‘எம்.எஸ்.: எ லெகஸி ஆன் ஸ்கிரீன்’ – கமல்ஹாசன் கிளாப் அடித்து தொடங்கி வைத்த எம்.எஸ். சுப்புலட்சுமியின் வாழ்க்கை வரலாறு!

‘பாரத ரத்னா’ எம்.எஸ். சுப்புலட்சுமியின் வாழ்க்கை வரலாற்றைத் தழுவி உருவாகும் ‘எம்.எஸ்.: எ லெகஸி ஆன் ஸ்கிரீன்’ (M.S.: A Legacy on Screen) திரைப்படத்தின் தொடக்க விழா சென்னையில் நடைபெற்றது. கீதா ஆர்ட்ஸ், ராக்லைன் என்டர்டெய்ன்மென்ட் மற்றும் பென்னி வாசு பிலிம்ஸ் நிறுவனங்கள் சார்பில் அல்லு அரவிந்த், ராக்லைன் வெங்கடேஷ் மற்றும் பென்னி வாசு இணைந்து தயாரிக்கும் இப்படத்தை தேசிய விருது வென்ற இயக்குநர் கௌதம் தின்னனூரி இயக்குகிறார்.

இப்படத்தில் எம்.எஸ். சுப்புலட்சுமி கதாபாத்திரத்தில் ராஷ்மிகா மந்தானா நடிக்கிறார். அனிருத் இசையமைக்கிறார். எம்.எஸ். சுப்புலட்சுமியின் இசை வாழ்க்கையில் முக்கிய பங்கு வகித்த சென்னை தி மியூசிக் அகாடமி அரங்கில் நடைபெற்ற இந்தத் தொடக்க விழாவில், மாநிலங்களவை உறுப்பினரும் நடிகருமான கமல்ஹாசன் சிறப்பு விருந்தினராகக் கலந்து கொண்டு கிளாப் அடித்து படப்பிடிப்பைத் தொடங்கி வைத்தார்.

நிகழ்வில் எம்.எஸ். சுப்புலட்சுமியின் குடும்ப வாரிசுகள், நலம் விரும்பிகள், திரையுலகைச் சேர்ந்த தயாரிப்பாளர்கள், முன்னணி நடிகர்கள் மற்றும் பல்வேறு துறைகளைச் சேர்ந்த பிரபலங்கள் கலந்து கொண்டனர். மேலும், எம்.எஸ். சுப்புலட்சுமியின் புகழ்பெற்ற பாடல்களை இசைக் கலைஞர்கள் இசைத்து அவருக்கு இசையஞ்சலியும் செலுத்தினர்.

“எம்.எஸ். அம்மாவின் வாழ்க்கையில் பல தலைமுறைகளுக்கான செய்தி உள்ளது” – கௌதம் தின்னனூரி

இயக்குநர் கௌதம் தின்னனூரி பேசுகையில், எம்.எஸ். சுப்புலட்சுமியின் வாழ்க்கையில் இசை சாதனைகள் மட்டுமின்றி, பல்வேறு சவால்கள், தியாகங்கள், மனிதநேயம் மற்றும் அடுத்த தலைமுறைக்கான அழுத்தமான செய்திகளும் இருப்பதாகக் குறிப்பிட்டார்.

அவரது வாழ்க்கையை திரைப்படமாக உருவாக்கும் வாய்ப்பு கிடைத்திருப்பதை பெருமையாகக் கருதுவதாகவும், எம்.எஸ். சுப்புலட்சுமியின் அர்ப்பணிப்பு மற்றும் பக்தியை திரையில் நேர்த்தியாகக் கொண்டு வர முழு அர்ப்பணிப்புடன் பணியாற்றுவோம் என்றும் அவர் தெரிவித்தார்.

“அவரது வாழ்க்கை எதிர்ப்புகளைக் கடந்து சாதித்த பயணம்” – மதன் கார்க்கி

பாடலாசிரியர் மதன் கார்க்கி பேசுகையில், எம்.எஸ். சுப்புலட்சுமியின் வாழ்க்கை வரலாற்றை திரைப்படமாக உருவாக்குவது பல ஆண்டுகளாக பலரின் கனவாக இருந்து வந்ததாகக் குறிப்பிட்டார்.

