‘ஜி.டி.என்.’ ப்ரீ-ரிலீஸ் விழா… ஜி.டி. நாயுடுவின் மகத்துவத்தை உலகறியச் செய்யும் படமாகும்: மாதவன்!

டிரைகலர் பிலிம்ஸ் மற்றும் வர்கீஸ் மூலன் பிக்சர்ஸ் இணைந்து தயாரித்துள்ள, புரட்சிகர தொழிலதிபர், கண்டுபிடிப்பாளர் மற்றும் கொடையாளர் ஜி.டி. நாயுடுவின் வாழ்க்கையை மையமாகக் கொண்ட வாழ்க்கை வரலாற்றுத் திரைப்படமான ‘ஜி.டி.என்.’ படத்தின் ப்ரீ-ரிலீஸ் விழா இன்று சிறப்பாக நடைபெற்றது. இயக்குநர் கிருஷ்ணகுமார் ராமகுமார் இயக்கியுள்ள இப்படத்தில் மாதவன், சத்யராஜ், துஷாரா விஜயன், அதிதி பாலன் உள்ளிட்ட பலர் நடித்துள்ளனர். பெரும் எதிர்பார்ப்பை ஏற்படுத்தியுள்ள இப்படம் ஆகஸ்ட் 7-ஆம் தேதி உலகம் முழுவதும் திரையரங்குகளில் வெளியாகிறது.

விழாவில் பேசிய நடிகர் முரளி, இந்தியாவுக்கும் தமிழ்நாட்டுக்கும் முக்கியத்துவம் வாய்ந்த திரைப்படமாக ‘ஜி.டி.என்.’ அமையும் என்று கூறினார். இதில் தாம் மோகன் என்ற முக்கிய கதாபாத்திரத்தில் நடித்திருப்பதாகவும், அனைவரும் திரையரங்குகளில் சென்று படத்தை பார்க்க வேண்டும் என்றும் கேட்டுக்கொண்டார்.

ஜி.டி. நாயுடுவின் குடும்பத்தைச் சேர்ந்த ஜி.டி. ராஜ்குமார், இந்த திரைப்படம் உருவாக முக்கிய காரணமாக இருந்தவர் அரவிந்த் என்றும், இயக்குநர் கிருஷ்ணகுமார் விரிவான ஆய்வுகளுடன் கதையை உருவாக்கிய விதம் தங்களை கவர்ந்ததாகவும் தெரிவித்தார். ஜி.டி. நாயுடுவின் வாழ்க்கை வரலாற்றில் சுமார் 70 சதவீத உண்மை சம்பவங்கள் படத்தில் இடம்பெற்றுள்ளதாகக் குறிப்பிட்ட அவர், அடுத்த தலைமுறைக்கும் ஜி.டி. நாயுடுவின் சாதனைகள் சென்றடைய வேண்டும் என்பதே தங்களின் விருப்பம் என்றார்.

நடிகை அதிதி பாலன், இந்தப் படத்தில் பத்மாவதி கதாபாத்திரத்தில் நடித்திருப்பதாகவும், அந்தக் கதாபாத்திரம் வழியாகவே ஜி.டி. நாயுடுவின் வாழ்க்கைப் பயணம் விரிவடைவதாகவும் கூறினார். இப்படத்தில் சிறிய கதாபாத்திரமாக இருந்தாலும் நடிக்க வேண்டும் என்பதே தனது விருப்பமாக இருந்ததாகவும், படத்தின் மூலம் ஜி.டி. நாயுடுவைப் பற்றி மேலும் அறிந்து கொண்டதாகவும் தெரிவித்தார்.

நடிகை துஷாரா விஜயன், தனது திரைப்பயணத்தில் மிகவும் வித்தியாசமான கதாபாத்திரமாக இது அமைந்துள்ளதாகக் கூறினார். தயாரிப்பாளர்கள், இயக்குநர் மற்றும் மாதவனுக்கு நன்றி தெரிவித்த அவர், அனைவரும் திரையரங்குகளில் படத்தை பார்த்து ஆதரிக்க வேண்டும் என்றார்.

திரைக்கதை உருவாக்கத்தில் முக்கிய பங்காற்றிய அரவிந்த், ஜி.டி. நாயுடுவின் வாழ்க்கை தன்னை ஆழமாக கவர்ந்ததாகவும், இது ஒரு சாதாரண பயோபிக் அல்ல; முழுமையான கமர்ஷியல் அனுபவத்துடன் உருவாகிய திரைப்படம் என்றும் கூறினார். கதையை கேட்டவுடனேயே ஜி.டி. நாயுடுவாக நடிக்க மிகவும் பொருத்தமானவர் மாதவன் என்றே முடிவு செய்ததாகவும் தெரிவித்தார்.

