மூன்று நண்பர்கள், ஒரு திரைப்படம், ஒரு பயணம் – ஸ்ரீ கார்த்திக்கின் அடுத்த படைப்புக்கு முன்னணி தயாரிப்பு நிறுவனத்தின் ஆதரவு!

‘கணம்’ படத்தின் மூலம் கவனம் ஈர்த்த இயக்குநர் ஸ்ரீ கார்த்திக், நடிகரும் தயாரிப்பாளருமான தேவ் ராம்நாத், ‘ரோமியோ’ பட இயக்குநர் விநாயக் வைத்தியநாதன் ஆகிய மூன்று நண்பர்களும் இணைந்து உருவாக்கத் திட்டமிட்ட புதிய திரைப்படம், தற்போது அடுத்தகட்டத்தை எட்டியுள்ளது. ஸ்ரீ கார்த்திக் இயக்கும் பெயரிடப்படாத இந்தப் புதிய திரைப்படத்தை, மேட்பாய்ஸ் என்டர்டெயின்மெண்ட் (Madboys Entertainment) நிறுவனத்துடன் இணைந்து சிறுனி சினி கார்ப்பரேஷன் (Siruni Cine Corporation) தயாரிக்கிறது.

ஒரு திரைப்படத்தை உருவாக்க வேண்டும் என்ற கனவுடன் பயணத்தைத் தொடங்கிய இந்த மூன்று நண்பர்களும், கடந்த சில மாதங்களாகத் தங்களது முயற்சிகளையும் சவால்களையும் சமூக வலைதளங்களில் ரீல்ஸ் (Reels) வாயிலாகப் பதிவு செய்து வந்தனர். சரியான கதையைத் தேர்ந்தெடுப்பதில் ஏற்பட்ட சிரமங்கள், நிராகரிப்புகள், திரைப்படத்தைத் தொடங்குவதில் இருந்த சவால்கள் எனப் பல தடைகளை எதிர்கொண்ட அவர்கள், தாங்கள் நம்பிய கதையைத் தங்களது சொந்த முயற்சியில் உருவாக்குவதற்கான தொடர் பணிகளில் ஈடுபட்டனர். தற்போது அவர்களின் முயற்சிக்கு வலுசேர்க்கும் வகையில், சிறுனி சினி கார்ப்பரேஷன் தயாரிப்புக் கூட்டணியில் இணைந்துள்ளது.

அமலா அக்கினேனி, சர்வானந்த், ரிது வர்மா ஆகியோர் நடிப்பில் வெளியான ‘கணம்’ திரைப்படத்தின் மூலம் இயக்குநராக அறிமுகமானவர் ஸ்ரீ கார்த்திக். அறிவியல் புனைகதையையும் குடும்ப உணர்வுகளையும் இணைத்துப் படைத்த அவரது முதல் திரைப்படம், தனித்துவமான கதைக்களத்தால் கவனம் பெற்றது. தற்போது அவர் இயக்கவுள்ள புதிய படத்தில் தேவ் ராம்நாத் மற்றும் விநாயக் வைத்தியநாதன் ஆகியோரின் பங்களிப்பும் இணைந்துள்ளது.

தேவ் ராம்நாத் மற்றும் ஸ்ரீ கார்த்திக் தலைமையில் இயங்கி வரும் மேட்பாய்ஸ் என்டர்டெயின்மெண்ட் நிறுவனம், ‘I Hate You I Love You’, ‘Childhood Diaries’ உள்ளிட்ட இணையத் தொடர்கள் மற்றும் குறும்படங்கள் மூலம் ரசிகர்களிடையே வரவேற்பைப் பெற்றுள்ளது. இந்நிறுவனம் இந்தப் புதிய திரைப்படத்தின் மூலம் திரைப்படத் தயாரிப்பில் தனது முதல் அடியை எடுத்து வைக்கிறது.

தேசிய விருது பெற்ற ‘சி ல சௌ’ (Chi La Sow) திரைப்படத்தைத் தயாரித்த சிறுனி சினி கார்ப்பரேஷன், இந்தப் படத்தில் இணைந்து தயாரிக்கிறது. மூன்று நண்பர்களின் கனவாகத் தொடங்கிய முயற்சி, தற்போது அனுபவம் வாய்ந்த தயாரிப்பு நிறுவனத்தின் கூட்டணியுடன் புதிய கட்டத்தை எட்டியுள்ளது.

இன்னும் பெயரிடப்படாத இப்படத்தின் நடிகர்கள் மற்றும் தொழில்நுட்பக் கலைஞர்கள் குறித்த விவரங்கள் விரைவில் அதிகாரப்பூர்வமாக அறிவிக்கப்பட உள்ளன. திரைப்படத்தை உருவாக்குவதற்கான தங்களது பயணத்தை வெளிப்படையாகப் பகிர்ந்துகொண்ட மூன்று நண்பர்களின் முயற்சி, தற்போது முழுநீளத் திரைப்படமாக உருவெடுக்கத் தயாராகி வருவது ரசிகர்களிடையே எதிர்பார்ப்பை ஏற்படுத்தியுள்ளது.