கௌதம் தின்னனூரி எழுதிய திரைக்கதையைப் படித்தபோதுதான் எம்.எஸ். சுப்புலட்சுமி எத்தனை சவால்களையும் தடைகளையும் கடந்து சாதித்துள்ளார் என்பதை முழுமையாகப் புரிந்துகொண்டதாகவும் அவர் தெரிவித்தார். இப்படத்தில் பணியாற்றும் ஒவ்வொருவருக்கும் மிகப்பெரிய பொறுப்பு இருப்பதாகவும், குறிப்பாக அனிருத் மற்றும் ராஷ்மிகா மந்தானாவுக்கு இது முக்கியமான சவாலாக இருக்கும் என்றும் மதன் கார்க்கி கூறினார்.

“ஏழு ஆண்டுகளாக முயற்சி செய்தோம்” – ராக்லைன் வெங்கடேஷ்

தயாரிப்பாளர் ராக்லைன் வெங்கடேஷ் பேசுகையில், எம்.எஸ். சுப்புலட்சுமியின் வாழ்க்கை வரலாற்றை திரைப்படமாக உருவாக்குவதற்காக கடந்த ஏழு, எட்டு ஆண்டுகளாக முயற்சி செய்து வந்ததாகத் தெரிவித்தார்.

அல்லு அரவிந்த் மற்றும் பென்னி வாசுவுடன் இணைந்து பல ஆண்டுகளாக மேற்கொண்ட ஆய்வுகள் மற்றும் முயற்சிகளுக்குப் பிறகு தற்போது இந்தப் படைப்பு உருவாகி வருவதாகவும், திரைப்படம் உருவாக எம்.எஸ். சுப்புலட்சுமியின் குடும்பத்தினரின் ஆதரவும் ஒத்துழைப்பும் முக்கிய காரணமாக இருந்ததாகவும் அவர் குறிப்பிட்டார்.

“இது திரையுலகத்திற்கு கிடைத்த மிகப்பெரிய பொக்கிஷம்” – கலைப்புலி எஸ். தாணு

தயாரிப்பாளர் கலைப்புலி எஸ். தாணு பேசுகையில், எம்.எஸ். சுப்புலட்சுமியின் வாழ்க்கை வரலாறு திரைப்படமாக உருவாவது மிகப்பெரிய படைப்பாக இருக்கும் என்று தெரிவித்தார்.

அனிருத் இப்படத்திற்கு இசையமைப்பது சவாலான பணியாக இருந்தாலும், அவரது திறமையால் உலகளவில் பாராட்டப்படும் வகையிலான இசை உருவாகும் என நம்பிக்கை தெரிவித்தார். மேலும், எம்.எஸ். சுப்புலட்சுமி நடித்த ‘மீரா’ திரைப்படத்தையும், அவரது நடை, உடை மற்றும் உடல்மொழியையும் படக்குழுவினர் ஆய்வு செய்ய வேண்டும் என்றும் அவர் குறிப்பிட்டார்.

“வரலாற்றுப் பதிவாக இருக்கும்” – சமுத்திரக்கனி

நடிகர் சமுத்திரக்கனி பேசுகையில், எம்.எஸ். சுப்புலட்சுமியின் 110-வது பிறந்த நாளில் அவரது வாழ்க்கை வரலாற்றைத் தழுவி உருவாகும் திரைப்படத்தின் தொடக்க விழாவில் பங்கேற்பது பெருமையாக இருப்பதாகத் தெரிவித்தார். எம்.எஸ். சுப்புலட்சுமியின் வாழ்க்கையில் திரைப்படமாக சொல்லக்கூடிய ஏராளமான சம்பவங்கள் இருப்பதாகவும், இந்தப் படம் ஒரு முக்கியமான வரலாற்றுப் பதிவாக அமையும் என்றும் அவர் கூறினார்.

“எம்.எஸ். அம்மா தான் எங்களை தேர்வு செய்திருக்கிறார்” – அல்லு அரவிந்த்

தயாரிப்பாளர் அல்லு அரவிந்த் பேசுகையில், எம்.எஸ். சுப்புலட்சுமியின் வாழ்க்கையை திரைப்படமாக உருவாக்க வேண்டும் என்ற எண்ணத்திற்கு அவரது வாழ்க்கையில் இடம்பெற்ற பல்வேறு முக்கியமான சம்பவங்களே காரணம் எனத் தெரிவித்தார்.

