8 மாநிலங்களில் 820 பள்ளிகள்… 3 லட்சம் மாணவிகளிடம் HPV விழிப்புணர்வு – அல்லு அர்ஜுன் ரசிகர்களின் சமூகநல முயற்சி!

சினிமா கொண்டாட்டங்களைத் தாண்டி ரசிகர் இயக்கத்தை சமூகநல முயற்சிகளுக்கும் பயன்படுத்தி வருகின்றனர் ‘ஐகான் ஸ்டார்’ அல்லு அர்ஜுனின் ரசிகர்கள். அந்த வகையில், இந்தியா முழுவதும் 8 மாநிலங்களில் 820 பள்ளிகளில் HPV விழிப்புணர்வு நிகழ்ச்சிகளை நடத்தி, சுமார் 3 லட்சம் மாணவிகளிடம் HPV குறித்த விழிப்புணர்வை ஏற்படுத்தியுள்ளனர்.

அல்லு அர்ஜுன் ஃபேன்ஸ் அசோசியேஷன் (AAFA) சார்பில் முன்னெடுக்கப்பட்ட இந்த முயற்சி ஆந்திரப் பிரதேசம், தெலங்கானா, ஒடிசா, தமிழ்நாடு, கேரளா, மகாராஷ்டிரா, கர்நாடகா மற்றும் அந்தமான் & நிக்கோபார் தீவுகள் என 8 மாநிலங்களில் நடைபெற்றுள்ளது.

பள்ளிகளை நேரடியாகச் சென்றடைந்த இந்த விழிப்புணர்வு நிகழ்ச்சிகளில், இளம் மாணவிகளுக்கு HPV வைரஸ் குறித்த அடிப்படை தகவல்கள், அதனைத் தடுக்கும் வழிமுறைகள் மற்றும் HPV தடுப்பூசியின் முக்கியத்துவம் குறித்து எடுத்துரைக்கப்பட்டுள்ளது. மேலும், மாணவிகள் மற்றும் அவர்களது குடும்பத்தினர் தகுதியான சுகாதார நிபுணர்களிடம் உரிய மருத்துவ ஆலோசனைகளைப் பெறவும் அறிவுறுத்தப்பட்டுள்ளனர்.

ரசிகர் மன்ற செயல்பாடுகள் பொதுவாக திரைப்பட வெளியீடுகள் மற்றும் நட்சத்திர கொண்டாட்டங்களுடன் நின்றுவிடும் நிலையில், AAFA உறுப்பினர்கள் தங்களது ரசிகர் வலையமைப்பை பயன்படுத்தி முக்கியமான சுகாதார விழிப்புணர்வு செய்தியை பள்ளிகள் மற்றும் சமூகங்களிடம் கொண்டு சென்றுள்ளனர்.

8 மாநிலங்களில் நடத்தப்பட்ட 820 விழிப்புணர்வு நிகழ்ச்சிகள் மூலம் சுமார் 3 லட்சம் மாணவிகள் பயனடைந்துள்ளதாக தெரிவிக்கப்பட்டுள்ளது. ஒரே நோக்கத்திற்காக பல்வேறு மாநிலங்களைச் சேர்ந்த ரசிகர்கள் ஒன்றிணைந்து செயல்பட்டிருப்பது இந்த முயற்சியின் முக்கிய அம்சமாக பார்க்கப்படுகிறது.

HPV குறித்த உரையாடல்களை உருவாக்குவதுடன், HPV தடுப்பு மற்றும் தடுப்பூசியின் முக்கியத்துவம் குறித்து அதிகமான குடும்பங்கள் புரிந்துகொள்ளச் செய்வதே இந்த முயற்சியின் நோக்கமாக அமைந்துள்ளது.

ஒரு நடிகரை கொண்டாடும் ரசிகர் மன்ற செயல்பாடுகளைத் தாண்டி, தங்களது கூட்டு பலத்தை சமூக நலனுக்காக பயன்படுத்தும் வகையில் அல்லு அர்ஜுன் ரசிகர்கள் மேற்கொண்டுள்ள இந்த முயற்சி கவனம் பெற்றுள்ளது.