வாகீசன் – மோனிஷாவின் ‘அன்னக்கிளி’… 3 மில்லியன் பார்வைகளை கடந்து சாதனை!

பிராண்ட் பிளிட்ஸ் எண்டர்டெய்ன்மெண்ட் நிறுவனத்தின் சமீபத்திய இசை வெளியீடாக வெளியாகியுள்ள ‘அன்னக்கிளி’ பாடல், வெளியான 72 மணி நேரத்தில் 3 மில்லியன் பார்வையாளர்களை கடந்து சாதனை படைத்துள்ளது. வாகீசன் ராசையாவின் முதல் ஆல்பமான ‘தமிழ் கிறுக்கன்’ ஆல்பத்தின் முதல் பாடலாக வெளியாகியுள்ள ‘அன்னக்கிளி’, ரசிகர்களிடையே நல்ல வரவேற்பைப் பெற்று வருகிறது.

வாகீசன் எழுதி, பாடி, நடித்துள்ள இந்தப் பாடல், தனது சிறுவயது காதலியிடம் காதலை வெளிப்படுத்த முயலும் ஓர் இளைஞனின் இனிமையான காதல் கதையை மையமாகக் கொண்டுள்ளது. கிராமிய தமிழ்நாட்டின் வண்ணமயமான பின்னணியில், இளம் காதலின் அப்பாவித்தனம், வெட்கம் மற்றும் விளையாட்டுத்தனமான தருணங்களைப் பிரதிபலிக்கும் வகையில் பாடல் காட்சிகள் உருவாக்கப்பட்டுள்ளன.

‘Top Cooku Dupe Cooku’ நிகழ்ச்சியின் மூலம் பிரபலமான மோனிஷா பிளெஸ்ஸி, ‘அன்னக்கிளி’ பாடலில் வாகீசனுடன் இணைந்து நடித்துள்ளார். இருவருக்கும் இடையிலான இயல்பான கெமிஸ்ட்ரி பாடலின் காதல் காட்சிகளுக்கு கூடுதல் அழகு சேர்த்துள்ளது.

சமீபத்தில் எத்திராஜ் கல்லூரியில் நடைபெற்ற நிகழ்வில் Gen Z மாணவர்களிடமிருந்து ‘அன்னக்கிளி’ பாடலுக்கு உற்சாகமான வரவேற்பு கிடைத்துள்ளது. இளம் தலைமுறையினரிடையேயும் பாடல் கவனம் பெற்றிருப்பது படக்குழுவினருக்கு கூடுதல் உற்சாகத்தை அளித்துள்ளது.

சிவ பத்மயன் இசையமைத்துள்ள ‘அன்னக்கிளி’, பாரம்பரியமான நாட்டுப்புற இசையையும் துடிப்பான ராப் இசையையும் இணைத்து உருவாக்கப்பட்டுள்ளது. இதன் மூலம் கிராமிய காதல் கதையம்சத்திற்கு நவீன இசைத் தன்மையை வழங்கும் முயற்சி மேற்கொள்ளப்பட்டுள்ளது.

கிரிபாகர்ஜெய் ஜெ இயக்கியுள்ள இந்தப் பாடல் காணொளி, காதல் கதையின் உணர்வை மையமாக வைத்துக்கொண்டு வேடிக்கை, வண்ணமயமான காட்சிகள் மற்றும் இளமைத் துள்ளல் ஆகியவற்றுடன் உருவாக்கப்பட்டுள்ளது. கிராமிய பின்னணியும் இன்றைய இளம் தலைமுறைக்கேற்ற இசை மற்றும் காட்சியமைப்பும் பாடலின் தனித்துவமான அம்சங்களாக அமைந்துள்ளன.

வாகீசன் மற்றும் பிராண்ட் பிளிட்ஸ் எண்டர்டெய்ன்மெண்ட் இணைந்து உருவாக்கும் ‘தமிழ் கிறுக்கன்’ ஐந்து பாடல்கள் கொண்ட இசைப் பயணமாக உருவாகிறது. அதன் முதல் பாடலாக வெளியாகியுள்ள ‘அன்னக்கிளி’ பெற்றுள்ள வரவேற்பு, அடுத்தடுத்த பாடல்கள் மீதான எதிர்பார்ப்பையும் அதிகரித்துள்ளது.

புதுமையான இசை, அழகான காதல் கதை மற்றும் நாட்டுப்புற இசையின் கலவையுடன் உருவாகியுள்ள ‘அன்னக்கிளி’, பழைய பாணியிலான காதல் உணர்வுகளை நவீன இசை மற்றும் காட்சியமைப்புடன் இளம் தலைமுறையிடம் கொண்டு சேர்க்கும் முயற்சியாக அமைந்துள்ளது.

டாக்டர் ஜெ.பி. லீலாராம், ராஜீ.க, சரவணன்.பா மற்றும் ரேகா.லீ ஆகியோர் தயாரிப்பில் உருவாகியுள்ள ‘அன்னக்கிளி’பாடல், தற்போது பிராண்ட் பிளிட்ஸ் எண்டர்டெய்ன்மெண்ட் நிறுவனத்தின் YouTube சேனலில் வெளியாகியுள்ளது.