51 ஆண்டுகளை நிறைவு செய்த சூப்பர் ஸ்டார் ரஜினிகாந்த்… ‘தர்மன்’ படப்பிடிப்புத் தளத்தில் கோலாகல கொண்டாட்டம்!

இந்தியத் திரையுலகில் தனக்கென தனி சாம்ராஜ்யத்தை உருவாக்கியுள்ள சூப்பர் ஸ்டார் ரஜினிகாந்த், திரையுலகில் தனது பயணத்தைத் தொடங்கி 51 ஆண்டுகளை நிறைவு செய்துள்ளார். இதனை முன்னிட்டு, அவர் நடித்து வரும் ‘தர்மன்’ திரைப்படத்தின் படப்பிடிப்புத் தளத்தில் சிறப்பு கேக் வெட்டி இந்த வரலாற்றுச் சாதனை கொண்டாடப்பட்டது.

1975-ஆம் ஆண்டு ஆகஸ்ட் 15-ஆம் தேதி ரஜினிகாந்த் நடித்த ‘அபூர்வ ராகங்கள்’ திரைப்படம் வெளியானது. இதன் மூலம் தமிழ் சினிமாவில் தனது பயணத்தைத் தொடங்கிய ரஜினிகாந்த், அடுத்தடுத்த ஆண்டுகளில் தனது தனித்துவமான நடிப்பு, ஸ்டைல் மற்றும் திரை ஆளுமையால் இந்திய சினிமாவின் மிகப்பெரிய நட்சத்திரங்களில் ஒருவராக உயர்ந்தார்.

திரையுலகில் ரஜினிகாந்த் கால்பதித்து 51 ஆண்டுகள் நிறைவடைந்ததை கொண்டாடும் வகையில், ‘தர்மன்’ படப்பிடிப்புத் தளத்தில் நடைபெற்ற சிறப்பு நிகழ்ச்சியில் சூப்பர் ஸ்டார் ரஜினிகாந்த், இயக்குநர் அஸ்வத் மாரிமுத்துமற்றும் படக்குழுவினர் அனைவரும் கலந்து கொண்டனர். ரஜினிகாந்த் முன்னிலையில் கேக் வெட்டி, அவரது நீண்ட திரைப்பயணத்தையும் சாதனைகளையும் படக்குழுவினர் கொண்டாடினர்.

கடந்த 51 ஆண்டுகளாக ரசிகர்களை மகிழ்வித்து வரும் ரஜினிகாந்தின் திரைப்பயணம், இந்திய சினிமாவின் முக்கியமான அத்தியாயங்களில் ஒன்றாகக் கருதப்படுகிறது. அவரது ஸ்டைல், வசன உச்சரிப்பு, நடிப்பு மற்றும் திரையில் அவர் உருவாக்கிய தனித்துவமான ஆளுமை ஆகியவை பல தலைமுறை ரசிகர்களை தொடர்ந்து கவர்ந்து வருகின்றன. இந்த தனித்துவமான தாக்கமே ரசிகர்களால் ‘ரஜினியிசம்’ என கொண்டாடப்படுகிறது.

அந்த வகையில், ‘தர்மன்’ படப்பிடிப்புத் தளத்தில் நடைபெற்ற இந்தக் கொண்டாட்டம், ரஜினிகாந்தின் 51 ஆண்டுகால திரைப்பயணத்தை நினைவுகூரும் சிறப்பு தருணமாக அமைந்தது. அவரது பயணம் தொடர்ந்து புதிய தலைமுறையினரையும் ஊக்குவித்து வரும் நிலையில், ‘தர்மன்’ படப்பிடிப்புத் தளம் அவரது நீண்ட திரைப்பயணத்தின் மற்றொரு முக்கிய தருணத்திற்கு சாட்சியாகியுள்ளது.

சூப்பர் ஸ்டார் ரஜினிகாந்த் கதையின் நாயகனாக நடிக்கும் ‘தர்மன்’ திரைப்படத்தை ராஜ்கமல் ஃபிலிம்ஸ் இன்டர்நேஷனல் மற்றும் டர்மெரிக் மீடியா நிறுவனங்களின் சார்பில் கமல்ஹாசன் மற்றும் ஆர். மகேந்திரன் ஆகியோர் இணைந்து தயாரித்து வருகின்றனர்.

ரஜினிகாந்தின் 51 ஆண்டுகால திரைப்பயணத்தை அவரது தற்போதைய படத்தின் படப்பிடிப்புத் தளத்திலேயே படக்குழுவினர் இணைந்து கொண்டாடியிருப்பது, இந்த நிகழ்வை மேலும் சிறப்பானதாக மாற்றியுள்ளது. 1975-ல் தொடங்கிய அவரது பயணம், 2026-லும் அதே ரசிகர் உற்சாகத்துடன் தொடர்ந்து கொண்டிருக்கிறது என்பதற்கு இந்தக் கொண்டாட்டம் ஒரு அடையாளமாக அமைந்துள்ளது.