சசிகுமார் நடிப்பில் ‘வதந்தி சீசன் 2 – தி மிஸ்டரி ஆஃப் மணி’ டிரெய்லர் வெளியீடு; ஆகஸ்ட் 7 முதல் பிரைம் வீடியோவில்!

பிரைம் வீடியோவின் விமர்சகர்களாலும் ரசிகர்களாலும் பாராட்டப்பட்ட தமிழ் ஒரிஜினல் சஸ்பென்ஸ் த்ரில்லர் தொடரான ‘வதந்தி’யின் அடுத்த அத்தியாயமான **‘வதந்தி சீசன் 2 – தி மிஸ்டரி ஆஃப் மணி’**யின் விறுவிறுப்பான டிரெய்லர் இன்று வெளியிடப்பட்டுள்ளது. குற்றவுணர்வு, ரகசியங்கள், வதந்திகள் மற்றும் மீண்டுவரும் உணர்வுகளை மையமாகக் கொண்ட இந்த க்ரைம்-இன்வெஸ்டிகேஷன் த்ரில்லர், ஆகஸ்ட் 7 முதல் பிரைம் வீடியோவில் பிரத்யேகமாக ஸ்ட்ரீமிங் செய்யப்பட உள்ளது.

ஆண்ட்ரூ லூயிஸ் உருவாக்கி, எழுதி, இயக்கியுள்ள இந்த எட்டு எபிசோடுகள் கொண்ட தொடரை, வால்வாட்சர் ஃபிலிம்ஸ் சார்பில் புஷ்கர் – காயத்ரி கிரியேட்டிவ் தயாரிப்பாளர்களாக உருவாக்கியுள்ளனர். சசிகுமார் SI மூசா ரஸா கதாபாத்திரத்தில் முதன்மை வேடத்தில் நடித்துள்ள நிலையில், யஷ்வந்த், அனகா மருதோரா, அபர்ணா தாஸ், விவேக் பிரசன்னா, ரேவதி சர்மா மற்றும் அர்ஜுன் நந்தகுமார் ஆகியோர் முக்கிய கதாபாத்திரங்களில் நடித்துள்ளனர்.

மதுரையின் செழுமையான கலாச்சாரப் பின்னணியையும், ஜல்லிக்கட்டு திருவிழாவின் பரபரப்பான சூழலையும் மையமாகக் கொண்டு உருவாகியுள்ள இந்த தொடரில், தேசிய நெடுஞ்சாலைத் திட்டப் பணிகளின் போது மனித எலும்புக்கூடு ஒன்று கண்டெடுக்கப்படுகிறது. அந்த விசாரணையை மேற்கொள்ளும் நேர்மையான காவல் அதிகாரி SI மூசா ரஸா, ‘மணி’ என்ற மர்ம கைதியைச் சுற்றிய புதிரான வழக்கிற்குள் இழுக்கப்படுகிறார். ஆரம்பத்தில் சாதாரண கொலை வழக்காகத் தோன்றும் விசாரணை, பின்னர் அரசியல், ஊடக அழுத்தம், மனித பலவீனங்கள் மற்றும் புதைக்கப்பட்ட ரகசியங்கள் நிறைந்த சிக்கலான மர்மப் பயணமாக மாறுகிறது.

வெளியாகியுள்ள டிரெய்லர், தொடக்கம் முதல் இறுதி வரை பதற்றத்தையும் சஸ்பென்ஸையும் தக்கவைத்துக் கொண்டு, ஒவ்வொரு காட்சியிலும் புதிய கேள்விகளை எழுப்புகிறது. விசாரணையின் ஒவ்வொரு கட்டத்திலும் உண்மையை நெருங்கும் போது, அதைவிட இருண்ட ரகசியங்கள் வெளிப்படத் தொடங்குவதால், தொடரின் மீதான எதிர்பார்ப்பை டிரெய்லர் மேலும் உயர்த்தியுள்ளது.

இந்தத் தொடரைப் பற்றி பேசிய இயக்குநர் ஆண்ட்ரூ லூயிஸ், “முதல் சீசனுக்கு கிடைத்த அன்பே இரண்டாவது அத்தியாயத்தை உருவாக்கும் நம்பிக்கையை அளித்தது. இந்த முறை ஒரு குற்றத்தைத் தீர்ப்பதைத் தாண்டி, அதிகாரம், மௌனம் மற்றும் சமூக அமைப்புகள் நீதியை எவ்வாறு பாதிக்கின்றன என்பதையும் ஆராயும் கதையை சொல்ல விரும்பினேன். மதுரையின் கலாச்சார பின்னணி இந்தக் கதைக்கு தனித்துவமான உயிரோட்டத்தை வழங்கியுள்ளது. சசிகுமார் உள்ளிட்ட அனைத்து நடிகர்களும் தங்கள் கதாபாத்திரங்களுக்கு ஆழத்தையும் உண்மைத்தன்மையையும் கொடுத்துள்ளனர். இந்த மர்மப் பயணம் பார்வையாளர்களை இறுதி வரை சிந்திக்க வைக்கும் என்று நம்புகிறேன்” என்றார்.

SI மூசா ரஸா கதாபாத்திரத்தில் நடித்துள்ள சசிகுமார், “மூசா ரஸாவின் நேர்மையும் உண்மைக்கான அவரது அர்ப்பணிப்பும் என்னை மிகவும் கவர்ந்தது. விசாரணையின் ஒவ்வொரு கட்டமும் அவரை ஒழுக்க ரீதியான கடினமான முடிவுகளுக்கு தள்ளுகிறது. இது ஒரு மர்மக் கதையாக மட்டுமல்ல, ஆழமான உணர்ச்சிப் பயணமாகவும் அமைந்துள்ளது. ஆண்ட்ரூ லூயிஸ், புஷ்கர், காயத்ரி, பிரைம் வீடியோ மற்றும் முழு படக்குழுவுடன் இணைந்து பணியாற்றியது சிறப்பான அனுபவம். பார்வையாளர்கள் இந்தக் கதையுடன் ஒன்றிணைந்து, இறுதி வரை உண்மையைத் தேடும் பயணத்தை ரசிப்பார்கள் என்ற நம்பிக்கை உள்ளது” என்று தெரிவித்தார்.

‘வதந்தி சீசன் 2 – தி மிஸ்டரி ஆஃப் மணி’ ஆகஸ்ட் 7 முதல் பிரைம் வீடியோவில் தமிழில் வெளியாகிறது. மேலும் தெலுங்கு மற்றும் இந்தி டப்பிங் பதிப்புகளுடனும், ஆங்கிலம் உள்ளிட்ட 15 மொழிகளில் சப்டைட்டில்களுடனும், இந்தியா மட்டுமின்றி உலகம் முழுவதும் 240-க்கும் மேற்பட்ட நாடுகள் மற்றும் பிராந்தியங்களில் பிரத்யேகமாக ஸ்ட்ரீமிங் செய்யப்படவுள்ளது.