ராம் பொதினேனியின் #RAPO23-க்கு சாம் சி எஸ் இசை… எதிர்பார்ப்பை உயர்த்திய புதிய கூட்டணி!

எனர்ஜிடிக் ஸ்டார் ராம் பொதினேனி, தனது 23வது திரைப்படமான #RAPO23 மூலம் இயக்குநராக புதிய அவதாரம் எடுக்கிறார். இந்தப் படத்திற்கு இசையமைப்பாளராக சாம் சி எஸ் இணைந்திருப்பது ரசிகர்களிடையே மிகப்பெரிய எதிர்பார்ப்பை ஏற்படுத்தியுள்ளது. ராம் பொதினேனியின் முதல் இயக்குநர் முயற்சிக்கும், பின்னணி இசையில் தனித்துவமான முத்திரையை பதித்துள்ள சாம் சி எஸ் இசையமைப்பதும், இந்தக் கூட்டணியை தென்னிந்திய சினிமாவின் கவனிக்கத்தக்க இணைப்பாக மாற்றியுள்ளது.

சைக்கலாஜிக்கல் ஆக்ஷன் த்ரில்லராக உருவாகி வரும் #RAPO23, கதையின் பதற்றம், மர்மம் மற்றும் உணர்வுகளை இசையின் மூலம் உயிர்ப்பிக்கக்கூடிய இசையமைப்பாளரை தேடும் நிலையில், சாம் சி எஸ் சரியான தேர்வாக அமைந்துள்ளார். திரில்லர், ஆக்ஷன், சஸ்பென்ஸ் மற்றும் ஹாரர் ஜானர்களில் தனது வித்தியாசமான பின்னணி இசையால் ரசிகர்களை கவர்ந்துள்ள அவர், இந்தப் படத்திற்கும் புதிய இசை அனுபவத்தை வழங்குவார் என்ற நம்பிக்கை படக்குழுவினரிடமும் ரசிகர்களிடமும் நிலவுகிறது.

கடந்த சில ஆண்டுகளில் பின்னணி இசைக்காக அதிக பாராட்டுகளைப் பெற்ற இசையமைப்பாளர்களில் ஒருவராக சாம் சி எஸ் திகழ்ந்து வருகிறார். கதையின் உணர்வுகளை இசையின் மூலம் ஆழமாக வெளிப்படுத்தும் அவரது திறமை, பல வெற்றிப் படங்களின் முக்கிய பலமாக அமைந்துள்ளது. குறிப்பாக த்ரில்லர் படங்களில் அவர் உருவாக்கும் சவுண்ட் டிசைன் மற்றும் பின்னணி இசை, ரசிகர்களுக்கு தனித்துவமான திரையரங்கு அனுபவத்தை வழங்கி வருகிறது.

அதேவேளையில், சமீபத்தில் வெளியான ‘இம்மார்டல்’ திரைப்படத்தின் ‘லவ் யூ லவ் யூ காட்டேரி’ பாடல் மூலம் தனது மெலடி திறமையையும் மீண்டும் நிரூபித்துள்ளார். காதல் பாடல்களில் மனதை வருடும் இசையையும், த்ரில்லர் படங்களில் பதற்றத்தை அதிகரிக்கும் பின்னணி இசையையும் சமநிலையுடன் கையாளும் இசையமைப்பாளராக சாம் சி எஸ் தொடர்ந்து தனது தனித்துவத்தை நிலைநிறுத்தி வருகிறார்.

தற்போது தமிழ், தெலுங்கு, கன்னடம் மற்றும் இந்தி உள்ளிட்ட பல மொழிகளில் பிஸியாக இயங்கி வரும் சாம் சி எஸ், தமிழில் ‘கராத்தே பாபு’, ‘சர்தார் 2’, புஷ்கர்–காயத்ரி இயக்கும் புதிய திரைப்படம், ஹெச். வினோத்–தனுஷ் கூட்டணி படம், ‘டிமான்டி காலனி 3’ உள்ளிட்ட பல முக்கிய படங்களுக்கு இசையமைத்து வருகிறார். இந்த நிலையில், ராம் பொதினேனியின் முதல் இயக்குநர் படத்திற்கும் அவர் இசையமைப்பது, இந்தத் திரைப்படத்தின் மீதான எதிர்பார்ப்பை மேலும் அதிகரித்துள்ளது.

இயக்குநராக தனது புதிய பயணத்தை தொடங்கும் ராம் பொதினேனி மற்றும் இசையின் மூலம் கதைக்கு தனி அடையாளம் கொடுக்கும் சாம் சி எஸ் ஆகியோரின் இந்த புதிய கூட்டணி, #RAPO23 திரைப்படத்தின் முக்கிய பலங்களில் ஒன்றாகக் கருதப்படுகிறது. கதைக்கு இணையாக இசையும் இப்படத்தின் பிரதான அம்சமாக அமையும் என்ற நம்பிக்கையில் ரசிகர்கள் படத்தின் அடுத்தடுத்த அப்டேட்களை ஆவலுடன் எதிர்நோக்கி வருகின்றனர்.