₹1 அதிரசம் வாங்க காசு சேர்த்த சிறுவயது நினைவுகள் – சமந்தா பகிர்ந்த நெகிழ்ச்சித் தருணம்!

Celebrity MasterChef Tamil தீபாவளி சிறப்பு எபிசோடில், அதிரசத்துடன் தனக்குள்ள சிறுவயது நினைவுகளைப் பகிர்ந்துகொண்ட நடிகை சமந்தா ரூத் பிரபு.

சில உணவுகள் நம் நாவுக்கு மட்டுமல்ல, நினைவுகளுக்கும் விருந்தளிக்கும். அந்த வகையில், தனக்குப் பிடித்த அதிரசத்துடன் இணைந்த சிறுவயது நினைவுகளை நடிகை சமந்தா ரூத் பிரபு பகிர்ந்துகொண்டுள்ளார்.

Sony VIZHA-வில் ஒளிபரப்பாகும் ‘Celebrity MasterChef Tamil’ நிகழ்ச்சியின் வரவிருக்கும் தீபாவளி சிறப்பு எபிசோடில், சிறுவயதில் வீட்டுக்கு வெளியே விற்கப்படும் ஒரு ரூபாய் அதிரசத்தை வாங்குவதற்காகக் காசு சேமித்த அனுபவத்தைச் சமந்தா நினைவுகூர்ந்துள்ளார். அந்தச் சிறிய தொகையைச் சேமித்து அதிரசம் வாங்கிச் சாப்பிட்ட மகிழ்ச்சியைப் பகிர்ந்துகொண்ட அவர், இன்றைக்கு அந்த அனுபவத்தை மீண்டும் பெற முடியவில்லை என்றும் நெகிழ்ச்சியுடன் தெரிவித்துள்ளார்.

தீபாவளி பலகாரங்களுடன் இணைந்த நினைவுகள்!

Endemol Shine India தயாரிக்கும் ‘Celebrity MasterChef Tamil’ நிகழ்ச்சியில், பல்வேறு துறைகளைச் சேர்ந்த பிரபலங்கள் சமையல் போட்டிகளில் பங்கேற்று தங்களது சமையல் திறமைகளை வெளிப்படுத்தி வருகின்றனர்.

வரவிருக்கும் தீபாவளி சிறப்பு எபிசோடில், பண்டிகைக்கான பலகாரங்களை மையமாகக் கொண்டு போட்டியாளர்களுக்குச் சிறப்புச் சவால் வழங்கப்படுகிறது. 90 நிமிடங்களுக்குள் நான்கு வகையான இனிப்பு மற்றும் கார உணவுகளைத் தயாரித்து, ஒரு பண்டிகைப் பரிசுப் பெட்டியை உருவாக்க வேண்டும். இதில் குறைந்தபட்சம் ஒரு இனிப்பு வகை சுத்திகரிக்கப்பட்ட சர்க்கரையைப் பயன்படுத்தாமல் தயாரிக்கப்பட வேண்டும் என்பதும் சவாலின் முக்கிய நிபந்தனையாக இடம்பெற்றுள்ளது.

தீபாவளிப் பலகாரங்கள் குறித்த உரையாடலின்போது, அதிரசம் தனக்குப் பிடித்தமான உணவுகளில் ஒன்று எனச் சமந்தா தெரிவித்துள்ளார். ஒரு ரூபாய் அதிரசத்திற்காகக் காசு சேமித்த சிறுவயது நினைவுகளை அவர் பகிர்ந்துகொண்டது நிகழ்ச்சியின் நெகிழ்ச்சியான தருணமாக அமைந்துள்ளது.

செஃப் வெங்கடேஷ் பட் பகிர்ந்த தீபாவளி நினைவுகள்!

இந்த உரையாடலில் கலந்துகொண்ட செஃப் வெங்கடேஷ் பட், தனது சிறுவயது தீபாவளி அனுபவங்களையும் பகிர்ந்துகொண்டார். தீபாவளி என்றாலே பட்டாசுகளும் உணவுகளும்தான் தனது நினைவுக்கு வருவதாகக் கூறிய அவர், தங்கள் வீட்டில் தீபாவளிப் பலகாரங்கள் கார்த்திகை தீபம் வரை தொடர்ந்து தயாரிக்கப்படும் என நினைவுகூர்ந்தார். அதிரசம் மற்றும் உலர் பழங்கள் கலந்த மிக்ஸர் ஆகியவை தனது விருப்பமான பண்டிகை உணவுகள் என்றும் தெரிவித்தார்.

இதனைத் தொடர்ந்து, போட்டியாளர்கள் மைசூர் பாக், முறுக்கு, சோமாஸ், சீடை உள்ளிட்ட பாரம்பரியப் பலகாரங்களுடன் புதுமையான இனிப்பு வகைகளையும் தயாரிக்கின்றனர்.

தீபாவளிப் பலகாரங்களின் சுவையை மட்டுமின்றி, அவற்றுடன் பின்னிப் பிணைந்திருக்கும் சிறுவயது நினைவுகள், குடும்ப உறவுகள் மற்றும் பண்டிகைக் கொண்டாட்டங்களையும் இந்தச் சிறப்பு எபிசோட் கொண்டாடும் வகையில் அமைந்துள்ளது.

‘Celebrity MasterChef Tamil’ நிகழ்ச்சியைத் திங்கள் முதல் வெள்ளி வரை இரவு 8 மணிக்கு Sony VIZHA-வில் காணலாம். மேலும், Sony LIV தளத்திலும் எப்போது வேண்டுமானாலும் ஸ்ட்ரீம் செய்து பார்க்கலாம்.