பிரபு தேவா – வடிவேலு கூட்டணியில் ஜாம்பி களம்… ‘பேங் பேங்’ அதிரடி டீசர் வெளியானது!

25 ஆண்டுகளுக்குப் பிறகு நடிகர்கள் பிரபு தேவா மற்றும் வடிவேலு இணைந்து நடிக்கும் ‘பேங் பேங்’ திரைப்படத்தின் அதிரடி டீசர் வெளியாகி ரசிகர்களிடையே கவனம் பெற்றுள்ளது. KRG கண்ணன் ரவி தயாரிப்பில் உருவாகியுள்ள இப்படம், வித்தியாசமான ஜாம்பி கதைக்களத்துடன் ஆக்ஷன், ஹாரர், அட்வென்ச்சர் மற்றும் காமெடி அம்சங்களை இணைத்து உருவாகியிருப்பது டீசர் மூலம் தெரியவந்துள்ளது.

டீசர் தொடங்கும் முதலே எரிமலை வெடித்து லாவா பாயும் வித்தியாசமான நிலப்பரப்பு பார்வையாளர்களை ஈர்க்கிறது. இந்தச் சூழலில் வித்தியாசமான தோற்றத்தில் பிரபு தேவாவும் வடிவேலுவும் தோன்றுகின்றனர். அவர்களை ஜாம்பிகளாக மாறிய மனிதர்கள் துரத்த, அவர்களிடமிருந்து தப்பிக்கும் பரபரப்பான ஆக்ஷன் காட்சிகள் டீசரில் இடம்பெற்றுள்ளன.

ஒருபுறம் ஜாம்பிகள், எரிமலை மற்றும் ஆபத்தான சூழல் என பதற்றத்தை ஏற்படுத்தும் காட்சிகள் இடம்பெற்றாலும், மறுபுறம் வடிவேலுவின் தனித்துவமான உடல்மொழியும் காமெடியும் டீசருக்கு கலகலப்பை கூட்டுகிறது. குறிப்பாக, தீவிரமான ஆக்ஷன் காட்சிகளுக்கு நடுவே அவரது நகைச்சுவை இடம்பெறுவது படத்தின் வித்தியாசமான அணுகுமுறையை வெளிப்படுத்துகிறது.

பிரபு தேவாவின் ஸ்டைலான தோற்றமும் அதிரடி காட்சிகளும் படத்திற்கு மாஸ் அம்சத்தை சேர்க்க, வடிவேலுவின் காமெடி அதற்கு நேர்மாறான சுவாரஸ்யத்தை வழங்குகிறது. நீண்ட இடைவெளிக்குப் பிறகு மீண்டும் இணைந்துள்ள இந்தக் கூட்டணி, ஜாம்பி கதைக்களத்துடன் எப்படி பயணிக்கிறது என்பதே படத்தின் மீதான முக்கிய எதிர்பார்ப்பாக உருவாகியுள்ளது.

ஏற்கனவே வெளியான படத்தின் டைட்டில் டீசரில் ஜாம்பிகளுக்கு நடுவே துப்பாக்கியுடன் பிரபு தேவாவும் வடிவேலுவும் தோன்றிய காட்சிகள் ரசிகர்களின் கவனத்தை ஈர்த்திருந்தன. தற்போது வெளியாகியுள்ள புதிய டீசர், படம் வழக்கமான ஜாம்பி திரைப்படமாக இல்லாமல், ஆக்ஷன், ஹாரர், அட்வென்ச்சர் மற்றும் காமெடி கலந்த முழுமையான கமர்ஷியல் என்டர்டெய்னராக உருவாகியிருப்பதை உறுதிப்படுத்துகிறது.

சாம் ரோட்ரிகஸ் எழுதி இயக்கும் இப்படத்தை KRG கண்ணன் ரவி தயாரிக்கிறார். தீபக் ரவி இணைத் தயாரிப்பில் உருவாகும் இப்படத்திற்கு யுவன் சங்கர் ராஜா இசையமைக்கிறார். H.C. வேணு ஒளிப்பதிவு செய்ய, சுரேஷ் சண்டைக் காட்சிகளை வடிவமைத்துள்ளார். ஆண்டனி படத்தொகுப்பையும், டான் பாலா கலை இயக்கத்தையும் கவனித்துள்ளனர். நடிகர் பப்லு பிரித்திவிராஜ் இப்படத்தில் முக்கிய கதாபாத்திரத்தில் நடித்துள்ளார்.

‘பேங் பேங்’ திரைப்படத்தின் படப்பிடிப்பு இந்தோனேசியாவின் புகழ்பெற்ற Mount Bromo எரிமலைப் பகுதி மற்றும் மலேசியாவில் நடைபெற்றுள்ளது. படத்தின் முழு படப்பிடிப்பும் நிறைவடைந்துள்ள நிலையில், தற்போது வெளியாகியுள்ள டீசர் படத்தின் மீதான எதிர்பார்ப்பை மேலும் அதிகரித்துள்ளது.

பிரபு தேவா – வடிவேலு கூட்டணி, ஜாம்பி களம், எரிமலை பின்னணி, அதிரடி ஆக்ஷன் மற்றும் அதற்குள் கலக்கும் வடிவேலுவின் காமெடி என ‘பேங் பேங்’ டீசர், வித்தியாசமான கமர்ஷியல் அனுபவத்தை எதிர்பார்க்கும் ரசிகர்களிடையே படத்தின் மீதான ஆர்வத்தை அதிகரித்துள்ளது.