அனல் பறக்கும் பார்வை… கம்பீர தோற்றம் – ராவணனாக யஷின் ‘ராமாயணம்’ போஸ்டர்!

இந்திய சினிமா ரசிகர்கள் பெரும் எதிர்பார்ப்புடன் காத்திருக்கும் பிரம்மாண்ட திரைப்படமான ‘ராமாயணம்’ படத்தின் புதிய அப்டேட் வெளியாகியுள்ளது. நிதேஷ் திவாரி இயக்கத்தில் உருவாகி வரும் இப்படத்தில் ராவணன் கதாபாத்திரத்தில் நடிக்கும் ராக்கிங் ஸ்டார் யஷின் முதல் அதிகாரப்பூர்வ போஸ்டர் தற்போது வெளியாகியுள்ளது.

வெளியாகியுள்ள போஸ்டரில் தங்கக் கிரீடம், முத்து மாலைகள் மற்றும் பிரம்மாண்டமான தங்க ஆபரணங்களுடன் ராஜ கம்பீரத்தில் காட்சியளிக்கிறார் யஷ். அவரது தீவிரமான பார்வையும், கம்பீரமான தோற்றமும் ராவணன் கதாபாத்திரத்தின் வலிமையையும் அதிகாரத்தையும் பிரதிபலிக்கும் வகையில் அமைந்துள்ளது.

படத்தின் ஆரம்ப அப்டேட்கள் வெளியாகத் தொடங்கியதிலிருந்தே யஷ் ஏற்று நடிக்கும் ராவணன் கதாபாத்திரம் ரசிகர்கள் மத்தியில் பெரும் எதிர்பார்ப்பை ஏற்படுத்தியுள்ளது. இந்நிலையில், தற்போது வெளியாகியுள்ள இந்த அதிகாரப்பூர்வ போஸ்டர் அந்த எதிர்பார்ப்பை மேலும் அதிகரித்துள்ளது.

வலிமை, அறிவு, அதிகாரம் மற்றும் கம்பீரம் என ராவணனின் பல்வேறு பரிமாணங்களை வெளிப்படுத்தும் வகையில் யஷின் தோற்றம் வடிவமைக்கப்பட்டுள்ளது. குறிப்பாக, அவரது உடை, அணிகலன்கள் மற்றும் முகபாவனை ஆகியவை கதாபாத்திரத்தின் பிரம்மாண்டத்தை எடுத்துக்காட்டுகின்றன.

ரன்பீர் கபூர் ஸ்ரீ ராமராகவும், சாய் பல்லவி சீதையாகவும், யஷ் ராவணனாகவும், சன்னி தியோல் அனுமனாகவும் நடிக்கும் இப்படம் இரண்டு பாகங்களாக உருவாகி வருகிறது. ‘ராமாயணம்’ படத்தின் முதல் பாகம் தீபாவளி 2026-லும், இரண்டாம் பாகம் தீபாவளி 2027-லும் வெளியாகும் என அறிவிக்கப்பட்டுள்ளது.

இந்திய சினிமாவின் மிகப்பெரிய படைப்புகளில் ஒன்றாக உருவாகி வரும் ‘ராமாயணம்’ படத்தின் அடுத்தடுத்த அப்டேட்களுக்காக ரசிகர்கள் ஆவலுடன் காத்திருக்கின்றனர்.