‘தி பிரைடு ஆஃப் பாரத்: சத்ரபதி சிவாஜி மகாராஜ்’ படத்தில் வீர ராணி பெலவாடி மல்லம்மாவாக இணைந்தார் பூமி சதீஷ் பெட்னேக்கர்!

இந்திய சினிமாவின் மிகப் பிரம்மாண்டமான வரலாற்றுத் திரைப்படங்களில் ஒன்றாக உருவாகி வரும் ‘தி பிரைடு ஆஃப் பாரத்: சத்ரபதி சிவாஜி மகாராஜ்’ திரைப்படம், தனது நட்சத்திர பட்டியலை தொடர்ந்து வலுப்படுத்தி வருகிறது. உலகத் தரம் வாய்ந்த தொழில்நுட்பக் கலைஞர்கள் மற்றும் முன்னணி நடிகர்கள் இணைந்து உருவாக்கி வரும் இந்த வரலாற்றுப் படைப்பில், தற்போது நடிகை பூமி சதீஷ் பெட்னேக்கர் அதிகாரப்பூர்வமாக இணைந்துள்ளார்.

இந்தப் படத்தில், கர்நாடகத்தின் வீர ராணியாகவும், துணிச்சல் மற்றும் அசைக்க முடியாத மன உறுதியால் வரலாற்றில் இடம்பிடித்த பெலவாடி மல்லம்மா கதாபாத்திரத்தில் பூமி சதீஷ் பெட்னேக்கர் நடிக்கிறார். அவரது வருகை, சத்ரபதி சிவாஜி மகாராஜ் கதாபாத்திரத்தில் நடிக்கும் ரிஷப் ஷெட்டி, மேலும் அர்ஜுன் ராம்பால், விவேக் ஓபராய் உள்ளிட்ட முன்னணி நட்சத்திரங்களுடன் உருவாகியுள்ள வலுவான நடிகர் அணியை மேலும் சிறப்பாக்கியுள்ளது.

இந்தப் படத்தில் இணைந்திருப்பது குறித்து தனது மகிழ்ச்சியை வெளிப்படுத்திய பூமி சதீஷ் பெட்னேக்கர், “மகத்தான மராத்தா வீர மன்னர் சத்ரபதி சிவாஜி மகாராஜின் வாழ்க்கையையும் பாரம்பரியத்தையும் மையமாகக் கொண்டு, இத்தகைய பிரம்மாண்டமான திரைப்படத்தில் பங்கேற்பது எனக்கு மிகுந்த பெருமை. கர்நாடகத்தின் வீர ராணியான பெலவாடி மல்லம்மாவை திரையில் உயிர்ப்பிப்பது என் திரைப்பயணத்தில் மறக்க முடியாத அனுபவமாக இருக்கும். ‘காந்தாரா’ திரைப்படத்தில் ரிஷப் ஷெட்டியின் நடிப்பு என்னை மிகவும் கவர்ந்தது. இயக்குநர் சந்தீப் சிங் இந்தக் கதையை என்னிடம் கூறிய தருணத்திலேயே இந்த வாய்ப்பை ஏற்க வேண்டும் என்று முடிவு செய்துவிட்டேன். இதற்கு முன் நான் நடித்த எந்தக் கதாபாத்திரத்தையும் விட முற்றிலும் மாறுபட்ட அனுபவமாக இது இருக்கும்,” என்று தெரிவித்துள்ளார்.

இயக்குநரும் தயாரிப்பாளருமான சந்தீப் சிங் இயக்கத்தில் உருவாகும் ‘தி பிரைடு ஆஃப் பாரத்: சத்ரபதி சிவாஜி மகாராஜ்’, இந்திய திரையுலகின் மிகப் பிரம்மாண்டமான வரலாற்றுத் திரைப்படங்களில் ஒன்றாக உருவாக்கப்பட்டு வருகிறது. புகழ்பெற்ற மராத்தா வீர மன்னரின் வாழ்க்கை, போராட்டம் மற்றும் பாரம்பரியத்தை மையமாகக் கொண்டு உருவாகும் இந்த திரைப்படம், இரண்டு பாகங்களாக வெளியாக உள்ளது.

இந்தப் படத்திற்கு ரிஷி விர்மானி திரைக்கதை எழுதியுள்ள நிலையில், அமித் திரிவேதி இசையமைக்கிறார். தேசிய விருது பெற்ற பாடலாசிரியர் பிரசூன் ஜோஷி பாடல்களை எழுதியுள்ளார். உலகளவில் அங்கீகாரம் பெற்ற தொழில்நுட்பக் கலைஞர்கள் மற்றும் முன்னணி நடிகர்களின் வலுவான கூட்டணியுடன் உருவாகும் இந்த திரைப்படத்தின் படப்பிடிப்பு இந்த ஆண்டு இறுதியில் தொடங்கவுள்ளது. தற்போது விரிவான முன்தயாரிப்பு பணிகள் தீவிரமாக நடைபெற்று வருவதால், இந்திய சினிமாவின் மிகப்பெரிய வரலாற்றுத் திரைப்படங்களில் ஒன்றாக இந்தப் படம் உருவாகும் என்ற எதிர்பார்ப்பு ரசிகர்களிடையே அதிகரித்துள்ளது.