நடிகர் சத்யராஜ், கோயம்புத்தூரில் பிறந்து வளர்ந்திருந்தாலும் ஜி.டி. நாயுடு அருங்காட்சியகத்தை இதற்கு முன் பார்வையிடாதது குற்ற உணர்வை ஏற்படுத்தியதாகக் குறிப்பிட்டார். படப்பிடிப்பின் போது ஜி.டி. நாயுடுவின் சாதனைகளை அறிந்து ஆச்சரியமடைந்ததாகவும், உலகம் முழுவதும் கொண்டாடப்படும் வாழ்க்கை வரலாற்றுப் படமாக ‘ஜி.டி.என்.’ அமையும் என்ற நம்பிக்கையை வெளிப்படுத்தினார். மாதவனின் திரைப்பயணத்தில் இந்தப் படம் முக்கிய மைல்கல்லாக இருக்கும் என்றும் பாராட்டினார்.

பாடகர் மற்றும் நடிகர் விஜய் யேசுதாஸ், படத்தில் முக்கியமான கேமியோ கதாபாத்திரத்தில் நடித்திருப்பதாகவும், அதன் முக்கியத்துவம் புரிந்த பிறகே அதில் நடிக்க ஒப்புக்கொண்டதாகவும் கூறினார்.

தயாரிப்பாளர் வர்கீஸ் மூலன், ‘ராக்கெட்டரி’ திரைப்படத்திற்குப் பிறகு மீண்டும் மாதவனுடன் இணைந்திருப்பதில் மகிழ்ச்சி இருப்பதாகவும், அந்தப் படம் போலவே ‘ஜி.டி.என்.’ திரைப்படமும் பெரிய வெற்றி பெறும் என்ற நம்பிக்கையை தெரிவித்தார். தயாரிப்பாளர் விஜய் மூலன், ‘ராக்கெட்டரி’க்கு பிறகு அடுத்த முயற்சியாக இந்தக் கதையை தேர்வு செய்ததாகவும், அனைவரும் திரையரங்குகளில் படம் பார்த்து ஆதரிக்க வேண்டும் என்றும் கேட்டுக்கொண்டார்.

இயக்குநர் கிருஷ்ணகுமார் ராமகுமார், ஜி.டி. நாயுடுவைப் பற்றிய புத்தகம் ஒன்றைப் படித்தபோது, அவரது வாழ்க்கையின் ஒவ்வொரு நிகழ்வும் திரைப்படமாக சொல்லப்பட வேண்டியவை என உணர்ந்ததாகக் கூறினார். பொதுமக்களுக்கு பயன்படும் கண்டுபிடிப்புகளை உருவாக்கிய மகானின் வாழ்க்கையை திரைப்படமாக்கியதில் பெருமை இருப்பதாகவும், மாதவன் கதாபாத்திரத்திற்காக ஆழமாக தயாராகி நடித்ததாகவும் பாராட்டினார். சத்யராஜ் உள்ளிட்ட அனைத்து நடிகர்களும் கதாபாத்திரங்களுக்கு முழு அர்ப்பணிப்புடன் நடித்திருப்பதாகவும் தெரிவித்தார்.

நடிகர் மாதவன், ‘குரு’, ‘ராக்கெட்டரி’ படங்களுக்கு பிறகு மீண்டும் ஒரு உண்மை கதாபாத்திரத்தில் நடித்திருப்பது பெருமையாக இருப்பதாகக் கூறினார். ஜி.டி. நாயுடுவின் வாழ்க்கையை உலகம் முழுவதும் கொண்டு செல்லும் பொறுப்பை தங்களுக்கு வழங்கிய அவரது குடும்பத்தினருக்கு நன்றி தெரிவித்த அவர், இப்படத்தை தொடங்குவதற்கு முன்பு ஜி.டி. நாயுடுவைப் பற்றி அதிகம் தெரியாதது தமக்கு குற்ற உணர்வை ஏற்படுத்தியதாகவும் கூறினார். இவ்வளவு பெரிய மேதையின் சாதனைகள் பாடத்திட்டங்களில் இடம்பெற வேண்டும் என்பதே படத்தின் முக்கிய நோக்கங்களில் ஒன்றாக இருப்பதாகவும், தயாரிப்பாளர்கள் தம்மீது வைத்த நம்பிக்கையை இப்படம் நிச்சயம் நியாயப்படுத்தும் என்றும் நம்பிக்கை தெரிவித்தார்.

ஜி.டி. நாயுடுவின் வாழ்க்கைப் பயணத்தையும், அவரது அறிவியல் சாதனைகளையும், சமூகப் பங்களிப்புகளையும் வணங்கும் விதமாக உருவாகியுள்ள ‘ஜி.டி.என்.’, வாழ்க்கை வரலாற்றுப் படங்களுக்கு புதிய அடையாளத்தை உருவாக்கும் என்ற எதிர்பார்ப்புடன், ஆகஸ்ட் 7-ஆம் தேதி உலகம் முழுவதும் திரையரங்குகளில் வெளியாகிறது.