‘ஸ்பைடர்-மேன்: பிராண்ட் நியூ டே’… உணர்ச்சியும் ஆக்ஷனும் கலந்த இறுதி முன்னோட்டம்!

மார்வெல் ரசிகர்கள் ஆவலுடன் எதிர்பார்த்து காத்திருந்த ‘ஸ்பைடர்-மேன்: பிராண்ட் நியூ டே’ (Spider-Man: Brand New Day) திரைப்படத்தின் மூன்றாவது மற்றும் இறுதி டிரெய்லர் வெளியாகியுள்ளது. டாம் ஹாலண்ட் நாயகனாக நடித்துள்ள இந்த திரைப்படம், ஜூலை 30 அன்று இந்தியாவில் ஆங்கிலம், இந்தி, தமிழ், தெலுங்கு, மலையாளம் மற்றும் கன்னடம் ஆகிய ஆறு மொழிகளில் பிரம்மாண்டமாக திரையரங்குகளில் வெளியாகவுள்ளது.

‘ஸ்பைடர்-மேன்: நோ வே ஹோம்’ திரைப்படத்தின் சம்பவங்களுக்கு பிந்தைய கதையைத் தொடரும் இந்தப் படம், டாம் ஹாலண்ட் ஸ்பைடர்-மேனாக நடிக்கும் நான்காவது தனித் திரைப்படமாகும். புதிய டிரெய்லர், அனைவரின் நினைவிலிருந்தும் பீட்டர் பார்க்கரை அழித்த மந்திரத்தின் விளைவுகளையும், அதன் காரணமாக அவர் சந்திக்கும் தனிமையையும் உணர்வுபூர்வமாக சித்தரிக்கிறது.

குறிப்பாக, ஜெண்டாயா நடித்துள்ள MJ கதாபாத்திரத்துடனான தனது காதல் நினைவுகளை பீட்டர் பார்க்கர் மீண்டும் நினைவுகூரும் காட்சிகள் ரசிகர்களின் கவனத்தை ஈர்த்துள்ளன. தனது வாழ்க்கையில் மிக முக்கியமான நபராக இருந்த MJ-யுடன் இனி இயல்பாக இருக்க முடியாத வலியும், அந்த உறவை இழந்த வேதனையும் டிரெய்லரில் ஆழமாக வெளிப்படுகிறது. இதன் மூலம், ஆக்ஷன் மற்றும் சாகசத்தைத் தாண்டி உணர்வுகளுக்கு முக்கியத்துவம் அளிக்கும் திரைப்படமாக ‘ஸ்பைடர்-மேன்: பிராண்ட் நியூ டே’ உருவாகியுள்ளது என்பதும் உறுதியாகியுள்ளது.

அதேநேரத்தில், இந்த இறுதி டிரெய்லரில் மார்க் ருஃபாலோ மீண்டும் ஹல்க் கதாபாத்திரத்தில் இடம்பெறுவது அதிகாரப்பூர்வமாக உறுதி செய்யப்பட்டுள்ளது. இது மார்வெல் சினிமாட்டிக் யுனிவர்ஸின் அடுத்த கட்ட கதைக்களத்திற்கு முக்கியமான அடித்தளமாக அமையும் என ரசிகர்கள் எதிர்பார்க்கின்றனர்.

இப்படத்தை டெஸ்டின் டேனியல் கிரெட்டன் இயக்கியுள்ளார். கிறிஸ் மெக்கென்னா, எரிக் சோமர்ஸ் மற்றும் ஜஸ்டின் குரிட்ஸ்கஸ் ஆகியோர் திரைக்கதை எழுதியுள்ளனர். ஸ்டான் லீ மற்றும் ஸ்டீவ் டிட்கோ உருவாக்கிய மார்வெல் காமிக் கதாபாத்திரத்தை அடிப்படையாகக் கொண்டு உருவாகியுள்ள இந்த திரைப்படத்தை கெவின் ஃபீகி, ஏமி பாஸ்கல், அவி அராட் மற்றும் ரேச்சல் ஓ’கானர் தயாரித்துள்ளனர். லூயிஸ் டி’எஸ்போசிட்டோ மற்றும் டேவிட் கெய்ன் நிர்வாகத் தயாரிப்பாளர்களாக பணியாற்றியுள்ளனர்.

திரைப்படத்தில் டாம் ஹாலண்ட், ஜெண்டாயா, சேடி சிங்க், ஜேக்கப் பட்டலோன், ஜான் பெர்ன்தால், ட்ராமெல் டில்மேன், மைக்கேல் மாண்டோ மற்றும் மார்க் ருஃபாலோ உள்ளிட்டோர் முக்கிய கதாபாத்திரங்களில் நடித்துள்ளனர்.

இந்தியாவில் ஜூலை 30 அன்று வெளியாகும் ‘ஸ்பைடர்-மேன்: பிராண்ட் நியூ டே’ திரைப்படம், 2D, 3D, 4DX 3D, ScreenX 3D, Dolby Cinema 2D & 3D, ICE 3D, MX4D 3D, P[XL] மற்றும் BIGPIX உள்ளிட்ட பல்வேறு பிரீமியம் லார்ஜ் ஃபார்மட் (PLF) திரையரங்குகளிலும் வெளியாகவுள்ளது. ஆக்ஷன், உணர்ச்சி மற்றும் மார்வெல் பிரபஞ்சத்தின் அடுத்த அத்தியாயத்தை ஒருங்கே கொண்டு வரும் இந்த திரைப்படம், இந்த ஆண்டின் மிகவும் எதிர்பார்க்கப்படும் ஹாலிவுட் வெளியீடுகளில் ஒன்றாக பார்க்கப்படுகிறது.