ஜெயராம் – அஷ்வின் நடிக்கும் ‘குட் நியூஸ்’ படத்தின் டப்பிங் பணிகள் தொடங்கின!

மூவிட்ரான் புரொடக்‌ஷன் (Movietron Production) சார்பில் சாய்வினோத் ஜெயக்குமார் பெருமையுடன் வழங்கித் தயாரிக்கும் ‘குட் நியூஸ்’ திரைப்படத்தின் டப்பிங் பணிகள், நவம்பர் 11, 2026 அன்று சென்னையில் உள்ள டி ஸ்டுடியோவில் பாரம்பரிய பூஜையுடன் தொடங்கின. இதனைத் தொடர்ந்து, நடிகர் அஷ்வின் தனது கதாபாத்திரத்திற்கான டப்பிங் பணிகளைத் தொடங்கினார்.

அறிமுக இயக்குநர் நாகேந்திர முருகன் இயக்கத்தில், பிரபல இயக்குநர் பாண்டிராஜ் வசனங்களில் உருவாகி வரும் இப்படத்தில் முன்னணி நடிகர் ஜெயராம் மற்றும் அஷ்வின் இணைந்து நடிக்கின்றனர். சாய் பிரபு ஜெயக்குமார் இணைத் தயாரிப்பில் உருவாகும் இப்படம், படப்பிடிப்புப் பணிகளை வெற்றிகரமாக நிறைவு செய்து தற்போது இறுதிக்கட்டப் பின் தயாரிப்புப் பணிகளில் விறுவிறுப்பாக முன்னேறி வருகிறது.

படத்தின் எஞ்சிய பணிகள் தடையின்றி சிறப்பாக நிறைவடைய வேண்டி நடைபெற்ற பாரம்பரிய பூஜையைத் தொடர்ந்து டப்பிங் பணிகள் தொடங்கப்பட்டன. இந்த நிகழ்வில் இணைத் தயாரிப்பாளர் சாய் பிரபு ஜெயக்குமார் மற்றும் இயக்குநர் நாகேந்திர முருகன் உள்ளிட்டோர் கலந்துகொண்டனர். டப்பிங் பணிகள் தொடங்கியிருப்பது படத்தின் வெளியீட்டை நோக்கிய பயணத்தில் முக்கியமான மைல்கல்லாக அமைந்துள்ளது.

குடும்ப உறவுகள், அன்பு, நகைச்சுவை, மனித உணர்வுகள் என அனைத்து அம்சங்களையும் உள்ளடக்கிய முழுமையான குடும்ப பொழுதுபோக்குத் திரைப்படமாக ‘குட் நியூஸ்’ உருவாகி வருகிறது. இப்படத்தின் மூலம் கல்யாணி அனில் கதாநாயகியாகத் தமிழ் திரையுலகில் அறிமுகமாகிறார். இவர்களுடன் ஆஷா சரத், முத்துக்குமார், ஜாஃபர், குரைஷி, தீபா, வினோதினி, திவ்யா, மணிமேகலை, ஜென்சன் திவாகர் உள்ளிட்ட பலர் முக்கிய கதாபாத்திரங்களில் நடித்துள்ளனர்.

அறிமுக இயக்குநர் நாகேந்திர முருகன், அன்றாட வாழ்க்கையில் நாம் எதிர்கொள்ளும் அனுபவங்கள், குடும்ப உறவுகளுக்கு இடையிலான பிணைப்புகள் மற்றும் இயல்பான மனித உணர்வுகளை மையமாகக் கொண்டு இப்படத்தை இயக்கியுள்ளார். பிரபல இயக்குநர் பாண்டிராஜ் வசனங்கள் எழுதியிருப்பது படத்திற்கு கூடுதல் பலமாக அமைந்துள்ளது. அவரது இயல்பான எழுத்தும் நகைச்சுவை கலந்த வசனங்களும் படத்தின் உணர்வுப்பூர்வமான தருணங்களுக்கு வலுசேர்க்கும் என எதிர்பார்க்கப்படுகிறது.

இப்படத்திற்கு பிரவீன்குமார் ஒளிப்பதிவு செய்துள்ளார். சித்துக்குமார் இசையமைக்க, அர்ஜுன் பாபு படத்தொகுப்புப் பணிகளை மேற்கொண்டுள்ளார். ஷெரிப் மாஸ்டர் நடன இயக்கத்தையும், ஜெயமுருகன் கலை இயக்கத்தையும் கவனித்துள்ளனர். எல். எம். தனசேகர் செயல் தயாரிப்பாளராகவும், அரவிந்தன் இரண்டாவது செயல் தயாரிப்பாளராகவும் பணியாற்றியுள்ளனர்.

மூவிட்ரான் புரொடக்‌ஷன் சார்பில் சாய்வினோத் ஜெயக்குமார் தயாரித்து வழங்கும் இப்படம், சாய் பிரபு ஜெயக்குமார் இணைத் தயாரிப்பில் உருவாகி வருகிறது. ஜெயராம் – அஷ்வின் கூட்டணி, நாகேந்திர முருகனின் புதுமையான இயக்கம், பாண்டிராஜின் இயல்பான வசனங்கள் எனப் பல சிறப்பம்சங்களுடன் உருவாகும் ‘குட் நியூஸ்’ திரைப்படத்தின் அடுத்தடுத்த விளம்பர அறிவிப்புகள் மற்றும் வெளியீட்டுத் தேதி குறித்த தகவல்கள் விரைவில் வெளியாகும் என எதிர்பார்க்கப்படுகிறது.