‘மண்டாடி’ படக்குழுவினரை பாராட்டிய நடிகர் சூர்யா!

திரையரங்குகளில் தொடர்ந்து ரசிகர்களின் வரவேற்பைப் பெற்று வரும் ‘மண்டாடி’ திரைப்படத்தின் இயக்குநர் மதிமாறன் புகழேந்தி மற்றும் தயாரிப்பாளர் எல்ரெட் குமார் ஆகியோருக்கு நடிகர் சூர்யா தனது வாழ்த்துகளையும் பாராட்டுகளையும் தெரிவித்துள்ளார்.

‘மண்டாடி’ திரைப்படத்தை தயாரித்த எல்ரெட் குமாருக்கு சூர்யா அனுப்பியுள்ள வாழ்த்துச் செய்தியில், இப்படத்தின் மீது அவர் வைத்த நம்பிக்கையை பாராட்டியுள்ளார். இதுபோன்ற ஒரு படைப்பை நம்பிக்கையுடன் தயாரிக்க தேவையான பார்வை மற்றும் துணிச்சலை குறிப்பிட்டுள்ள சூர்யா, ‘மண்டாடி’ பெற்றுள்ள வெற்றி அதற்கு முழுமையாக தகுதியானது என்றும் தெரிவித்துள்ளார். மேலும், எல்ரெட் குமார் மற்றும் ஒட்டுமொத்த படக்குழுவினருக்கும் தனது மனமார்ந்த வாழ்த்துகளை தெரிவித்துள்ளார்.

இயக்குநர் மதிமாறன் புகழேந்திக்கு அனுப்பியுள்ள செய்தியில், ‘மண்டாடி’ ஒரு அற்புதமான என்டர்டெய்னர் என்று சூர்யா பாராட்டியுள்ளார். திரைப்படத்தை வெளியான உடனேயே பார்க்க முடியாமல், பின்னர் 23-வது நாளில் திரையரங்கில் ரசிகர்களுடன் இணைந்து பார்த்ததாகவும், விசில் மற்றும் கைதட்டல்களுக்கு மத்தியில் படத்தை ரசித்ததாகவும் அவர் தெரிவித்துள்ளார்.

மேலும், படத்தின் எழுத்து மற்றும் அதை திரையில் கொண்டு வந்த விதம் குறித்தும் பாராட்டியுள்ள சூர்யா, மதிமாறன் புகழேந்தியின் படைப்புக்காக மிகவும் மகிழ்ச்சியடைவதாக தெரிவித்துள்ளார்.

ஆர்.எஸ். இன்ஃபோடெயின்மென்ட் சார்பில் எல்ரெட் குமார் தயாரித்துள்ள ‘மண்டாடி’ திரைப்படத்தை மதிமாறன் புகழேந்தி இயக்கியுள்ளார். சூரி கதாநாயகனாக நடித்துள்ள இப்படத்தில் சத்யராஜ், சுஹாஸ், ரவீந்திரா, மகினா, மிதுன், கீர்த்திகா உள்ளிட்டோர் முக்கிய கதாபாத்திரங்களில் நடித்துள்ளனர்.

திரையரங்குகளில் தொடர்ந்து ரசிகர்களை ஈர்த்து வரும் ‘மண்டாடி’, ஹவுஸ்ஃபுல் காட்சிகளுடன் தனது வெற்றிகரமான திரையரங்கப் பயணத்தை தொடர்ந்து வருகிறது. இப்படத்திற்கு சூர்யா நேரடியாக தெரிவித்துள்ள பாராட்டு, படக்குழுவினருக்கு மேலும் சிறப்பு சேர்த்துள்ளது.