‘டோன்ட் ட்ரபிள் தி ட்ரபிள்’ டீசருக்கு ஜூனியர் என்.டி.ஆரின் பாராட்டு… நன்றி தெரிவித்த படக்குழு!

ஃபஹத் பாசில் நடிப்பில், அறிமுக இயக்குநர் ஷஷாங்க் யெலேட்டி இயக்கத்தில் உருவாகியுள்ள கற்பனை கலந்த பொழுதுபோக்கு திரைப்படமான ‘டோன்ட் ட்ரபிள் தி ட்ரபிள்’ (Don’t Trouble The Trouble) படத்தின் டீசருக்கு நடிகர் ஜூனியர் என்.டி.ஆர். பாராட்டு தெரிவித்ததையடுத்து, படக்குழு அவருக்கு சிறப்பு நன்றி தெரிவித்துள்ளது.

‘பாகுபலி’ உள்ளிட்ட பிரம்மாண்ட படங்களை தயாரித்த ஆர்கா மீடியா வொர்க்ஸ் நிறுவனத்துடன் இணைந்து, ஷோயிங் பிசினஸ் சார்பில் எஸ்.எஸ். கார்த்திகேயா தயாரித்துள்ள இப்படத்தை எஸ்.எஸ். ராஜமௌலி வழங்குகிறார்.

சமீபத்தில் வெளியான டீசர் ரசிகர்களிடையே நல்ல வரவேற்பைப் பெற்ற நிலையில், நடிகர் ஜூனியர் என்.டி.ஆர். தனது சமூக வலைதளப் பதிவில், “‘Don’t Trouble The Trouble’ டீசர் மனதை வருடும் வகையில் மிகவும் அழகாக உள்ளது. ஃபஹத் பாசில் அபாரமாக நடித்திருக்கிறார். குட்டி சசாரா மிகவும் க்யூட்டாக இருக்கிறார். பல ஆண்டுகளாக இந்த தருணத்திற்காக காத்திருந்த ஷஷாங்க் யெலேட்டிக்கு என் வாழ்த்துகள். தயாரிப்பாளராக அறிமுகமாகியுள்ள எஸ்.எஸ். கார்த்திகேயாவுக்கும் வாழ்த்துகள். உங்கள் அர்ப்பணிப்பும் உழைப்பும் இந்தப் படத்தில் நிச்சயம் பிரகாசிக்கும். வெற்றி பெறுங்கள்!” என்று பாராட்டியிருந்தார்.

இதையடுத்து, படக்குழு “Thank You NTR Garu” என்ற சிறப்பு போஸ்டரை வெளியிட்டு, ஜூனியர் என்.டி.ஆரின் வாழ்த்துகளுக்கும் ஊக்கத்திற்கும் மனமார்ந்த நன்றியை தெரிவித்துள்ளது.

ஃபஹத் பாசிலும் சிறுமி சசாராவும் இணைந்து நடித்துள்ள டீசர், மாயாஜாலம், நகைச்சுவை மற்றும் உணர்வுப்பூர்வமான தருணங்களால் ரசிகர்களின் கவனத்தை ஈர்த்துள்ளது. குறிப்பாக ஃபஹத் பாசிலின் வித்தியாசமான திரை தோற்றமும், குழந்தையுடனான காட்சிகளும் சமூக வலைதளங்களில் அதிகம் பேசப்பட்டு வருகின்றன.

காள பைரவா இசையமைத்துள்ள இப்படத்திற்கு சிறப்பான ஒளிப்பதிவும் காட்சியமைப்பும் மேலும் பலம் சேர்த்துள்ளதாக ரசிகர்கள் கருத்து தெரிவித்து வருகின்றனர்.

‘டோன்ட் ட்ரபிள் தி ட்ரபிள்’ திரைப்படம் வரும் செப்டம்பர் 11, 2026 அன்று உலகம் முழுவதும் திரையரங்குகளில் வெளியாகவுள்ளது. ஜூனியர் என்.டி.ஆரின் பாராட்டுக்குப் பிறகு, படத்தின் மீதான எதிர்பார்ப்பு மேலும் அதிகரித்துள்ளது.