அவரது ஒழுக்கம், நேர்மை, அர்ப்பணிப்பு மற்றும் இசையின் மீது கொண்டிருந்த அசைக்க முடியாத நம்பிக்கை ஆகியவை திரைப்படத்தில் இடம்பெறும் என்றும், இயக்குநர் கௌதம் தின்னனூரி கடந்த ஓராண்டாக பல்வேறு இடங்களுக்குச் சென்று ஆய்வு செய்து திரைக்கதையை உருவாக்கியுள்ளதாகவும் கூறினார்.

மேலும், இளம் தலைமுறையினரையும் எம்.எஸ். சுப்புலட்சுமியின் இசை மரபையும் இணைக்கும் வகையில் அனிருத் இப்படத்திற்கு இசையமைப்பார் என்றும் அல்லு அரவிந்த் தெரிவித்தார்.

“என்னுடைய சிறந்த பங்களிப்பை வழங்குவேன்” – ராஷ்மிகா மந்தானா

எம்.எஸ். சுப்புலட்சுமி கதாபாத்திரத்தில் நடிக்கும் ராஷ்மிகா மந்தானா பேசுகையில், இந்த வாய்ப்பு தனக்கு மிகுந்த நன்றியுணர்வையும் பெருமையையும் அளிப்பதாகத் தெரிவித்தார்.

எம்.எஸ். சுப்புலட்சுமியின் வாழ்க்கையில் ஒரு சிறிய பகுதியாக இருப்பதற்கு தன்னை தேர்வு செய்ததற்கு நன்றி தெரிவித்த அவர், இந்தப் படைப்பிற்காக தனது சிறந்த பங்களிப்பை வழங்குவேன் என்றும் உறுதியளித்தார்.

“எம்.எஸ். அம்மா இசையின் ஒன்றிணைக்கும் சக்தி” – கமல்ஹாசன்

தொடக்க விழாவில் சிறப்பு விருந்தினராகக் கலந்து கொண்ட கமல்ஹாசன் பேசுகையில், எம்.எஸ். சுப்புலட்சுமி தென்னிந்தியாவின் மிக முக்கியமான இசைக் கலைஞர்களில் ஒருவர் என்றும், அவரது குரல் பல தலைமுறைகளையும் இணைக்கும் சக்தி கொண்டது என்றும் குறிப்பிட்டார்.

தமிழ், சமஸ்கிருதம், இந்தி, தெலுங்கு உள்ளிட்ட பல மொழிகளில் அவரது உச்சரிப்பும் பாடும் முறையும் தனித்துவமானதாக இருந்ததாகக் கூறிய கமல்ஹாசன், எம்.எஸ். சுப்புலட்சுமியின் வாழ்க்கை வரலாற்றை திரைப்படமாக உருவாக்கும் குழுவினருக்கு வாழ்த்துகளைத் தெரிவித்தார்.

ராஷ்மிகா மந்தானா எம்.எஸ். சுப்புலட்சுமி கதாபாத்திரத்தில் நடிப்பது மிகப்பெரிய சவாலாக இருந்தாலும், சிறந்த குழுவின் ஆதரவுடன் அதை அவர் சிறப்பாகச் செய்வார் என நம்பிக்கை தெரிவித்தார். மேலும், இப்படத்தின் மூலம் எம்.எஸ். சுப்புலட்சுமியின் வாழ்க்கை மற்றும் இசைப் பயணம் புதிய தலைமுறையையும் சென்றடையும் என்றும் அவர் குறிப்பிட்டார்.

எம்.எஸ். சுப்புலட்சுமியின் 110-வது பிறந்த நாளை முன்னிட்டு நடைபெற்ற இந்தத் தொடக்க விழாவுடன், அவரது வாழ்க்கையை மையமாகக் கொண்ட ‘எம்.எஸ்.: எ லெகஸி ஆன் ஸ்கிரீன்’ திரைப்படத்தின் பயணம் அதிகாரப்பூர்வமாகத் தொடங்கியுள்ளது. படத்தின் அடுத்தடுத்த அறிவிப்புகள் மற்றும் வெளியீடு குறித்த தகவல்கள் விரைவில் வெளியாகும் என எதிர்பார்க்கப்படுகிறது.