அமானுஷ்ய சக்தியின் பின்னணியில் ஒரு மர்மம்… ‘மண்டவெட்டி’ டீசர் வெளியானது!

நடிகை கோமலி பிரசாத் நடிப்பில் உருவாகியுள்ள அமானுஷ்ய கிரைம் த்ரில்லர் திரைப்படமான ‘மண்டவெட்டி’படத்தின் டீசர் வெளியாகியுள்ளது. சரண்ராஜ் செந்தில்குமார் இயக்கி, தயாரித்துள்ள இப்படம், நாட்டுப்புற நம்பிக்கைகள், மனிதர்களின் அச்சம் மற்றும் அறியப்படாத மர்மங்களை மையமாகக் கொண்டு உருவாகியுள்ளது.

சுமார் இரண்டு நிமிடங்கள் கொண்ட இப்படத்தின் டீசர், மயக்க நிலையில் இருக்கும் ஒரு பெண்ணின் காட்சியுடன் தொடங்குகிறது. அந்தக் காட்சியே பார்வையாளர்களுக்குள் ஒரு விதமான பதற்றத்தை ஏற்படுத்தும் வகையில் அமைந்துள்ளது. தொடர்ந்து இடம்பெறும் மர்மமான சம்பவங்கள், துண்டு துண்டான உரையாடல்கள் மற்றும் கதாபாத்திரங்களின் அச்சம் என டீசர் அடுத்தடுத்து பல கேள்விகளை எழுப்புகிறது.

டீசரின் முக்கிய மர்மமாக ‘செஞ்சி சாமி’ எனப்படும் சக்தி இடம்பெறுகிறது. கதையில் நிகழும் பல்வேறு விசித்திரமான சம்பவங்களுக்கும் இந்த சக்திக்கும் தொடர்பு இருப்பது போன்ற காட்சிகள் இடம்பெற்றுள்ளன. ஆனால், அந்த சக்தியின் பின்னணி குறித்த எந்தத் தகவலையும் முழுமையாக வெளிப்படுத்தாமல், மர்மத்தை அப்படியே தக்க வைத்திருக்கிறது டீசர்.

அறிந்த உலகத்திற்கும் அமானுஷ்யத்திற்கும் இடையிலான எல்லை மெல்ல மறைந்து போகும் வகையில் காட்சிகள் அமைக்கப்பட்டுள்ளன. ஒவ்வொரு காட்சியும் அடுத்தடுத்த மர்மங்களை நோக்கி அழைத்துச் செல்லும் வகையில் இருப்பதால், படத்தின் கதைக்களம் குறித்த எதிர்பார்ப்பையும் டீசர் அதிகரிக்கிறது.

‘மண்டவெட்டி’ படத்தின் காட்சியமைப்பும் அதன் திகில் உணர்வுக்கு முக்கிய பங்களிப்பை வழங்குகிறது. இருள் சூழ்ந்த காட்சிகள், கதைக்களத்திற்கு ஏற்ற பின்னணிகள், கதாபாத்திரங்களின் முகபாவனைகள் மற்றும் கணநேரத்தில் தோன்றி மறையும் காட்சிகள் ஆகியவை படத்தின் அமானுஷ்ய உலகத்தை வலுப்படுத்துகின்றன. இதனுடன் தீபக் வேணுகோபாலின் பின்னணி இசையும் இணைந்து டீசரின் பதற்றமான சூழலை மேலும் தீவிரப்படுத்துகிறது.

படத்தின் கதாநாயகியாக நடித்துள்ள கோமலி பிரசாத், பலவீனம், கோபம், வேதனை மற்றும் ஆன்மிக மர்மம் என பல்வேறு உணர்வுகளை வெளிப்படுத்தும் கதாபாத்திரத்தில் நடித்துள்ளார். அவரது வித்தியாசமான தோற்றமும் நடிப்பும் டீசரில் கவனம் ஈர்க்கின்றன.

செஞ்சி சாமி என்பது யார்? அதன் இருப்பு இந்த உலகை எவ்வாறு மாற்றுகிறது? என்ற கேள்விகளை எழுப்பும் வகையில் ‘மண்டவெட்டி’ டீசர் அமைந்துள்ளது. நாட்டுப்புற நம்பிக்கைகளை அடிப்படையாகக் கொண்டு உருவாகியுள்ள இப்படம், உளவியல் ரீதியான பதற்றத்தையும் அமானுஷ்ய மர்மத்தையும் இணைக்கும் இருண்ட கிரைம் த்ரில்லராக உருவாகி வருவது டீசர் மூலம் தெரிய வருகிறது.

டஸ்கர்ஸ் டென் பிக்சர்ஸ் சார்பில் சரண்ராஜ் செந்தில்குமார் இப்படத்தை இயக்கி, தயாரித்துள்ளார். பிரகாஷ் மனிதன்ஒளிப்பதிவு செய்துள்ளார். குணா பழனிசாமி படத்தொகுப்பு பணிகளை மேற்கொண்டுள்ளார். தீபக் வேணுகோபால்இசையமைத்துள்ளார். சண்டைக் காட்சிகளை கெளதம் வடிவமைத்துள்ளார்.

மேலும், சங்கீதா சென் ஆடை வடிவமைப்பையும், டோனி ஜெ ஒலி கலவைப் பணிகளையும் மேற்கொண்டுள்ளனர். பாலகங்காதரன் டிஐ கிரேடிங் பணிகளையும், விஜயன் விஎஃப்எக்ஸ் பணிகளையும் கவனிக்கின்றனர். மகேந்திரன் கந்தசாமி தயாரிப்பு மேலாளராகவும், நர்மதா மேக்கப் கலைஞராகவும் பணியாற்றியுள்ளனர். இப்படத்தின் மக்கள் தொடர்புப் பணிகளை சுரேஷ் சந்திரா மற்றும் அப்துல் நாசர் மேற்கொள்கின்றனர்.

மர்மமான நாட்டுப்புற நம்பிக்கைகளையும், மனிதர்களின் ஆழமான அச்சத்தையும் மையமாகக் கொண்டுள்ள ‘மண்டவெட்டி’, வெளியான டீசர் மூலம் அமானுஷ்ய த்ரில்லர் ரசிகர்கள் மத்தியில் எதிர்பார்ப்பை உருவாக்கியுள்ளது.