் மீர் ஹாஷிம் அஹ்மத் கூரி கவுரவ விருந்தினராகவும், துபாயைச் சேர்ந்த Economic Group Holdings LLC நிறுவனத்தின் நிர்வாக இயக்குநர் எம். எப். ராவூஃப் அலி சிறப்பு விருந்தினராகவும் கலந்து கொண்டனர்.

வேல்ஸ் பல்கலைக்கழகத்தின் நிறுவனர்-வேந்தர் டாக்டர் ஐசரி கே. கணேஷ் தலைமையில் நடைபெற்ற இந்நிகழ்வில், வேல்ஸ் கல்வி நிறுவனங்களின் துணைத் தலைவர் டாக்டர் ப்ரீத்தா கணேஷ் முன்னிலை வகித்தார்.

திருவான்மியூரில் அமைந்துள்ள இந்த புதிய வளாகம், செயற்கை நுண்ணறிவு தொழில்நுட்பம், நவீன உள்கட்டமைப்பு மற்றும் தொழில்துறை சார்ந்த கற்றல் முறைகளை ஒருங்கிணைக்கும் வகையில் உருவாக்கப்பட்டுள்ளது. AI-இயங்கும் வகுப்பறைகள், ஸ்மார்ட் கற்றல் வசதிகள், நவீன ஆய்வகங்கள், புதுமை மையங்கள், டிஜிட்டல் நூலகங்கள் மற்றும் உலகத் தரத்திலான மாணவர் வசதிகளுடன் இந்த வளாகம் வடிவமைக்கப்பட்டுள்ளது.

மேலும் Intel Unnati, TCS iON, Microsoft மற்றும் Oracle Academy நிறுவனங்களுடன் இணைந்து தொழில்–கல்வி சிறப்பு மையங்கள் அமைக்கப்பட்டுள்ளன. இதன் மூலம் செயற்கை நுண்ணறிவு, கிளவுட் கம்ப்யூட்டிங், உயர் செயல்திறன் கணினி (High Performance Computing) உள்ளிட்ட எதிர்கால தொழில்நுட்பங்களில் மாணவர்களுக்கு நேரடி பயிற்சி வழங்கப்பட உள்ளது.

நிகழ்ச்சியின் போது, வேல்ஸ் பல்கலைக்கழகமும் துபாயைச் சேர்ந்த Aspin Holding Group நிறுவனமும் விமானக் கல்வி, விமானப் போக்குவரத்து, தொழில்துறை பயிற்சி, மாணவர் பரிமாற்றம் மற்றும் சர்வதேச வேலைவாய்ப்பு வாய்ப்புகளை மேம்படுத்தும் நோக்கில் புரிந்துணர்வு ஒப்பந்தத்தில் (MoU) கையெழுத்திட்டன. அதேபோல், செயற்கை நுண்ணறிவு, ஆராய்ச்சி, புதுமை மற்றும் திறன் மேம்பாட்டுத் துறைகளில் இணைந்து செயல்பட Zoho நிறுவனத்துடனும் விரைவில் புரிந்துணர்வு ஒப்பந்தம் மேற்கொள்ளப்படவுள்ளதாக அறிவிக்கப்பட்டது.

நிகழ்ச்சியின் ஒரு பகுதியாக, பத்மஸ்ரீ ஸ்ரீதர் வேம்பு மாணவர்களுடன் கலந்துரையாடி, செயற்கை நுண்ணறிவு, தொழில்முனைவு, ஆராய்ச்சி மற்றும் இந்தியாவின் தொழில்நுட்ப எதிர்காலம் குறித்து தனது அனுபவங்களை பகிர்ந்து கொண்டார். உலகளாவிய போட்டியில் இந்தியா முன்னேற வேண்டுமெனில், அடிப்படை அறிவியல் முதல் மேம்பட்ட டிஜிட்டல் தொழில்நுட்பங்கள் வரை அனைத்திலும் தன்னிறைவை அடைய வேண்டும் என்றும், எதிர்காலத்தில் Zoho மற்றும் வேல்ஸ் பல்கலைக்கழகம் பல்வேறு துறைகளில் இணைந்து செயல்பட ஆர்வமாக இருப்பதாகவும் அவர் தெரிவித்தார்.

