அர்ஜுன் தாஸின் ராப் குரலில் ‘நான் போதுமா’ – ‘ஜான் டோ’ படத்தின் முதல் பாடல் வெளியீடு!

இயக்குநர் மதுமிதா இயக்கத்தில் நடிகர் அர்ஜுன் தாஸ் நடிப்பில் உருவாகியுள்ள ‘ஜான் டோ’ திரைப்படத்தின் முதல் பாடலான ‘நான் போதுமா’ அதிகாரப்பூர்வமாக வெளியிடப்பட்டுள்ளது. முகமூடி அணிந்த மர்ம இசைக் கலைஞரான ‘தி ஆர்ட்டிஸ்ட் 404’ இசையமைப்பில் உருவாகியுள்ள இப்பாடலில், நடிகர் அர்ஜுன் தாஸ் ராப் பாடியிருப்பது ரசிகர்களின் கவனத்தை ஈர்த்துள்ளது.

சர்வதேச இசை உலகில் மார்ஷ்மெல்லோ, டிராஃப்ட் பன்க், எம்.எஃப். டூம் உள்ளிட்ட பல கலைஞர்கள் தங்களது முகத்தை மறைத்து, முகமூடியையே தனித்துவமான அடையாளமாக மாற்றியுள்ளனர். அந்த வரிசையில், தமிழ் சினிமாவிலும் முகமூடி அணிந்த இசைக் கலைஞராக அறிமுகமாகியுள்ளார் ‘தி ஆர்ட்டிஸ்ட் 404’. தனது முகத்தை வெளிப்படுத்தாமல் இசையின் மூலம் ரசிகர்களுடன் தொடர்பை ஏற்படுத்தி வரும் இவர், தற்போது ‘ஜான் டோ’ படத்தின் முதல் பாடல் வழியாக கவனம் பெற்றுள்ளார்.

அர்ஜுன் தாஸ் ராப் குரலில் ‘நான் போதுமா’!

‘நான் போதுமா’ பாடலில் நடிகர் அர்ஜுன் தாஸ் முதன்மை ராப் குரலை வழங்கியுள்ளார். மாளவிகாவும் இப்பாடலைப் பாடியுள்ளார். ராப் பாடல் வரிகளை அர்குஸ் அரியன் (Arcus Aryian) மற்றும் தி ஆர்ட்டிஸ்ட் 404 இணைந்து எழுதியுள்ளனர். இசையமைப்பு மற்றும் இசை ஏற்பாட்டுப் பணிகளையும் தி ஆர்ட்டிஸ்ட் 404 மேற்கொண்டுள்ளார்.

‘ஜான் டோ’ படத்தின் முன்னோட்ட விழாவில் முகமூடியுடன் தோன்றி ரசிகர்களிடையே ஆர்வத்தை ஏற்படுத்திய தி ஆர்ட்டிஸ்ட் 404, தற்போது பாடல் வெளியீட்டின் மூலமும் பேசுபொருளாகியுள்ளார். அவரது அடையாளம் குறித்த மர்மம் தொடர்ந்து நீடிக்கும் நிலையில், ‘நான் போதுமா’ பாடல் படத்தின் இசை உலகிற்கான அறிமுகமாக அமைந்துள்ளது.

நட்சத்திரக் கூட்டணியில் ‘ஜான் டோ’!

மதுமிதா எழுதி இயக்கியுள்ள ‘ஜான் டோ’ திரைப்படத்தில் அர்ஜுன் தாஸ், சஞ்சனா நடராஜன், சிருஷ்டி, அனுபமா குமார், அர்ச்சனா சந்தோக், படவா கோபி, ஸாரா வினீத் சந்தோக், நீரவ் எஸ். உள்ளிட்ட பலர் நடித்துள்ளனர்.

அர்கா மீடியாவொர்க்ஸ் சார்பில் பிரசாத் தேவினேனி மற்றும் சோபு யர்லகா தயாரித்துள்ள இப்படத்திற்கு கிஷோர் கேடாரி மற்றும் மதுமிதா இணைத் தயாரிப்பாளர்களாகப் பணியாற்றியுள்ளனர். கதை மற்றும் திரைக்கதையை மதுமிதா, நிக்கோலஸ் செவாலியர் இணைந்து எழுதியுள்ளனர். சௌம்யா சர்மா கிரியேட்டிவ் தயாரிப்பாளராகப் பணியாற்றியுள்ளார்.

ப்ரீதா ஜெயராமன் ஒளிப்பதிவு செய்துள்ள இப்படத்திற்கு அஸ்வினி காலே தயாரிப்பு வடிவமைப்பையும், விஜய் வெங்கட்ராமன் படத்தொகுப்பையும் மேற்கொண்டுள்ளனர்.

அர்ஜுன் தாஸின் ராப் குரல், மாளவிகாவின் பாடல் குரல் மற்றும் முகமூடி இசைக் கலைஞர் தி ஆர்ட்டிஸ்ட் 404-ன் தனித்துவமான இசை எனப் பல சுவாரஸ்யமான அம்சங்களுடன் வெளியாகியுள்ள ‘நான் போதுமா’ பாடல், ‘ஜான் டோ’ படத்தின் மீதான எதிர்பார்ப்பை அதிகரித்துள்ளது.

மதுமிதா இயக்கத்தில் உருவாகியுள்ள ‘ஜான் டோ’ திரைப்படம் வரும் நவம்பர் 13, 2026 அன்று திரையரங்குகளில் வெளியாகிறது.