சத்யஜோதி ஃபிலிம்ஸ் தயாரிப்பில் சிவகார்த்திகேயன்… தொடங்கியது ‘SK27’!

தமிழ் திரையுலகில் பல்வேறு வெற்றிப் படங்களைத் தயாரித்து வரும் சத்யஜோதி ஃபிலிம்ஸ் நிறுவனத்தின் அடுத்த பிரம்மாண்ட தயாரிப்பாக சிவகார்த்திகேயன் நடிக்கும் புதிய திரைப்படம் உருவாகிறது. தற்காலிகமாக ‘SK27’ என அழைக்கப்படும் இப்படத்தின் அதிகாரப்பூர்வ அறிவிப்பு போஸ்டர் வெளியாகியுள்ளது. மேலும், இப்படத்தின் படப்பிடிப்பு பணிகளும் இன்று தொடங்கியுள்ளன.

டி.ஜி. தியாகராஜன் வழங்கும் இப்படத்தை செந்தில் தியாகராஜன், அர்ஜுன் தியாகராஜன் மற்றும் சாய் சித்தார்த் ஆகியோர் இணைந்து தயாரிக்கின்றனர். இப்படத்தில் சிவகார்த்திகேயன் கதாநாயகனாக நடிக்க, அவருக்கு ஜோடியாக கயாது லோகர் நடிக்கிறார். சிவகார்த்திகேயன் – கயாது லோகர் இணையும் முதல் திரைப்படம் இதுவாகும். ‘பரிதாபங்கள்’ புகழ் சுதாகர் மற்றும் ஜார்ஜ் மரியான் ஆகியோரும் முக்கிய கதாபாத்திரங்களில் நடிக்கின்றனர்.

சிவகார்த்திகேயனின் திரைப்பயணத்தில் உருவாகும் மற்றுமொரு புதிய கூட்டணியாக ‘SK27’ அமைந்துள்ளது. இப்படத்தின் மூலம் ‘பார்க்கிங்’ படத்தின் இயக்குநர் ராம் குமார் பாலகிருஷ்ணனுடன் சிவகார்த்திகேயன் முதன்முறையாக இணைகிறார்.

‘பார்க்கிங்’ படத்தின் மூலம் கவனம் பெற்ற ராம் குமார் பாலகிருஷ்ணன், ‘SK27’ படத்தை எழுதி இயக்குகிறார். எளிமையான ஒரு பிரச்சினையை மையமாக வைத்து விறுவிறுப்பான திரைக்கதையை உருவாக்கியிருந்த அவரது கதை சொல்லும் பாணி, ‘பார்க்கிங்’ படத்தின் மூலம் பாராட்டைப் பெற்றது. இந்த நிலையில், சிவகார்த்திகேயனுடன் அவர் இணைந்திருப்பது இப்படத்தின் மீதான எதிர்பார்ப்பை மேலும் அதிகரித்துள்ளது.

படத்தின் தொழில்நுட்பக் குழுவிலும் முன்னணி கலைஞர்கள் இணைந்துள்ளனர். ஒளிப்பதிவை ஓம் பிரகாஷ் மேற்கொள்கிறார். படத்தொகுப்புப் பணிகளை கலைவாணன் கவனிக்கிறார். ராஜேஷ் கலை இயக்குநராகவும், பிரவீன் ஆடை வடிவமைப்பாளராகவும் பணியாற்றுகின்றனர். அதிரடி சண்டைக் காட்சிகளுக்கு ஸ்டீவன் குமார் சண்டைப் பயிற்சி இயக்குநராக இணைந்துள்ளார்.

படத்தின் அறிவிப்பு போஸ்டர் தற்போது ரசிகர்களின் கவனத்தை ஈர்த்துள்ளது. போஸ்டரின் மையத்தில் சிவப்பு நிற கார் இடம்பெற்றுள்ள நிலையில், அதைச் சுற்றிலும் ஏராளமான மக்கள் திரண்டு ஓடி வருவது போன்ற காட்சி அமைக்கப்பட்டுள்ளது. புகை, ஒளி மற்றும் சிவப்பு, பச்சை, கருப்பு நிறங்களின் கலவை ஆகியவை போஸ்டருக்கு பரபரப்பான தோற்றத்தை வழங்குகின்றன.

குறிப்பாக, காரை நோக்கி மக்கள் திரண்டு வரும் காட்சியும், போஸ்டரில் இடம்பெற்றுள்ள தீவிரமான காட்சியமைப்பும், ‘SK27’ திரைப்படம் அதிரடி ஆக்‌ஷன் பின்னணியில் உருவாகிறதா என்ற எதிர்பார்ப்பை ரசிகர்கள் மத்தியில் ஏற்படுத்தியுள்ளது. எனினும், படத்தின் கதைக்களம் மற்றும் வகை குறித்த முழுமையான தகவல்கள் அதிகாரப்பூர்வமாக வெளியிடப்படவில்லை.

படத்தின் மற்ற நடிகர்கள் மற்றும் தொழில்நுட்பக் கலைஞர்கள் குறித்த விவரங்கள் அடுத்தடுத்த அதிகாரப்பூர்வ அறிவிப்புகளில் வெளியாகும் என எதிர்பார்க்கப்படுகிறது.

சத்யஜோதி ஃபிலிம்ஸ் தயாரிப்பில், சிவகார்த்திகேயன் – கயாது லோகர் நடிப்பில், ராம் குமார் பாலகிருஷ்ணன் இயக்கத்தில் உருவாகும் ‘SK27’ படத்தின் படப்பிடிப்பு இன்று தொடங்கியுள்ள நிலையில், படத்தின் அடுத்தடுத்த அப்டேட்கள் குறித்த எதிர்பார்ப்பு ரசிகர்கள் மத்தியில் அதிகரித்துள்ளது.