உரையாற்றிய வேல்ஸ் பல்கலைக்கழகத்தின் நிறுவனர்-வேந்தர் டாக்டர் ஐசரி கே. கணேஷ், உலகின் வேகமான தொழில்நுட்ப மாற்றங்களுக்கு ஏற்ப கல்வியும் மாற வேண்டிய அவசியம் ஏற்பட்டுள்ளதாக குறிப்பிட்டார். திருவான்மியூரில் தொடங்கப்பட்டுள்ள இந்த AI ஒருங்கிணைந்த வளாகம், புதுமை, ஆராய்ச்சி, தொழில்முனைவு மற்றும் எதிர்காலத் திறன்களுடன் மாணவர்களை உருவாக்கும் கல்வி மையமாக திகழும் என்றார்.

மேலும் திண்டிவனத்தில் 350 ஏக்கர் பரப்பளவில் ஒருங்கிணைந்த பல்கலைக்கழக வளாகம், பெரியபாளையம் மருத்துவ வளாக விரிவாக்கம், அடையாறு மற்றும் ஹைதராபாத் வளாக மேம்பாடு உள்ளிட்ட எதிர்கால வளர்ச்சித் திட்டங்களையும் அவர் அறிவித்தார். தொழில்நுட்பம் மற்றும் தேச முன்னேற்றத்தில் பத்மஸ்ரீ ஸ்ரீதர் வேம்பு ஆற்றி வரும் பங்களிப்புகளையும், Zoho நிறுவனத்தின் “Nation First” கொள்கையையும் அவர் பாராட்டினார்.

வரவேற்புரையாற்றிய டாக்டர் ப்ரீத்தா கணேஷ், உலகத் தரத்திலான கற்றல் சூழலை மாணவர்களுக்கு வழங்குவதே வேல்ஸ் நிறுவனத்தின் நோக்கம் என்றும், உலகப் புகழ்பெற்ற ஆளுமைகள் கலந்து கொண்ட இந்த நிகழ்வு மாணவர்களுக்கு உத்வேகம் அளிக்கும் என்றும் தெரிவித்தார்.

கவுரவ விருந்தினராக கலந்து கொண்ட மேதகு அஹ்மத் மீர் ஹாஷிம் அஹ்மத் கூரி, வேல்ஸ் நிறுவனத்தின் வளர்ச்சியை பாராட்டியதுடன், எமிரேட்ஸ் விமான நிறுவனத்தின் வளர்ச்சியுடன் ஒப்பிட்டு பேசினார். இந்தியா–ஐக்கிய அரபு அமீரகம் இடையிலான கல்வி, விமானப் போக்குவரத்து மற்றும் புதுமைத் துறைகளின் ஒத்துழைப்பு மேலும் வலுப்பெற வேண்டும் என்றும் அவர் வலியுறுத்தினார்.

இந்த நிகழ்வின் மூலம், தொழில்–கல்வி இணைப்பு, செயற்கை நுண்ணறிவு, ஆராய்ச்சி மற்றும் உலகத் தரத்திலான கல்வி வாய்ப்புகளை ஒருங்கிணைத்து உயர்கல்வியை புதிய பரிமாணத்திற்கு கொண்டு செல்லும் வேல்ஸ் பல்கலைக்கழகத்தின் முயற்சி மேலும் வலுப்பெற்றுள்ளது. இந்தியாவின் எதிர்கால தொழில்நுட்பக் கல்விக்கு புதிய அடித்தளமாக இந்த திருவான்மியூர் வளாகம் அமையும் என்ற நம்பிக்கையையும் நிகழ்வில் பங்கேற்றோர் வெளிப்படுத்தினர்.