தனது வாழ்க்கைக் கதைகளை நகைச்சுவையாக்கும் ‘விக்கல்ஸ் ஆஃப் விக்ரம்’ – விக்ரமின் முதல் ஸ்டாண்ட்-அப் நிகழ்ச்சி!

தமிழ் நடுத்தர வர்க்க குடும்பத்தில் வளர்ந்த தனது வாழ்க்கை அனுபவங்களை நகைச்சுவையின் வழியாக பகிர்ந்து கொள்ளும் வகையில் உருவாகியுள்ளது ‘விக்கல்ஸ் ஆஃப் விக்ரம்’ என்ற ஸ்டாண்ட்-அப் நிகழ்ச்சி. இது தனது முதல் மற்றும் மிகவும் தனிப்பட்ட ஸ்டாண்ட்-அப் நிகழ்ச்சி என விக்ரம் தெரிவித்துள்ளார்.

கல்லூரி வாழ்க்கை, காதல், உறவுகள், திருமணம் என தனது வாழ்க்கையில் கடந்து வந்த பல்வேறு அனுபவங்களை அடிப்படையாகக் கொண்டு இந்த நிகழ்ச்சியை உருவாக்கியுள்ளார். தன்னை இன்று இருக்கும் நிலைக்கு உருவாக்கிய சம்பவங்களையும், அவற்றை அப்போது தான் எவ்வாறு புரிந்துகொண்டேன், தற்போது எவ்வாறு பார்க்கிறேன் என்பதையும் நகைச்சுவையுடன் இந்த நிகழ்ச்சியில் பகிர்ந்து கொள்கிறார்.

காதல், குடும்பம், உறவுகள் மற்றும் சமூகம் குறித்து நாம் வளரும்போது இயல்பாக ஏற்றுக்கொள்ளும் பல்வேறு கருத்துகளையும், பின்னர் அவற்றை கேள்வி கேட்கத் தொடங்கும்போது ஏற்படும் மாற்றங்களையும் ‘விக்கல்ஸ் ஆஃப் விக்ரம்’ ஆராய்கிறது.

வெளிப்படையாக பேசுவதற்கு சற்று தயக்கமாக இருக்கும், ஆனால் தனிப்பட்ட முறையில் நண்பர்களிடம் அல்லது நெருக்கமானவர்களிடம் எளிதாக நகைச்சுவையாக பேசக்கூடிய விஷயங்களையும் இந்த நிகழ்ச்சியில் வெளிப்படையாக அணுகியுள்ளார் விக்ரம். இதன் மூலம் தனிப்பட்ட அனுபவங்களையும் சமூகத்தில் நிலவும் பொதுவான எண்ணங்களையும் நகைச்சுவையின் வழியாக முன்வைக்கிறார்.

குடும்ப எதிர்பார்ப்புகள், சினிமா, பாலியல் கல்வி, திருமணம், சாதி, பெண்ணியம் உள்ளிட்ட பல்வேறு தலைப்புகள் இந்த ஸ்டாண்ட்-அப் நிகழ்ச்சியில் இடம்பெறுகின்றன. இவை குறித்து எது சரி, எது தவறு என போதனை செய்வதற்குப் பதிலாக, தனது சொந்த அனுபவங்களின் வழியாக அவற்றை அணுகுகிறார் விக்ரம்.

தான் வளர்ந்த காலகட்டத்தில் இந்த விஷயங்களை எவ்வாறு புரிந்துகொண்டேன், தற்போது அவற்றை எவ்வாறு பார்க்கிறேன் என்பதற்கு இடையில் ஏற்பட்ட மாற்றங்களையும், அந்தப் பயணத்தில் நடந்த பல்வேறு சம்பவங்களையும் நகைச்சுவையுடன் பகிர்வதே இந்த நிகழ்ச்சியின் முக்கிய அம்சமாக அமைந்துள்ளது.

‘விக்கல்ஸ் ஆஃப் விக்ரம்’, ஒரு ஸ்டாண்ட்-அப் நிகழ்ச்சியைத் தாண்டி, விக்ரமின் வாழ்க்கையில் அவரை இன்று இருக்கும் நிலைக்கு கொண்டு வந்த அனுபவங்களைத் திரும்பிப் பார்க்கும் ஒரு தனிப்பட்ட பயணமாக உருவாகியுள்ளது. தனது வாழ்க்கையின் சிக்கலான மற்றும் சில நேரங்களில் சங்கடமான தருணங்களைக்கூட நகைச்சுவையாக மாற்றி பார்வையாளர்களுடன் பகிர்ந்து கொள்ளும் முயற்சியாக இந்த நிகழ்ச்சி அமைகிறது.