நவம்பர் 27-ம் தேதி வெளியாகும் ‘சிட்டுக்குறிஞ்சி’ – பிரத்யேக ‘தேங்க்ஸ்’ டீசர் வெளியீடு!

அறிமுக இயக்குநர் வீ.ஜெ. மீனாட்சி சுந்தரம் எழுதி இயக்கியுள்ள ‘சிட்டுக்குறிஞ்சி’ திரைப்படம், வரும் நவம்பர் 27, 2026 அன்று உலகம் முழுவதும் திரையரங்குகளில் வெளியாகவுள்ளது. இதனை அறிவிக்கும் வகையில், படத்திலிருந்து பிரத்யேகமான ‘தேங்க்ஸ்’ டீசரைப் படக்குழு வெளியிட்டுள்ளது.

படத்தின் இசைப் பாடல்கள் மற்றும் போஸ்டர்களுக்கு ரசிகர்கள் அளித்த அன்புக்கும் ஆதரவுக்கும் நன்றி தெரிவிக்கும் விதமாக இந்த டீசர் வெளியிடப்பட்டுள்ளது. காதல், நகைச்சுவை மற்றும் பேண்டஸி அம்சங்கள் கலந்த ஃபீல்-குட் திரைப்படமாக ‘சிட்டுக்குறிஞ்சி’ உருவாகியுள்ளது.

இப்படத்தின் முதல் பாடலான ‘குறிஞ்சி மலை மேல’ யூடியூபில் 1.8 மில்லியன் பார்வைகளைக் கடந்து இசை ரசிகர்களிடையே நல்ல வரவேற்பைப் பெற்றுள்ளது. ரம்யா நம்பீசன் பாடியுள்ள இந்த உற்சாகமான திருமணப் பாடலுக்கு கு. கார்த்திக் பாடல் வரிகளை எழுதியுள்ளார். அறிமுக இசையமைப்பாளர் மாறா இசையமைத்துள்ளார். மாறா எழுதி, ஷில்வி ஷரோனுடன் இணைந்து பாடிய இரண்டாவது பாடலான ‘உள்ளார’வும் ஒரு மில்லியன் பார்வைகளைக் கடந்து வரவேற்பைப் பெற்று வருகிறது.

பிளாக் அண்ட் ஒயிட் மீடியா சொல்யூஷன்ஸ் பிரைவேட் லிமிடெட் நிறுவனம் சார்பில் டி. ஜூட் ஆனந்த் தயாரித்துள்ள இப்படத்தில் ரஜித் மேனன் கதாநாயகனாக நடிக்கிறார். தீப்ஷிகா, நக்ஷா சரண் மற்றும் ஸ்ரீராம் கார்த்திக் உள்ளிட்டோர் முக்கியக் கதாபாத்திரங்களில் நடித்துள்ளனர். இப்படத்தின் டப்பிங் பணிகள் ஏற்கெனவே நிறைவடைந்துள்ளன.

1983-ம் ஆண்டு காலகட்டத்தை உண்மைத்தன்மையுடன் மீண்டும் உருவாக்கும் வகையில், கொடைக்கானலின் இயற்கை எழில் சூழ்ந்த மலைச்சரிவுகளில் சுமார் 80 ஏக்கர் பரப்பளவில் பிரம்மாண்டமான கிராமம் ஒன்றை அமைத்து படப்பிடிப்பை நடத்தியுள்ளனர்.

படத்தின் இசை அனுபவத்தை மேலும் சிறப்பாக்கும் வகையில், பின்னணி இசை ஹங்கேரியின் புடாபெஸ்ட் நகரில் உள்ள புகழ்பெற்ற புடாபெஸ்ட் ஸ்கோரிங் கம்பெனி ஸ்டுடியோவில், சர்வதேச அளவில் புகழ்பெற்ற இசைக் கலைஞர்கள் இடம்பெற்ற நேரடி இசைக்குழுவுடன் பதிவு செய்யப்பட்டுள்ளது.

இப்படத்திற்கு பிரான்சிஸ் ராஜ்குமார் ஒளிப்பதிவு செய்துள்ளார். மகேந்திரன் கணேசன் படத்தொகுப்புப் பணிகளையும், ராம்ஜி கலை இயக்கத்தையும், மாஸ்டர் தீனா நடன இயக்கத்தையும் கவனித்துள்ளனர். ராஜேஷ் ஆர், டாக்டர் கே. எஸ். செந்தில் (சசிராம் பிக்ஸர்ஸ்) மற்றும் கடையனேந்தல் ஆர். ஏ. பீட்டர் ஆகியோர் இணைத் தயாரிப்பாளர்களாகப் பணியாற்றியுள்ளனர்.

காதல், நகைச்சுவை, பேண்டஸி எனப் பல அம்சங்களுடன் உருவாகியுள்ள ‘சிட்டுக்குறிஞ்சி’ திரைப்படத்தை ஷாலினி சினி கிரியேஷன்ஸ் நிறுவனம் வரும் நவம்பர் 27, 2026 அன்று உலகம் முழுவதும் திரையரங்குகளில் வெளியிடுகிறது.